މާލޭގެ ކެފޭއެއްގެ ފުރާޅު މައްޗަށް މިރޭ ވެއްޓުނު މީހަކަށް ހޮސްޕިޓަލުގައި ފަރުވާ ދޭން ފަށައިފިއެވެ.
ފުލުހުން މީޑިއާތަކާ ހިއްސާކުރި މެސެޖެއްގައިވަނީ، މާފަންނު ޖޭޒް ކެފޭގެ ފުރާޅު މައްޗަށް މީހަކު ވެއްޓިގެން 23:14ހާއިރު ރިޕޯޓުކޮށްފައިވާ ކަމަށެވެ.
އެއީ 35 އަހަރުގެ ފިރިހެނެއް ކަމަށާއި އެމްއެންޑީއެފްގެ އެހީތެރިކަމާއެކު އޭނާ ނަގައިގެން އޭޑީކޭއަށް ގެންގޮސްފައިވާ ކަމަށް ފުލުހުން ބުންޏެވެ.
ފުލުހުން އަންނަނީ އެ މައްސަލަ ތަހުގީގު ކުރަމުންނެވެ. ނަމަވެސް، އެ މީހާ ވެއްޓެން މެދުވެރިވި ސަބަބާއި، އޭނާ ވެއްޓުނީ ކޮން އިމާރާތެއްގެ ކިތައް ވަނަ ފަންގިފިލާއިން ކަމެއް މިހާތަނަށް ހާމަކޮށްފައިނުވެއެވެ.
މާލޭގައި ހަދަމުން އަންނަ އިމާރާތްތަކުންނާއި، މީހުން ދިރިއުޅޭ އިމާރާތްތަކުގެ ބެލްކަނި ފަދަ ތަންތަނުން ވެސް މީގެ ކުރިން މީހުން ވެއްޓުމުގެ ހާދިސާތައް ހިނގައިފައިވެއެވެ.