މި ފަހަކަށް އައިސް 500 ރުފިޔާގެ ވަގު ނޫޓުތަކެއް ދައުރުވަމުން އަންނާތީ، އެކަމަށް ސަމާލުވުމަށް ފުލުހުން އިލްތިމާސްކޮށްފިއެވެ.
ސައްހަ ނޫން ފައިސާއިން ވިޔަފާރި ކުރި ކަމަށް ތުހުމަތު ކުރެވޭ ދެ މީހެއް ހައްޔަރުކޮށް، ފުލުހުން ބުނީ، މި ފަހަކަށް އައިސް އާދައިގެ ކަރުދާހަށް ޕްރިންޓުކޮށްފައި ހުންނަ 500 ރުފިޔާގެ ވަގު ނޫޓުތައް ދައުރުވަމުންދާ ކަން ފާހަގަކުރެވިފައިވާ ކަމަށެވެ.
އެހެންވެ، ވިޔަފާރިއާއި ފައިސާގެ މުއާމަލާތްތައް ކުރުމުގައި ދިވެހި ރުފިޔާގެ ތަފާތު ނޫޓުތަކުގައި ހުންނަ ސެކިއުރިޓީ ފީޗާތައް ހުރިތޯ ބެލުމަށާއި ފައިސާ ޕްރިންޓުކޮށްފައިވާ ކަރުދާހުގެ ކޮލިޓީ ބެލުންފަދަ ކަންކަމަށް ސަމާލުވުމަށް ފުލުހުން ވަނީ އެދިފައެވެ. އަދި މިފަދަ މައްސަލައެއް ދިމާވެއްޖެނަމަ ލަސްނުކޮށް އެ ޚިދުމަތަށް ރިޕޯޓުކުރުމަށް އިލްތިމާސްކުރިއެވެ.
ވަގު ނޫޓުން ވިޔަފާރި ކުރި ކަމަށް ތުހުމަތުކޮށް، ހައްޔަރު ކުރި ދެމީހުން --- ފޮޓޯ/ ފުލުހުން
ސައްހަ ނޫން ފައިސާއިން މުއާމަލާތު ކުރި ކަމަށް ތުހުމަތު ކުރެވޭ މައްސަލައިގައި މާލޭން ހައްޔަރު ކުރީ، ތ. ތިމަރަފުށި، ސަލްވާ، އުމުރުން 25 އަހަރުގެ ޢާއިޝަތު ޝިޒުނީ އާއި ސ. ހިތަދޫ، އަތަމާވިލާ، މަޢުޒޫ މުޙައްމަދު (29އ)އެވެ.
އެ މައްސަލައާ ގުޅިގެން އިއްޔެ ހިންގި އޮޕަރޭޝަނެއްގައި އެ ދެ މީހުން ބަލައިފާސްކުރިއިރު، 500 ރުފިޔާގެ 24 ވަގު ނޫޓު ފެނިފައިވާ ކަމަށް ފުލުހުން މައުލޫމާތުދެއެވެ.
ވަގު ނޫޓު ބޭނުންކުރުމާއި، އޮންލައިން ޓްރާންސްފާތަކުގެ ފޭކް ސްލިޕްތައް ދިނުން ފަދަ މައްސަލަތަކަށް ސަމާލުވުމަށް މީގެ ކުރިން ވެސް ފުލުހުން އިލްތިމާސްކޮށްފައިވެއެވެ.