ދަރިވަރުންގެ އުމުރާ ނުގުޅޭ ވާހަކަދައްކައިގެން، ގްރޫމްކުރަން އުޅުނުކަމަށް ތުހުމުތުކުރެވޭ ޓީޗަރެއްގެ މައްސަލަ ފުލުހުން ތަހުގީގުކުރަން ފަށައިފިއެވެ.
މިއަދު މީޑިއާތަކާ ހިއްސާކުރި މައުލޫމާތެއްގައި ފުލުހުން ބުނީ، މި މައްސަލަ ފެންމަތިވެފައިވަނީ ދެކުނުން މެދުރާއްޖެތެރޭ އަތޮޅުތަކުގެ ރަށެއްގައި ކަމަށެވެ.
އެއީ މ، ފ، ދ، ތ، ލ. އަތޮޅު ހިމެނޭ ޒޯނެވެ.
ފުލުހުން ބުނި ގޮތުގައި ކުދިން ގްރޫމްކުރަން އުޅުނުކަމުގެ ތުހުމަތުކުރެވެނީ ފިރިހެން ޓީޗަރަކަށެވެ. ނަމަވެސް އެއީ ދިވެއްސެއްތޯ ނުވަތަ ބޭރު މީހެއްތޯ ކަށަވަރުނުކޮށްދެއެވެ.
ފުލުހުން ބުނި ގޮތުގައި މި މައްސަލަ ރިޕޯޓުކޮށްފައިވަނީ މި މަހުގެ 17ވަނަ ދުވަހެވެ.
މިއީ ކުޑަކުދިންނާ ގުޅުންހުރި މައްސަލައެއް ކަމުން މިކަމުގެ އިތުރު ތަފްސީލު ފުލުހުން ހާމަނުކުރެއެވެ. އަދި ކުއްޖާއާ ގުޅުންހުރި ތަފްސީލް ވެސް ހާމަ ނުކުރެއެވެ.
މީގެކުރިން ވެސް ޓީޗަރުންގެ ފަރާތުން ދަރިވަރުން ގްރޫމްކުރުމާއި، ޖިންސީ ގޯނާ ކުރުން ފަދަ ސީރިއަސް މައްސަލަތައް ރާއްޖޭގައި ފެންމަތިވެފައި އެބަހުއްޓެވެ.