ކުރީ ސަރުކާރުން ކުރިއަށް ގެންދިޔަ ބިންވެރިޔާ ސްކީމްގެ ދަށުން ހުޅުމާލޭ ދެވަނަ ފިޔަވަހިން ދިނުމަށް ހަމަޖެހިފައިވާ ގޯތިތައް އެތަންތަނުގެ ވެރިންނާ ހަވާލުކޮށްފިއެވެ.
ހައުސިން މިނިސްޓްރީން މިރޭ ކުރި ޕޯސްޓެއްގައި ވަނީ، ރައީސް ޑރ. މުޙައްމަދު މުއިއްޒުގެ ވައުދުފުޅާ އެއްގޮތަށް ހުޅުމާލޭ ދެވަނަ ފިޔަވަހިން ދޫކުރި ހުރިހާ ގޯއްޗެއް އެތަންތަނުގެ ވެރިންނާ ހަވާލުކޮށް ނިމުނީ މިއަދު ކަމަށެވެ.
މީގެ ކުރިން ރައީސް މުއިއްޒު ވަނީ މި މަސް ނިމުމުގެ ކުރިން ހުޅުމާލޭ ދެވަނަ ފިޔަވަހިން ދޫކުރި ގޯތިތައް ވެރިފަރާތާ ހަވާލު ކުރައްވާނެ ކަމަށް ވިދާޅުވެފައެވެ.
ކުރީގެ ރައީސް އިބްރާހީމް މުޙައްމަދު ޞާލިޙްގެ ސަރުކާރުގެ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ނިންމައިފައިވެއެވެ. އެ ގޯތިތައް ދޫކޮށްފައިވަނީ ހުޅުމާލެއާއި ގުޅީފަޅާއި ގިރާވަރުފަޅުންނެވެ.
ގެދޮރުވެރިޔާ ސްކީމުގެ ދަށުން ފަހި ދިރިއުޅުން ކޯޕަރޭޝަން (އެފްޑީސީ)އާ ހަވާލުކޮށްގެން ހުޅުމާލޭގައި 4000 ފުލެޓު ތަރައްގީ ކުރަމުން އަންނައިރު، ފުލެޓަށް ޝަރުތު ހަމަވާ މީހުންގެ ލިސްޓުގައި މައްސަލައެއް އުޅޭ ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ)އިން ވަނީ ޖިނާއީ ތަހުގީގެއް ކޮށްފައެވެ.
އެ ތަހުގީގުން ޝަރުތުހަމަވެ، އިތުރު މައްސަލައެއް ހުރިކަން ފާހަގަވެފައިނުވާ ފޯމްތަކުގެ ލިސްޓެއް އެ ކޮމިޝަނުން ހައުސިން މިނިސްޓްރީއަށް ފޮނުވިއެވެ.
އޭގެ ފަހުން ހައުސިން މިނިސްޓްރީން ވަނީ، އޭސީސީން ފޮނުވާފައިވާ ލިސްޓުގައި ހިމެނޭ ފޯމްތަކަކީ ހަމައެކަނި ތަހުގީގުގެ ބޭނުމަށް ހޯދާފައިވާ މައުލޫމާތުގެ މައްޗަށް ބިނާކޮށް އެކުލަވާލާފައިވާ ލިސްޓެއް ކަމަށް ބުނެ، ގެދޮރުވެރިޔާ ސްކީމްގެ ދަށުން ފުލެޓު ލިބޭ ފަރާތްތައް ކަނޑައެޅުމުގެ އިންތިޒާމުތައް ކުރަމުން އަންނަ ކަމަށް ބުނެފައެވެ.
އެހެންވެ، ބައެއް ފަރާތްތަކުން ވަނީ ސަރުކާރުން ފުލެޓު ލިސްޓު ބާތިލުކުރަނީ ކަމަށް ބުނެ ކަންބޮޑުވުން ފާޅުކޮށްފައެވެ.
މި މަހު އާންމުކުރާނެކަން ހައުސިން މިނިސްޓްރީން އިއުލާނުކުުރި ގެދޮރުވެރިންގެ ފްލެޓް ލިސްޓު މި މަހު ވެސް އާންމު ނުކުރެވޭނެ ކަމަށާއި އިތުރު ވަގުތު ބޭނުންވާތީ ދެން އެ ކަން ވާނީ އަންނަ މަހުކަމަށް އެ މިނިސްޓްރީން މިއަދު ވަނީ ބުނެފައެވެ.