މި ހަފުތާ ފަހުކޮޅު އަރާނެ ކަމަށް ބެލެވޭ ގަދަ ތޫފާނެއްގެ އިންޒާރާ އެކު އިންޑިއާގެ އިރުމަތީ ސްޓޭޓް އޮޑިޝާގެ ބައެއް ހިސާބުތަކުގެ ސްކޫލުތައް ބަންދުކުރުމަށް އަންގައިފިއެވެ. އަދި، ބީޗް ސިޓީ، ޕޫރީގައި ތިބި ފަތުރުވެރިން އެ ސަރަހައްދުން ދިއުމަށް ވެސް ވަނީ އަންގާފައެވެ.
މިހާރު ބޭ އޮފް ބެންގާލްގައި އޮތް ތޫފާން ދާނާ ވަރުގަދަވެ ގަޑިއަކު 120 ކިލޯމީޓަރު ނުވަތަ 74 މޭލަށް ވައިގަދަވާނެ ކަމަށް ބަލައި، ވަރުގަދަ ތޫފާނަކަށް ބަދަލުވެ، ބުރާސްފަތި ދުވަހުގެ އެ ސަރައްހައްދަށް އެރުމުގެ ފުރުސަތު ބޮޑު ކަމަށް މޫސުމާ ބެހޭ އޮފީހުން ބުނެއެވެ.
ޑިޒާސްޓާ މެނޭޖްމަންޓް ބަލަހައްޓާ ސްޕެޝަލް ރިލީފް ކޮމިޝަނަރުގެ އޮފީހުގެ އިސް އޮފިޝަލަކު ރޮއިޓާސްއަށް ވިދާޅުވީ، ބުދަ ދުވަހުން ފެށިގެން ހުކުރު ދުވަހުގެ ނިޔަލަށް 14 ޑިސްޓްރިކްޓެއްގެ ސްކޫލުތައް ބަންދުކުރާނެ ކަމަށާއި، މަސްވެރިން ކަނޑަށް ނުނިކުތުމަށް ވެސް އަންގާފައިވާ ކަމަށެވެ.
ތޫފާން އެރުމުގެ ކުރިން އެ ސަރަހައްދުގެ ސަލާމަތީ ކަންކަމާބެހޭ އޮފިޝަލުން މިހާރު ވެސް ތިބީ ތައްޔާރުވެ ކަމަށް ބޭރުގެ މީޑިއާތަކުން ރިޕޯޓުކުރެއެވެ.
ކުރިއަށް އޮތް ތިން ދުވަހު އޮޑިޝާއަށް ބޯކޮށް ވާރޭވެހުމުގެ ފުރުސަތު ބޮޑު ކަމަށާއި ތޫފާނުގެ ސަބަބުން ގެތަކާއި މަގުތަކާއި ދަނޑުވެރިކަމަށާއި ކަރަންޓް ލައިންތަކަށް ގެއްލުން ލިބި ފެންބޮޑުވެ ބިންގަނޑު ކަނޑައިގެން ދިއުން އެކަށީގެންވާ ކަމަށް ވެސް މޫސުމާ ބެހޭ އޮފީހުން ބުނެއެވެ.
އޮޑިޝާއަކީ ތޫފާން އަރާ ސަރަހައްދެއް ނަމަވެސް އެ ސަރަހައްދު މިހާރު ވަނީ ވަރަށް ބޮޑަށް ކާރިސާތަކަށް ތައްޔާރުވެފައެވެ.