މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އެޕްރޫވްޑް ބޭސް ހުރީ ރާއްޖޭގައި ބޭނުންކުރާ ދެ ބާވަތެއްގެ މަސްތުވާ އެއްޗަކަށް އެކަނިކަމަށް ނެޝަނަލް ޑްރަގް އޮތޯރިޓީ (އެންޑީއޭ)އިން ބުނެފިއެވެ.
އެސްއެސްޓީވީގެ ބާރު ހަތަރެއް ޕްރޮގްރާމުގައި ވާހަކަ ދައްކަވަމުން އެންޑީއޭގެ ބޯޑު މެންބަރު އަހްމަދު އަބްދުއްސައްތާރު ވިދާޅުވީ ބޭނުންކުރެވޭ މަސްތުވާތަކެތީގެ ބާވަތްތަކުގެ ތެރެއިން އެމްއެފްޑީއޭ އެޕްރޫވްޑް ބޭސް ހުރީ ހެރޮއިން އަދި ބަނގުރާ ބޭނުންކުރާ މީހުންނަށް އެކަނި ކަމަށެވެ.
އެހެން ނަމަވެސް ޕްރޮމިސިން ލެވެލްގައި ބައެއް ހިސާބުތަކުގައި ވަކިވަކި މަސްތުވާތަކެތީގެ ބާވަތްތައް ބޭނުންކުރާ މީހުންނަށް ދިނުމަށް ބޭސްތަކެއް އުފައްދާފައިވާކަން އޭނާ ފާހަގަ ކުރެއްވިއެވެ. އޭނާ ވިދާޅުވީ އެއް ގައުމުގައި އެ ގޮތަށް ބޭނުންކުރާ ބޭސް އެހެން ގައުމުތަކުގައި ބޭނުން ކުރުމުން، އެންމެ ހެޔޮ ނަތީޖާ ނުނިކުމެދާނެ ކަމަށެވެ.
އެއީ އެ ބޭސްތަކަކީ މަސްތުވާތަކެތި ބޭނުންކުރާ މީހުން ޑިޓޮކްސްކުރާ ބޭހަކަށް ވާއިރު، އެ މީހުންނަށް ދިމާވާ އެކިއެކި އުނދަގޫތައް ލުއިކޮށްދިނުމަށް ދޭ ބޭސްތަކަކަށްވާތީއެވެ. އޭގެ ތެރޭގައި ނިދަން އުނދަގޫވުމާއި، މޫޑް ސުވިންގު ލުއިކޮށްދިނުމަށް ދޭ ބޭސްތައް ހިމެނެއެވެ.
ނުރައްކާތެރި މަސްތުވާތަކެތީގެ ބާވަތެއް ކަމަށްވާ މެތަމްފެޓަމިމް (މެތު) ވެސް ރާއްޖޭގައި ބޭނުންކުރާ މިންވަރު އިތުރުވަމުން އަންނަ ކަމަށް ކަމާގުޅޭ އިދާރާތަކުން މީގެ ކުރިން ވަނީ ބުނެފައެވެ. މެތަކީ އެ ބޭނުން ކުރުމުން ވަރަށް ފަސޭހައިން، އަދި އިންތިހާއަށް އެއަށް ދެވިހިފާ މަސްތުވާތަކެތީގެ ބާވަތެކެވެ.
މަސްތުވާތަކެތީގެ ބާވަތްތައް އާންމުވަމުންދާ ދިއުމާއެކު، އެ މަސްތުވާތީގެ ބާވަތްތައް ބޭނުންކުރާ މީހުންނަށް ދޭ ބޭސް ރާއްޖޭގައި ނެތް ކަމުގެ ކަންބޮޑުވުން އާންމުން ފާޅު ކުރާކަން އަހުމަދުގެ ވާހަކައިގައި ފާހަގަ ކުރެއްވިއެވެ.
"..އަޅުގަނޑުމެން ބޭސް ދެމުން މިދަނީ، އަޅުގަނޑުމެންގެ ޑޮކްޓަރުންގެ ލަފާއާއި އަޅުގަނޑުމެންނަށް ލަފާދޭ ބޭރުގެ ފަރާތްތަކާ އެއްކޮށް، ހިރޮއިން ބޭނުންކުރުމަށް ފަހު ނިދަން އުނދަގޫވާތީ، ނޫނީ މޫޑް ސްވިންގަށް ދެވޭ ބޭހެއް" އަހްމަދު ވިދާޅުވިއެވެ.
ރާއްޖޭގައި އެންމެ ގިނައިން ބޭނުންކުރެވޭ މަސްތުވާތަކެތީގެ ބާވަތަކީ ހޭޝް އޮއިލްއެވެ. ދެވަނައަށް އެންމެ ގިނައިން ބޭނުންކުރަނީ ހެރޮއިންއެވެ.
މަސްތުވާތަކެތި ބޭނުންކުރާ މީހުންނަށް ޚާއްސަކޮށްގެން އެންޑީއޭއިން ހިންގާ އެކިއެކި ޕްރޮގްރާމްތަކުގައި 960އަށްވުރެ ގިނަ މީހުން ބައިވެރިވެފައި ވެއެވެ.
މި ފަރުވާގެ ނިޒާމު އިތުރަށް ފުޅާ ކުރުމަށް އެންޑީއޭއިން ވަނީ ބޮޑެތި މަސައްކަތްތަކެއް ފަށައިފައިފައެވެ.