ކޮމަންވެލްތު އެސޯސިއޭޝަން އޮފް ޓެކްސް އެޑްމިނިސްޓްރޭޓާސް (ކާޓާ)ގެ މެނޭޖްމަންޓް ކޮމިޓީއަށާއި، ކާޓާގައި އޭޝިއާ ސަރަޙައްދު ތަމްސީލު ކުރާ ރީޖަނަލް ޑައިރެކްޓާގެ މަގާމަށް ދިވެހިރާއްޖެ އިންތިޚާބުވެއްޖެއެވެ.
ކާޓާގައި ރާއްޖެ ތަމްސީލުކުރަނީ މީރާއެވެ.
މި ކޮމިޓީއަށް ދިވެހިރާއްޖެ އިންތިޚާބު ކުރީ މިމަހުގެ 21އިން 25އަށް މޮރިޝަސްގައި ބޭއްވި ކާޓާގެ 23ވަނަ އެނުއަލް ޖެނެރަލް މީޓިންގައެވެ.
މިއަހަރުގެ ކާޓާ ޓެކްނިކަލް ކޮންފަރެންސްގައި އާންމު ވޯޓުތަކުގެ އިތުރުން، ކާޓާގެ ޗެއާމަން އަދި ރައީސްގެ މަގާމަށް ވެސް ވޯޓުލުން ވަނީ ކުރިއަށް ގެންގޮސްފައެވެ. އެގޮތުން ކާޓާގެ ރައީސްކަމުގެ މަގާމަށް މެލޭޝިއާ ހޮވިފައިވާއިރު، ޗެއާމަންގެ މަގާމަށް ހޮވިފައިވަނީ މޮރިޝަސްއެވެ.
ކާޓާގެ މެނޭޖްމަންޓް ކޮމިޓީގައި މީގެ ކުރިން ވެސް ދެ ދައުރެއްގައި މީރާ ވަނީ ރާއްޖެ ތަމްސީލުކޮށްފައެވެ. އަދި ރީޖަނަލް ޑިރެކްޓަރުގެ މަގާމު ވެސް ފާއިތުވި ދައުރު މީރާއިން ވަނީ އަދާކޮށްފައެވެ.
ކާޓާގެ މެނޭޖްމަންޓް ކޮމިޓީއަށް ދިވެހިރާއްޖެ ފުރަތަމަ އިންތިޚާބުވީ 2012ވަނަ އަހަރުއެވެ.
ކާޓާއަކީ 1978ވަނަ އަހަރު ކޮމަންވެލްތް ފިނޭންސް މިނިސްޓަރުންގެ ނިންމުމުގެ ދަށުން، މެންބަރު ގައުމުތަކަށް އެހީތެރިވެދީ ކޮންފަރެންސްތަކާއި ތަމްރީނު ޕްރޮގްރާމްތަކާއި ޕަބްލިކޭޝަންތަކާއި އިލްމު ހިއްސާކުރުމުގެ ތެރެއިން ދެމެހެއްޓެނިވި ތަރައްގީއާއި ރަނގަޅު ވެރިކަމެއް ކުރިއެރުވުމަށް ފައިދާހުރި ޓެކްސް އެޑްމިނިސްޓްރޭޝަންތައް ތަރައްގީކުރުމަށް އުފައްދާފައިވާ ބައިނަލްއަގްވާމީ ޖަމިއްޔާއެކެވެ.
ކާޓާއަކީ އެކި ގައުމުތަކުގެ ޓެކްސް އިދާރާތަކުގެ މެދުގައި އުފައްދާފައިވާ ޖަމިއްޔާތަކުގެ ތެރެއިން މިހާރު ދުނިޔޭގައި އޮތް އެންމެ ބޮޑު ޖަމިއްޔާއެވެ. މި ކޮންފަރެންސް 2023ވަނަ އަހަރު ބާއްވާފައިވަނީ ދިވެހިރާއްޖޭގައެވެ.