ޔުއޭފާ ޔޫރޮޕާ ލީގުގެ ލީގު ފޭސްގައި އިނގިރޭސި ޕްރިމިއާ ލީގުގެ ޓޮޓްނަމް ހޮޓްސްޕާއިން ޑަޗް އެރެޑިވިސީގެ އޭޒީ ބަލިކޮށްފިއެވެ.
ސްޕާސްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 1-0 އިންނެވެ.
އެންމެ ފަހުން ޕްރިމިއާ ލީގުގައި ވާދަކުރި ސްޕާސް ޓީމަށް ނުވަ ބަދަލު ގެނެސްގެން ނެރެފައިވާ ސްޕާސް ޓީމަށް އާލްކްމާގެ ޑިފެންސް ފޫއަޅުވާލުމުގައި ގިނަ ދަތިތަކެއް ކުރިމަތިވެގެންދިޔަކަން ފާހަގަވިއެވެ. ނަމަވެސް، މިއާއެކު ސްޕާސް ޓީމުންވަނީ ޒުވާން ހުނަރުވެރި ދެތިން ކުޅުންތެރިންގެ ގާބިލުކަން ވަރަށް ރަނގަޅަށް ފާހަގަވެގެން ގޮސްފައެވެ. މީގެ ތެރެއިން ވެސް މިކީ މޯގެ ކުޅުން ވަރަށް ބޮޑަށް ވަނީ ފާހަގަވެގެން ގޮސްފައެވެ.
މެޗުގައި ސްޕާސްގެ ކެޕްޓަންކަން ކުރި ޖޭމްސް މެޑިސަން ފާހަގަކުރި ގޮތުގައި އޭނާއަށް ހީވީ ނޭމާ ސްޕާސް ޓީމަށް ކުޅެމުން ދިޔަހެންނެވެ.
މެޗުގައި ސްޕާސްއިން ކާމިޔާބުކުރި ހަމައެކަނި ލަނޑު މެޗުގެ 53 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ އަނިޔާއިން އެނބުރި އައިސް ސްޕާސްގެ ފުރަތަމަ 11 ގައި ހިމެނިގެން މި ސީޒަންގައި ފުރަތަމަ މެޗު ކުޅެމުންދިޔަ ރިޗާލިސަންއެވެ. މި ޕެނަލްޓީ ޖެހުމާ އެކު މެޑިސަންއާއި ރިޗާލިސަންގެ މެދުގައި އެންމެ ފުރަތަމަ ހިޔާލު ތަފާތުވުންތަކެއް އުފެދުނު ނަމަވެސް ފަހުން މެޑިސަންވަނީ ރިޗާލިސަންއަށް ފުރުސަތު ދީފައެވެ.
މެޗުގެ 85 ވަނަ މިނެޓުގައި އާލްކްމާގެ ޑޭވިޑް މޮލާ ވުލްފާ އަށް ދެއްކި ރަތް ކާޑާ އެކު މެޗުގެ ފަހު ފަސް މިނެޓު އެ ޓީމުން ކުޅެފައިވަނީ އެއް ކުޅުންތެރިއެއް މަދުކޮށެެވެ.
މި ކާމިޔާބީއާއެކު ސްޕާސް މިހާރު އޮތީ ކުޅުން ތިން މެޗުން ލިބިފައިވާ ނުވަ ޕޮއިންޓާ އެކު ތާވަލުގެ އެއްވަނައިގައި އުޅޭ ލާޒިއޯއާ ފައިދާ ލަނޑުގެ ތަފާތުން ދެވަނައިގައެވެ. އާލްކްމާ އޮތީ ތިން ޕޮއިންޓާ އެކު ތާވަލުގެ 24 ވަނައިގައެވެ.