ބިންވެރިޔާ ސްކީމްގެ ދަށުން މިދިޔަ ސަރުކާރުގައި ގިރާވަރުފަޅުން ދޫކުރި ގޯތި ލިބުނު މީހުންގެ ތެރެއިން ގުޅިފަޅަށް ގޯތި ބަދަލުކުރި މީހުންނާއެކު ގުޅިފަޅުން ގޯތި ލިބުނު އެންމެންގެ ގުރު އަލުން ނެގުން އަންނަ އަންގާރަ ދުވަހު އޮންނާނެ ކަމަށް ހައުސިން މިނިސްޓްރީން މިރޭ ބުނެފިއެވެ.
އެ މިނިސްޓްރީން މިރޭ ގެޒެޓުގައިވަނީ އެކަމާ ގުޅޭ އިއުލާނެއް އާންމުކޮށްފައެވެ.
އޭގައި ބުނެފައިވާ ގޮތުގައި، މި މަހު 15ގައި ޝާއިއުކޮށްފައިވާ 'ގުޅިފަޅު ލޭންޑް ޔޫސް ޕްލޭން'ގެ ދަށުން އައިސްފައިވާ ބަދަލާ ގުޅިގެން ކުރިން ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން މިހާރުވަނީ ބަދަލުވެފައެވެ.
އެ ބަދަލާ ގުޅިގެން، ގޯތިތަކުގެ ވެރިފަރާތްތަކާއި، މިހާތަނަށް ގުޅީފަޅުން ގޯތި ހަވާލުކޮށްފައިވާ ފަރާތްތަކުގެ އިތުރުން، ގިރާވަޅު ފަޅުން ލިބުނު ގޯތިތައް ގުޅިފަޅަށް ބަދަލު ކުރަން އެދުނު ފަރާތްތަކުގެ ތެރެއިން ގުރުނަގައިގެން ގުޅިފަޅަށް ބަދަލުވެފައިވާ ފަރާތްތަކުގެ ގުރުނެގުން އަންގާރަ ދުވަހު އޮންނާނެ ކަމަށް މިނިސްޓްރީން ބުންޏެވެ.
އެ މިނިސްޓްރީން ވަނީ ގުޅިފަޅުން ގޯތި ދޫކުރާ އަދަދުތަކާއި ގޯތިތަކުގެ ބޮޑުމިން ހިއްސާކޮށްފައެވެ.
ގޯތިތަކުގެ ބޮޑުމިނާއި އަދަދުތައް:
- 1250 އަކަފޫޓުގެ 669 ގޯތި
- 1650 އަކަފޫޓުގެ 1234 ގޯތި
- 2050 އަކަފޫޓުގެ 916 ގޯތި
- 2450 އަކަފޫޓުގެ 473 ގޯތި
- 2850 އަކަފޫޓުގެ 158 ގޯތި
- 3250 އަކަފޫޓުގެ 49 ގޯތި
- 3650 އަކަފޫޓުގެ 21 ގޯތި
މިނިސްޓްރީން ބުނީ، ގުޅިފަޅުން ގޯތި ލިބޭ މީހުންގެ ގުރު ނެގުން ކުރިއަށް ގެންދާނީ މިނިސްޓްރީން އެކުލަވާލާފައިވާ ލިސްޓުތަކުގައިވާ ތަރުތީބުން ކަމަށެވެ.
އެގޮތުން، ހުރިހާ ގޯތިތަކުގެ ބޮޑުމިންތައް ވަކިކޮށް މިނިސްޓްރީން ވަނީ އެ ލިސްޓުތައް ގެޒެޓުގައި ޝާއިއުކޮށްފައެވެ.
އަންގާރަ ދުވަހު ގުރު ނަގާނީ ދަރުބާރުގެ ރަންނަ ބަނޑޭރި މާލަމުގައި ކަމަށްވާއިރު، ގުރު ނަގަން ފަށާނީ ހެނދުނު 9:00ގައެވެ.
ގުރު ނެގުމުގެ މާލަމަށް ބިން ލިބޭ ފަރާތުގެ ބަދަލުގައި އެހެން ފަރާތަކުން ހާޒިރުވާނަމަ ބިން ލިބޭ ފަރާތުގެ އިއުތިރާޒެއް ނެތް ކަމުގެ ލިޔުމާއި އައިޑީކާޑުގެ ކޮޕީ ހިފައިގެން ދިޔުމަށް މިނިސްޓްރީން ވަނީ އެދިފައެވެ.
އޭގެއިތުރުން، ގުރު ނަގައި ނިމުމުން، ގޯތިތަކުގެ ރަޖިސްޓްރީއާއި ބިން ލިބޭ ފަރާތްތަކާއެކު ވާ އެއްބަސްވުންތަކާ ގުޅޭ މަޢުލޫމާތު ފަހުން ހިއްސާކުރާނެ ކަމަށް ބުނެފައިވެއެވެ.
ނިމިދިޔަ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއެއް ކަމަށްވާ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. އެ ސްކީމްގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.