މާފަރު އިންޓަނޭޝަނަލް އެއާޕޯޓުގެ ރަންވޭ ބޮޑުކުރުމުގެ މަސައްކަތް ނިންމާ، ބައިނަލްއަގުވާމީ ދަތުރުތަކަށް އަލުން ހުޅުވާލައިފިއެވެ.
އައިލެންޑް އޭވިއޭޝަނުން އޮޕަރޭޓްކުރާ މާފަރު އެއާޕޯޓް ހުޅުވީ، ޑިސެމްބަރު 1، 2019 ގައެވެ. އޭގެ ފަހުން ބައިނަލްއަގުވާމީ ދަތުރުތަކަށް އެ އެއާޕޯޓު އެންމެ ފުރަތަމަ ހުޅުވާލީ 2020 ވަނަ އަހަރުގެ ޖުލައި މަހުގެ އެއްވަނަ ދުވަހެވެ.
ނަމަވެސް ރަންވޭ ބޮޑުކުރުމަށްޓަކައި ބައިނަލްއަގުވާމީ ދަތުރުތައް މެދުކަނޑާލީ، މިދިޔަ އަހަރުގެ މެއި މަހުއެވެ.
ރަންވޭގެ މަސައްކަތް ނިންމައި، ހުޅުވާލިއިރު އެ މަސައްކަތުގެ ދަށުން ރަންވޭގެ ދިގުމިން 2،800 މީޓަރަށް ބޮޑުކޮށް 650 މީޓަރު ވަނީ އިތުރުކޮށްފައެވެ. މީގެ ކުރިން އެ އެއާޕޯޓުގައި ރަންވޭގައި ގާތްގަނޑަކަށް 2,300 މީޓަރު ހުރިއިރު އެ އެއާޕޯޓަށް އޭ320 އާއި ބޮއިން 737 މަރުކާގެ ބޯޓު ފަހަރު ޖައްސައެވެ. ނަމަވެސް ރަންވޭ ބޮޑުކުރުމާއެކު ބޮއިން 777 މަރުކާގެ ބޯޓުތަކަށް ވެސް ޖެއްސޭނެ ކަމަށް އައިލެންޑް އޭވިއޭޝަންއިން ބުންޏެވެ.
މާފަރު އިންޓަނޭޝަނަލް އެއާޕޯޓަކީ ރާއްޖެއަށް އެންމެ ގިނަ އަދަދަކަށް ޖެޓް ޖައްސާ އެއް އެއާޕޯޓެވެ.
އެގޮތުން މާފަރު އެއާޕޯޓުގެ އޭޕްރަން ބޮޑުކުރުމުގެ މަޝްރޫއު ވެސް އެމްޓީސީސީއާ ހަވާލުކޮށްގެން މިހާރު ގެންދަނީ ކުރަމުންނެވެ. މި މަޝްރޫއަކީ 29.85 މިލިއަން ރުފިޔާގެ މަޝްރޫއެކެވެ.
އޭޕްރަން ބޮޑު ކުރުމުގެ މަޝްރޫއު ނިމުމުން އެއްފަހަރާ 26 ޖެޓް ޕާކު ކުރެވޭނެ ކެޕޭސިޓީ ހުންނާނެއެވެ. މިވަގުތު މާފަރު އެއާޕޯޓުގައި ހުރީ 13 ބިޒްނަސް ޖެޓް ޕާކު ކުރެވޭ ޖާގައެވެ.
އަހަރެއްގެ މައްޗަށް އެވްރެޖްކޮށް 700 އެއާ ޓްރެފިކް މޫވްމަންޓްސް ރެކޯޑުކުރެވޭ މި އެއާޕޯޓަކީ ވެލާނާ އިންޓަނޭޝަނަލް އެއާޕޯޓަށް ފަހު ރާއްޖޭގައި ހެދި އެންމެ ބޮޑު އެއާޕޯޓެވެ.
އައިލެންޑް އޭވިއޭޝަނުން އޮޕަރޭޓުކުރާ މި އެއާޕޯޓަކީ އަބޫ ދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން 60 މިލިއަން ޑޮލަރު ޚަރަދު ކޮށްގެން ހަދާފައިވާ އެއާޕޯޓެކެވެ.