މީގެ 10 އަހަރު ކުރިން އަޖޭ ލީޑް ރޯލް ކުޅުނު ފިލްމު "ނާމް" އަންނަ މަހުގެ 22 ވަނަ ދުވަހު ސިނަމާތަކުގައި ރިލީޒްކުރަން ތައްޔާރުވެފައިވާކަން އިއުލާނުކޮށްފިއެވެ.
މި ފިލްމަކީ އަންނަ މަހުގެ އެއްވަނަ ދުވަހު ރިލީޒްކުރާ ފިލްމު "ބޫލް ބުލައްޔާ 3"ގެ ޑައިރެކްޓަރު އަނީސް ބަޒްމީގެ ފިލްމެކެވެ. އިންޑިއާގައި ފާހަގަކުރާ ދިވާލީ ފެސްޓިވަލާއި ދިމާކޮށް މި ފިލްމު ރިލީޒްކުރަން ތައްޔާރުވަމުން އަންނައިރު މި ތާރީޚުގައި އަޖޭގެ ފިލްމު "ސިންގްހަމް އަގެއިން" ވެސް ރިލީޒްކުރާނެއެވެ.
ނަމަވެސް, އަޖޭގެ ފިލްމު "ނާމް" ރިލީޒްކުރަން ނިންމާފައި ވަނީ ރޯހިތު ޝެޓީގެ "ސިންގްހަމް އަގެއިން" ރިލީޒްކުރާތާ ތިން ހަފުތާ ފަހުންނެވެ.
ފިލްމު "ނާމް"ގެ މަންޒަރެއް ނެގުމުގެ މަސައްކަތުގައި ޑައިރެކްޓަރު އަނީސް ބަޒްމީ އާއި އަޖޭ ދޭވްގަން ފިލްމު ސެޓުގައި--ފޮޓޯ/ބޮލީވުޑްހަންގާމާ
ފިލްމީ ރިޕޯޓުތައް ބުނާގޮތުން އަޖޭގެ ފިލްމު "ނާމް" ރިލީޒްނުވެ ދިގުލައިގެން ދިޔައީ ފިލްމުގައި މަސައްކަތްކުރި ޕްރޮޑިއުސަރެއްގެ ކުއްލި މަރާ ގުޅިގެންގެންނެވެ.
ހަމައެއާއެކު މި އެކްޝަން ޑްރާމާ ފިލްމަށް ޑިސްޓްރިބިއުޓަރަކު ވެސް ހޯދުންވީ އޭރު ދިމާވި ވަރަށް ބޮޑު ގޮންޖެހުމެއް ކަމަށް ރިޕޯޓުތައް ބުނެއެވެ. ނަމަވެސް, ގިނަ ބަޔަކު އިންތިޒާރު ކުރަމުން އަންނަ ބޮޑު ދެ ފިލްމެއް ރިލީޒްކުރާ މަހެއްގައި މި ފިލްމަށް ބެލުންތެރިންގެ ފަރާތުން މަރުހަބާ ކިޔާނެ ކަމާ މެދު ވަރަށް ގިނަ ބަޔަކު އަންނަނީ ސުވާލު އުފައްދަމުންނެވެ.
ފިލްމު "ނާމް"އިން އަޖޭއާ އެކު ބަތަލާގެ ރޯލްއިން ފެންނާނީ ބޫމިކާ ޗާވްލާ އަދި ސަމީރާ ރެޑީއެވެ. ޑައިރެކްޓަރު އަނީސް ބަޒްމީއާ އެކު އަޖޭ ކުޅެފައިވާ މަގުބޫލު ފިލްމުތަކުގެތެރޭ "ހަލްޗަލް"، "ޕިޔާރު ތޯ ހޯނާ ހިތާ" އަދި "ދިވާންގީ" ހިމެނެއެވެ.