މިދިޔަ މަހު ޖަރުމަނުގައި މަރުވި ދިވެހި ފިރިހެނެއްގެ މައްޗަށް، އޭނާގެ އަނބިމީހާ މަރާލިކަމުގެ ތުހުމަތުކޮށްފައިވާ ކަމަށް ޖަރުމަނުގެ ނޫހަކުން ރިޕޯޓުކޮށްފިއެވެ.
"ސަން"އަށް މައުލޫމާތު ލިބިފައިވާ ގޮތުގައި މަރުވެފައި ވަނީ ނ. މަނަދުއަށް ނިސްބަތްވާ، 44 އަހަރުގެ އާދަމް ނަސީރެވެ. އޭނާ ޖަރުމަނުގެ އަންހެނަކާ ކައިވެނިކޮށްގެން އެގައުމުގައި އުޅޭތާ ގާތްގަނޑަކަށް 15 އަހަރުވެފައިވާ ކަމަށް ވެސް މައުލޫމާތު ލިބިފައިވެއެވެ.
ޖަރުމަނުގެ 'ޓެގް24' ނޫހުގައިވާ ގޮތުން، ނަސީރާއި އޭނާގެ އަނބިމީހާ ދިރިއުޅެމުން އައީ ސެންޓްރަލް ސަކްސަނީ ޑިސްޓްރިކްޓުގެ ޖަހުނަތަލްގައެވެ.
ފުލުހުންނާ ހަވާލާދީ އެ ނޫހުގައިވާ ގޮތުން މިދިޔަ މަހުގެ 21ގައި އެދެމަފިރިންގެ މެދުގައި ހަމަނުޖެހުމެއް ވަނީ ހިނގައިފައެވެ. އޭގެ ފަހުން އެ ގެއަށް އަންހެން މީހާގެ އާއިލާގެ ބަޔަކު ދިޔައިރު އޭނާ މަރުވެފައި އޮއްވައި ފެނުނު ކަމަށް އެ ނޫހުގައިވެއެވެ.
ނަސީރު ވެސް އެ ގެއިން ފެނުނީ ބޮޑެތި ޒަޚަމްތަކަކާ އެކު ކަމަށާއި އެއާއެކު ފުލުހުން އޭނާ ހޮސްޕިޓަލަށް ގެންދިޔަ ކަމަށް ޓެގް24ގައިވެއެވެ. ނަމަވެސް މިދިޔަ މަހުގެ 27ގައި ނަސީރު މަރުވެފައިވާ ކަމަށް ފުލުހުންނާ ހަވާލާދީ އެ ނޫހުގައިވެއެވެ.
ނަސީރު މަރުވުމުގެ ކުރިން އޭނާ ހައްޔަރުކުރަން ޕްރޮސެކިއުޓަރުން އަމުރަކަށް އެދުނު ކަމަށް ވެސް އެ ނޫހުގައިވެއެވެ. އަދި އޭނާގެ ހަށިގަނޑުގެ އޮޓޮޕްސީއެއް ހަދަން ނިންމައިފައިވާ ކަމަށް ވެސް ޓެގް24ގައިވެއެވެ.
އެ ނޫހުގައިވާ ގޮތުން ނަސީރުގެ މައްޗަށް ތުހުމަތު ކުރަނީ އަނބިމީހާ މަރުވުމަށް މަގުފަހިވި ހަމަލާ ދިން ކަމަށެވެ. އަދި އޭނާގެ ހަށިގަނޑުން ފެނުނު ޒަޚަމްތަކަކީ އަމިއްލައަށް ދީފައިވާ އަނިޔާތައް ކަމަށް ވެސް އިންވެސްޓިގޭޓަރުން ތުހުމަތު ކުރާ ކަމަށް ޓެގް24ގައިވެއެވެ.
އެ މައްސަލައާ ބެހޭ ގޮތުން މިހާތަނަށް ފޮރިން މިނިސްޓްރީގެ ބަހެއް ލިބިފައެއް ނުވެއެވެ.
މަނަދޫއިން ނަސީރުގެ އާއިލާގެ މެންބަރަކު "ސަން"އަށް ބުނި ގޮތުގައި، މިދިޔަ ހަފުތާގައި އެ މިނިސްޓްރީން ވަނީ ނަސީރާއި އަނބިމީހާއާ ދެމެދު ހަމަނުޖެހުމެއް ހިނގައި ދެ މީހުން ވެސް ނިޔާވެފައިވާ ކަމަށް އާއިލާއަށް އަންގައިފައެވެ.
ނަމަވެސް ނަސީރުގެ ހަށިގަނޑު އާއިލާއާ ހަވާލުކުރުމާ ގުޅޭ ގޮތުންނާއި އިތުރު މައުލޫމާތު ހިއްސާކޮށްފައިނުވާ ކަމަށް އޭނާ ބުންޏެވެ.