ކ. ހިންމަފުށީގައި ހުންނަ އައްސޭރި ޖަލުގައި ފުރަތަމަ ފަހަރަށް، މިއަދު މިސްކިތެއް ހުޅުވައިފިއެވެ.
އައްސޭރި ޖަލުގައި ގާއިމުކޮށްފައިވަނީ "މަސްޖިދުލް ޔޫސުފް"ގެ ނަމުގައި އަޅާފައިވާ މިސްކިތެކެވެ.
އެ ޖަލުގައި މިއަދު ބޭއްވި ރަސްމިއްޔާތެއްގައި މިސްކިތް ރަސްމީކޮށް ހުޅުވައިދެއްވީ، ރައީސް އޮފީހުގެ ޗީފް އޮފް ސްޓާފް އަބްދުﷲ ފަޔާޒެވެ. އަރިހުގައި ހޯމް މިނިސްޓަރު އަލީ އިހުސާން ވަނީ ބައިވެރިވެވަޑައިގެންފައެވެ.
މިއަދު ހުޅުވި މިސްކިތުގެ ހުރިހާ މަސައްކަތްތަކެއް ކޮށްފައިވަނީ ޖަލު އޮފިސަރުންގެ އިރުޝާދާއެކު ގައިދީންނެވެ. އަދި އެ މަސައްކަތުގައި އަމަލީގޮތުން ޖަލު އޮފިސަރުން ވެސް ބައިވެރިވެފައިވެއެވެ.
މީގެ ކުރިން އައްސޭރި ޖަލުގައި މިސްކިތެއް ނުހުންނައިރު ނަމާދުކުރަނީ އެކަމަށް ޚާއްސަކޮށްފައިވާ ކޮޓަރިއެއްގައެވެ.
މި ރަސްމިއްޔާތުގައި ވާހަކަދައްކަވަމުން ކޮމިޝަނާ އޮފް ޕްރިޒަންސް ހަސަން ޒަރީރު ވިދާޅުވީ މީގެ ކުރިން އެ ޖަލުގައި މިސްކިތެއް އަޅާފައި ނުވާއިރު، މިއީ ޖަލުތަކުގައި މަސައްކަތްކުރާ އޮފިސަރުންނާއި ޖަލުތަކުގައި ތިބޭ ގައިދީންނަށް ލިބޭ ފަޚުރެއް ކަމަށެވެ.
މިސްކިތެއް ނެތި ޖަލުގައި ކުރިއަށްގެންދާ ރިހެބިލިޓޭޝަން ޕްރޮގްރާމްތައް ވެސް އޭގެ އެންމެ ފުރިހަމައަށް ކުރިއަށް ނުގެންދެވޭކަން ކޮމިޝަނާ ފާހަގަކުރެއްވިއެވެ. އެގޮތުން ދީނީ އިލްމުވެރިން ވަޑައިގެން ގައިދީންނަށް ފިލާވަޅު ނަންގަވައިދިނުމަށް ވެސް މިސްކިތެއް ހުރުމުން ފަސޭހަވާނެ ކަމަށް ވިދާޅުވިއެވެ.
ޖަލަށް މިސްކިތެއް ބޭނުންވެފައި ތިއްބައި، އެކަމަށް އިސްކަމެއް ދެއްވައިގެން އެ މަސައްކަތް ނިންމަވައިދެއްވިކަމަށްޓަކައި ރައީސް ޑރ. މުހައްމަދު މުއިއްޒަށާއި އެ މަސައްކަތުގައި އުޅުއްވި އެހެން ފަރާތްތަކަށް ކޮމިޝަނާ ވަނީ ޝުކުރުއަދާކުރައްވާފައެވެ.
އައްސޭރި ޖަލުގައި "މަސްޖިދުލް ޔޫސުފް" ހުޅުވުމުގެ ރަސްމިއްޔާތުގައި ހޯމް މިނިސްޓަރު އަލީ އިހުސާން ވާހަކަދައްކަވަނީ -- ފޮޓޯ/ ހޯމް މިނިސްޓްރީ
މި ރަސްމިއްޔާތުގައި ވާހަކަދައްކަވަމުން ހޯމް މިނިސްޓަރު އިހުސާން ވިދާޅުވީ އިސްލާމް ދިން ގަބޫލުކުރާ ކޮންމެ ތަނެއްގައި ވެސް ކުރެވޭނެ އެންމެ މާތް ކަމަކީ މިސްކިތެއް ބިނާކުރުން ކަމަށެވެ. އެގޮތުން ޖަލުގައި ނަމާދުކުރުމަށްޓަކައި މިއަދު ހުޅުވި މިސްކިތާއެކު ޖަލު އޮފިސަރުންނާއި ގައިދީންނަށް ނަމާދުކުރުމަށްޓަކައި ފުރިހަމަ އިންތިޒާމެއް ހަމަޖެހިގެން ދިޔަކަން އިހުސާން ފާހަގަކުރެއްވިއެވެ.
"އަޅުގަނޑުގެ ދުއާއަކީ ކުރިއަށް އޮތް ތަނުގައި ވެސް މިފަދަ މާތް މަސައްކަތްތައް އަޅުގަނޑުމެންގެ ތެރެއިން ފެނިގެން ދިޔުން،" އިހުސާން ވިދާޅުވިއެވެ.
އެ މިސްކިތް ބިނާކުރުމަށްޓަކައި ގައިދީންނާއި، ޖަލު އޮފިސަރުންގެ އެހީތެރިކަން ލިބުނުކަމަށްޓަކައި އިހުސާން ވަނީ ޝުކުރުއަދާކުރައްވާފައެވެ.
މި ރަސްމިއްޔާތުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއާއި، ބަންޑާރަ ނައިބު އަހުމަދު އުޝާމްގެ އިތުރުން ބީއެމްއެލްގެ ޗެއާޕާސަން އަހުމަދު އަލީ ހަބީބު ވަނީ ބައިވެރިވެވަޑައިގެންފައެވެ.