ޔުއޭފާ ޗެމްޕިއަންސް ލީގުގެ ލީގު ފޭސްގައި އިނގިރޭސި ޕްރިމިއާ ލިގުގެ އެސްޓަން ވިލާއިން އިޓާލިއަން ސެރީއާގެ ބޮލޯނިއާ ބަލިކޮށް، ތާވަލުގެ އެއްވަނައަށް އަރައިފިއެވެ.
ވިލާގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-0 އިންނެވެ.
މެޗުގެ ފުރަތަމަ ލަނޑު މެޗުގެ 55 ވަނަ މިނެޓުގައި ވިލާއަށް ކާމިޔާބުކޮށްދީ މެޗުގެ ލީޑު އެ ޓީމަށް ނަގައިދިނީ ލިބުނު ހިލޭ ޖެހުމަކުން ކެޕްޓަން ޖޯން މެކްގިންއެވެ. އެ ޓީމުން މެޗުގައި ކާމިޔާބުކުރި ދެވަނަ ލަނޑު މެޗުގެ 64 ވަނަ މިނެޓުގައި ޖަހައިދިނީ ޖޯން ޑުރާނެވެ. މިއީ ވޭތުވެދިޔަ 11 މަސް ދުވަހުގެ ތެރޭގައި އޭނާ ވިލާގެ ފުރަތަމަ އެގާރައިގައި ހިމެނިގެން ކުޅުނު ފުރަތަމަ މެޗެވެ. މިއީ މިސީޒަންގައި އޭނާ ވިލާއަށް ކާމިޔާބު ކޮށްދިން ހަތްވަނަ ލަނޑެވެ.
މި ސީޒަންގައި ވިލާއިން މިހާތަނަށް ތިން މެޗު ޗެމްޕިއަންސް ލީގުގައި ކާމިޔާބުކޮށްފައިވާއިރު ތިން މެޗުން ލިބިފައިވާ ނުވަ ޕޮއިންޓާ އެކު އެ ޓީމު އޮތީ ތާވަލުގެ އެއްވަނައިގައެވެ. މި ތިން މެޗު ވެސް އެ ޓީމުން ކާމިޔާބުކޮށްފައިވަނީ ބައިކޮޅަށް ލަނޑެއް ވަނަ ނުދީއެވެ. ވިލާ ވެފައިވަނީ ފުރަތަމަ ތިން މެޗުގައި ބައިކޮޅަށް ލަނޑެއް ވަނަނުދީ ނިންމާލި ތިންވަނަ ޓީމަށެވެ.
މެޗުން ބަލިވުމުން ބޮލޯނިއާ އުޅެނީ އެއް ޕޮއިންޓާ އެކު ތާވަލްގެ 28 ވަނައިގައެވެ.
ޗެމްޕިއަންސް ލީގުގައި ސްޕެނިޝް ލަލީގާގެ ޖިރޯނާއާއި ސްލޮވާކް ސުޕާ ލީގާގެ ސްލޮވަން ބްރަޓިސްލާވާ ބައްދަލުކުރި މެޗު 2-0 އިން ކާމިޔާބުކޮށްފައިވަނީ ޖިރޯނާއެވެ.
މެޗުގައި ޖިރޯނާގެ ދެ ލަނޑު ކާމިޔާބު ކޮށްދީފައިވަނީ މިގުއެލް ގުތިއެރޭޒާއި ހުއާންޕޭއެވެ. މި ކާމިޔާބީއާ އެކު ޖިރޯނާ މިވަނީ މި ފަހަރުގެ މުބާރާތުގައި ފުރަތަމަ ފަހަރަށް މެޗަކުން މޮޅުވެފައެވެ. އެ ޓީމު މިހާރު އޮތީ ތިން ޕޮއިންޓާ އެކު ތާވަލުގެ 20 ވަނައިގައެވެ. އަދި، ބްރަޓިސްލާވާ އުޅެނީ ޕޮއިންޓެއް ނުލިބި 36 ޓީމު ހިމެނޭ މި ލީގުގެ އެންމެ ފުލުގައެވެ.