މާލޭގެ ހުރިހާ މަގުތަކެއް ހެދުމުގެ މަޝްރޫއުގެ އަމަލީ މަސައްކަތް ފެށޭވަރު ވާނީ އަންނަ އަހަރު މެދުތެރޭކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްޠަލިބު މިއަދު ވިދާޅުވެއްޖެއެވެ.
މާލޭގެ ހުރިހާ މަގުތަކެއް ހެދުމަށް ސަރުކާރުން އިއުލާނުކުރި މަޝްރޫއަކީ ޗައިނާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ މަޝްރޫއެކެވެ. މީގެ ކުރިން މި އަހަރު ފެބްރުއަރީ މަހުގެ ތެރޭ ރައީސް ޑރ. މުޙައްމަދު މުއިއްޒު ދެއްވި ރިޔާސީ ބަޔާނުގައި ވިދާޅުވީ މި އަހަރު މަސައްކަތް ފެށޭނެ ކަމަށެވެ.
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްޠަލިބު- ފޮޓޯ: ރައީސް އޮފީސް
ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި އަހަރު ނިމެން ގާތްވެފައިވާއިރު މަގު ހެދުމުގެ އަމަލީ މަސައްކަތް ނުފެށޭތީ، ނޫސްވެރިއަކު ކުރި ސުވާލަަށް ޖަވާބުދެއްވަމުން މިނިސްޓަރު ވަނީ މަޝްރޫއު ލަސްވާ ސަބަބު ހާމަކުރައްވައިފައެވެ.
މިނިސްޓަރު ވިދާޅުވީ އެ ފަދަ މަޝްރޫއެއް ކުރިއަށްގެންދާއިރު ޗައިނާ ސަރުކާރުން ބަލާ މަރުހަލާތަކެއް ހުންނަ ކަމަށެވެ. އެގޮތުން ރާއްޖެއިން ޕްރޮޮޕޯޒަލެއް ވެސް ހުށަހަޅަން ޖެހޭކަމަށް ވިދާޅުވިއެވެ. އަދި އެއަށްފަހު އެޕްރޫވަލް ލިބި، ފީޒިބިލިޓީ ޓީމުތައް އައިސް، ލިބޭ މަލޫމާތަށް ބަލައި، ދެން ދަނީ ޓެންޑަރުކުރުމާ ހަމައަށްކަމަށް މިނިސްޓަރު ވިދާޅުވިއެވެ.
އެގޮތުން މަގު ހެދުމުގެ މަޝްރޫއުގެ ދަށުން، އަންނަ މަހުގެ ހަަތަރުވަނަ ދުވަހު ޗައިނާގެ ފީޒިބިލިޓީ ޓީމު ރާއްޖެ އަންނާނެކަމަށް މިނިސްޓަރު ވިދާޅުވިއެވެ. އަދި 20 ދުވަހު މަސައްްކަތް ކުރުމަށްފަހު މައުލޫމާތުތައް ފޯރުކޮށްދޭނެކަމަށް ވިދާޅުވިއެވެ.
އެއާއެކު އުންމީދުކުރެވެނީ އަންނަ އަހަރުގެ މެދުތެރޭ މަގުހެދުމުގެ އަމަލީ މަސައްކަތް ފެށޭނެކަަމަށް ކަން މިނިސްޓަރު ވިދާޅުވިއެވެ.
"އެހެންވީމާ އަޅުގަނޑުމެން މަސައްކަތް މި ކުރަނީ މިހާރު އެ ފެށުމާއެއްކޮށް ވީހާ ވެސް ބާރު ސްޕީޑެއްގައި ގެންގޮސްފައި އަންނަ އަހަރު މެދުތެރެއަށް ދާންވާއިރަށް އަޅުގަނޑުމެންނަށް އަމަލީ މަސައްކަތް ފެށޭތޯ،" މިނިސްޓަރު ވިދާޅުވިއެވެ.
އަމާޒަކީ ހަތަރު އަހަރު ތެރޭ މަސައްކަތް ނިންމުންކަމަށް ވެސް މިނިސްޓަރު ވިދާޅުވިއެވެ.
ނަމަވެސް މާލެއަކީ ގިނަ ބަޔަކު އުޅޭ ތޮއްޖެހިފައި އޮތް ތަނަކަށް ވާތީ މަސައްކަތް ކުރިއަށްގެންދާނީ އާންމުންނަށް ދަތިނުވާނެހެން ކަމަށް މިނިސްޓަރު ވިދާޅުވިއެވެ. އެހެންކަމުން ސީދާ މަސައްކަތް ނިންމަން ހޭދަވާނެ މުއްދަތެއް ދަންނަވަން ދަތިކަމަށް މިނިސްޓަރު ވިދާޅުވިއެވެ.
އަދި މިއީ ހިލޭ އެހީ ހަމަޖެހިފައިވާ މަޝްރޫއެއްކަމުން އަވަސް އަރުވައިލައިގެން މަސައްކަތް ކުރަން ނުވިސްނާކަމަށް ވިދާޅުވިއެވެ.
މޫސުން ގޯސްވާ ދުވަސްވަރު މާލޭގެ މަގުތަކުގައި ވަަރަށް ބޮޑަށް ފެންބޮޑުވެއެވެ. އެހެެންވެ މަގުތައް ހެދެންދެން މިހާރު ވެސް ވަގުތީ ފެން ހިންދާ ނިޒާމުތައް އަންނަނީ ގާއިމްކުރަަމުންނެވެ.