އެމެރިކާގެ ޓެކްނޮލޮޖީ ވިޔަފާރިވެރިޔާ, ދުނިޔޭގެ އެންމެ ބޮޑު މަހުޖަނު އީލޮން މަސްކް ވޯޓަރުންނަށް ފައިސާ ދިނުމަށް ހިންގަމުންދާ މިލިއަން ޑޮލަރު ގިވްއަވޭ ޕްރޮގްރާމަކީ ޤާނޫނާ ޚިލާފު ކަމެއް ކަމަށް ވެދާނެ ކަމަށް އެމެރިކާގެ ޖަސްޓިސް ޑިޕާޓްމަންޓުން އިންޒާރު ދީފިއެވެ.
މި ޕްރޮގްރާމުގެ ދަށުން، ރަޖިސްޓަރީ ކޮށްފައިވާ ވޯޓަރުންގެ ތެރެއިން ގުރުއަތުން ހޮވޭ މީހަކަށް ކޮންމެ ދުވަހަކު އެއް މިލިއަން ޑޮލަރު ދިނުމަށް ވަނީ ހަމަޖައްސާފައެވެ. މިއީ އެމެރިކާގެ ޤާނޫނުއަސާސީގެ ފުރަތަމަ އަދި ދެވަނަ އިސްލާހަށް ތާއީދުކުރާ ޕެޓިޝަނެއްގައި ސޮއިކުރާ ފަރާތްތަކަށް ދޭ ފައިސާއެކެވެ.
'ސީއެންއެން'އިން ރިޕޯޓުކޮށްފައިވާ ގޮތުގައި، މި ޕްރޮގްރާމަކީ އެމެރިކާގެ ފެޑެރަލް ޤާނޫނާ ޚިލާފު ކަމެއް ކަމަށް ވެދާނެ ކަމަށް ޖަސްޓިސް ޑިޕާޓްމަންޓުން އީލޮން މަސްކްގެ "އެމެރިކާ ޕީއޭސީ"އަށް ވަނީ އަންގައިފައެވެ.
ގާނޫނީ ބޭފުޅުން ވިދާޅުވާ ގޮތުން މިއީ ވޯޓު ގަތުމުގެ ޤާނޫނާ ޚިލާފު ޢަމަލެއް ކަމަށް ބައެއް ރިޕޯޓްތަކުގައި ބުނެފައިވެއެވެ.
އެމެރިކާގައި ވޯޓުލުމަށް، ވޯޓު ނުލުމަށް ނުވަތަ ވޯޓު ދިނުމަށް ރަޖިސްޓަރީ ކުރުމަށް ފައިސާ ދިނުމަކީ ޤާނޫނީ ގޮތުން މަނާާ ކަމެކެވެ. މި ޕްރޮގްރާމުގެ ސަބަބުން ވޯޓު ދިނުމަށް ރަޖިސްޓަރީ ކުރުމަށް ހިތްވަރު ލިބޭ ކަމަށް ބައެއް ފަރާތްތަކުން ދެކެއެވެ.
މީގެ އިތުރުން، ކުރީގެ ރިޕަބްލިކަން އޮފިޝަލުންތަކެއް ވަނީ އެޓާނީ ޖެނެރަލް މެރިކް ގާލަންޑަށް ސިޓީއެއް ފޮނުވައި މި މައްސަލަ ތަޙުޤީޤުކުރުމަށް އެދިފައެވެ. އެ ސިޓީގައި ބުނެފައިވަނީ މިފަދަ ކަމެއް ޒަމާނީ ސިޔާސީ ތާރީޚުގައި ފެނިފައިނުވާ ކަމަށެވެ.
އީލޮން މަސްކަކީ ކުރިން ވެސް އެކި ފަހަރު މަތިން ޤާނޫނީ ގޮންޖެހުންތަކާ ކުރިމަތިލާފައިވާ މީހެކެވެ. ނަމަވެސް، ގިނަ ފަހަރު އޭނާއަށް ވަނީ މައްސަލަތަކުން ސަލާމަތްވެފައެވެ.
ޤާނޫނީ ގޮތުން ބަލާއިރު، ވޯޓު ދިނުމަށް ރަޖިސްޓަރީ ކުރުމަށް ރައްޔިތުންނަށް ޤާނޫނާ ޚިލާފަށް ފައިސާ ދިން ކަމަށް ސާބިތުވެއްޖެނަމަ، އީލޮން މަސްކަށް 5 އަހަރުގެ ޖަލު ޙުކުމެއް އަތުވެދާނެއެވެ. ނަމަވެސް، ޖަސްޓިސް ޑިޕާޓްމަންޓުން މި ޕްރޮގްރާމް "ޤާނޫނާ ޚިލާފު ވެދާނެ" ކަމަށް ބުނެފައިވާތީ، މަސްކް މިކަމަށް މާ ބޮޑު ސަމާލުކަމެއް ދޭނެ ކަމަކަށް ނުބެލެވެއެވެ.