ތެހެރާން (26 އޮކްޓޯބަރު 2024): ޔަހޫދީ އިސްރާއީލުން އީރާނަށް ވައިގެ މަގުން އުދުވާނީ ހަމަލާތަކެއް ދިނުމަށްފަހު ހަމަލާތައް ހުއްޓާލިކަން އިއުލާނުކޮށްފިއެވެ.
އިސްރާއީލުން ނެރުނު އަސްކަރީ ބަޔާނެއް ބުނާގޮތުން ތިންފަހަރެއްގެ މަތިން އީރާނުގެ ޖުމްލަ 20 އަސްކަރީ ތަނަކަށް ފައިޓާޖެޓުންނާއި މިސައިލުން ވަރުގަދަ ހަމަލާތަކެއް ދިނުމަށްފަހު ހަމަލާތައް މިހާރުވަނީ ހުއްޓާލާފައެވެ. މިތަންތަނަކީ ކުރީއްސުރެ ހަމަލާދޭން ކަނޑައަޅާފައިވާ އަސްކަރީ 20 ތަންތަންކަމަށްވެސް އިސްރާއީލުގެ ބަޔާން ބުނެއެވެ.
މީގެތެރޭގައި ހިމެނެނީ ވެރިރަށް ތެހެރާނާއި ގުމް އާއި ޚަރާޖް ސިޓީ އާއި ތޯން ސިޓީގައިވާ އަސްކަރީ ތަންތަންކަމަށް ވެސް ބުނެފައިވެއެވެ. ހަމަލާދިނީ މި ސިޓީތަކުގައިވާ އަސްކަރީ ބައެއް ބޭސްތަކާއި ހަތިޔާރު އުފައްދާ ބައެއް ކާރުޚާނާތަކާއި ޖާސޫސީ ބައެއް މަރުކަޒުތަކަށް ކަމަށް އިސްރާއީލުގެ ބަޔާން ބުނެއެވެ.
އިސްރާއީލުގެ މީޑީއާ ރިޕޯޓްތައް ބުނާގޮތުން އީރާނުގެ އެންމެ ބޮޑު އެއް އެއާޕޯޓްކަމަށްވާ އިމާމް ޚުމައިނީ އިންޓަނޭޝަނަލް އެއާޕޯޓަށްވެސް އިސްރާއީލުން ވަރުގަދަ ހަމަލާތަކެއް ދިނެވެ.
ހަމަލާދިން ތަންތަނުގެ ތެރޭގައި އީރާނުގެ ތެލާއި ގޭހާ ބެހޭ މަރުކަޒުތަކާއި ނިއުކްލިޔާ މަރުކަޒުތައް ހިމެނިފައި ނުވާނެކަމަށް އިސްރާއީލުގެ ބަޔާން ބުނެއެވެ.
އިސްރާއީލު ބުނާގޮތުން ހަމަލާދޭން ފަށާފައިވަނީ ރޭ ފަތިހުގެ ވަގުތެއްގައެވެ. ފުރަތަމަ ހަމަލާއާއި ދެވަނަ ހަމަލާއާ ދެމެދު ވިއްސަކަށް މިނެޓު އަދި ދެވަނަ ހަމަލާއާއި ތިންވަނަ ހަމަލާއާ ދެމެދު ބައިގަޑިއެއްހާއިރު ވިކަމަށް ރިޕޯޓްތައް ބުނެއެވެ.
މިހަމަލާތަކާބެހޭ ގޮތުން އީރާނުން އަދި ރަސްމީ ސިފައެއްގައި އެއްޗެއް ބުނެފައެއް ނުވެއެވެ. ނަމަވެސް އީރާނުގެ މަދަނީ ދިފާއާބެހޭ މަސްއޫލުވެރިއަކާ ހަވާލާދީ އީރާނުގެ އޮންލައިން ބައެއް ނޫސްތައް ބުނާގޮތުން ހަތް ގޮވުމެއްގެ އަޑު އީރާނުގެ ވެރިރަށް ތެހެރާންގެ ތެރެއިން ވަނީ އިވިފައެވެ. މި ގޮވުންތަކުގެ ތެރޭގައި އީރާނުގެ ވައިގެ ދިފާއީ ނިޒާމުން އިސްރާއީލުގެ ހަމަލާތައް މަތަކުރުމަށް ފޮނުވާލި މިސައިލްތަކެއް ގޮވުންތައް ވެސް ހިމެނެއެވެ.
އިމާމް ޚުމައިނީ އެއާޕޯޓަށް ހަމަލާދިންކަމަށް އިސްރާއީލު ބުނިނަމަވެސް އީރާނުގެ ނޫސްތައް ބުނާގޮތުން އެ އެއާޕޯޓަށް ވެސް އަދި އީރާނުގެ ދެވަނައަށް އެންމެ ބޮޑު އެއާޕޯޓްކަމަށްވާ މަހްރު އާބަދު އެއާޕޯޓަށްވެސް އެއްވެސް ހަމަލާއެއް އަރާފައެއް ނުވެއެވެ. އަދި ގެއްލުމެއްވެސް ލިބިފައެއް ނުވެއެވެ. އެތަން ބަންދުކޮށްފައެއްވެސް ނުވެއެވެ.
ނަމަވެސް އިސްރާއީލުގެ ހަމަލާތަކުގެ ތަންކޮޅެއް ކުރިން އީރާންވަނީ ވައިގެ ދަތުރުތައް ވަގުތީގޮތުން ހުއްޓާލިކަން އިއުލާނުކޮށްފައެވެ. އަދި އީރާނުގެ ޖައްވު ވަގުތީ ގޮތުން ބަންދުކޮށްފައިވާކަންވެސް ވަނީ އިއުލާނުކޮށްފައެވެ.
އީރާނުގެ މަދަނީ ދިފާއީ ޚިދުމަތްތައް ބުނާގޮތުން އިސްރާއީލުގެ ހަމަލާތަކާގުޅިގެން އެޚިދުމަތުން ކުއްލި ގޮތަކަށް ހަރަކާތްތެރިވާންޖެހޭ ފަދަ އެއްވެސް ހާލަތެއް ވެރިރަށް ތެހެރާނުންވެސް އަދި ތެހެރާންގެ ބޭރުގައިވާ ސަރަހައްދަކުންވެސް ކުރިމަތިވެފައެއް ނުވެއެވެ.
އިސްރާއީލު ބުނާގޮތުން މިހަމަލާތައް އީރާނަށް ދިނީ މިމަހުގެ އެއްވަނަ ދުވަހު އީރާނުން އިސްރާއީލަށް ދިން ވަރުގަދަ މިސައިލް ހަމަލާތަކަށް ރައްދު ދިނުމުގެ ގޮތުންނެވެ. އެހަމަލާތަކުގައި އިސްރާއީލުގެ އަސްކަރީ އަދި މަދަނީ ތަންތަނަށް ބޮޑެތި ގެއްލުންތަކެއް ލިބިފައިވާކަން ފަހުން ވަނީ ހާމަވެފައެވެ. ނަމަވެސް މީހަކު މަރުވެފައެއް ނުވެއެވެ.
އީރާން ކުރިން ބުނެފައިވާގޮތުން އިސްރާއީލުން ދޭ ރައްދު ހަމަލާތަކުން އީރާނަށް މާބޮޑު ގެއްލުމެއް ނުލިބޭނަމަ އީރާނުން ސީދާގޮތެއްގައި އިސްރާއީލަށް ރައްދު ނުދިނުމަކީ އެކަށީގެންވާ ކަމެކެވެ. އެޢީ ސަރަހައްދީ ހަނގުރާމައަކަށް ދާން އީރާން ބޭނުންނުވާތީއެވެ.
ނަމަވެސް ބޮޑު ގެއްލުމެއް ލިބިއްޖެނަމަ ކުރިން އިސްރާއީލަށް އަމާޒުކޮށް އީރާނުން ދިން ހަމަލާތަކަށްވުރެ އެތައް ގުނައެއް ބާރުގަދަ ހަމަލާތަކެއް އިސްރާއީލަށް ދޭނެއެވެ. އަދި އީރާނުގެ ތެލާއި ގޭހުގެ މަރުކަޒުތަކާއި ނިއުކްލިޔާ މަރުކަޒުތަކަށް ހަމަލާދީފިނަމަ އިސްރާއީލުގެ ނިއުކްލިޔާ މަރުކަޒު ބިމާ ހަމަކޮށްލެވޭ ވަރުގެ ހަމަލާތަކެއް ދޭނެއެވެ.
އަދި އިސްރާއީލުގައި ކަރަންޓް އުފައްދާ މައި ތިން ސްޓޭޝަނާއި އެނޫންވެސް މަދަނީ ހައްސާސް މަރުކަޒުތައް ބިމާހަމަކޮށްލާވަރުގެ ބާރުގަދަ ހަމަލާތަކެއް ދޭނެއެވެ.
އިސްރާއީލުގެ ހަމަލާތަކަށްފަހު އީރާނުގެ އާންމު ހަރަކާތްތަކަށް އެއްވެސް ހުއްޓުމެއް އައިސްފައި ނުވާކަމަށް އެގައުމުގެ މީޑިއާ ތަކުންވަނީ ހާމަކޮށްފައެވެ.