އަންނަ އަހަރު އެމެރިކާގައި ބާއްވާ ފިފާ ކްލަބް ވޯލްޑް ކަޕް މުބާރާތުން އެންމެ ފަހު ޖާގަ އެމެރިކާގެ މޭޖާ ލީގު ސޮކާގެ އިންޓާ މައޭމީން ހޯދައިފިއެވެ.
އިންޓާ މައޭމީއަކީ އާޖެންޓީނާގެ ކެޕްޓަން އަދި ގިނަ ބަޔަކު ގަބޫލުކުރާ ގޮތުގައި ދުނިޔޭގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ ލިއޮނެލް މެސީ ކުޅޭ ޓީމެވެ.
ޖުމުލަ 32 ޓީމަށް އިތުރު ކޮށްގެން ފީފާއިން ބާއްވާ މި މުބާރާތް އޮންނާނީ އަންނަ އަހަރުގެ ޖޫން 15 އިން ޖުލައި މަހުގެ ތިންވަނަ ދުވަހުގެ ނިޔަލަށެވެ. މުބާރާތުގައި ވާދަކުރާނީ ޔޫރަޕަށް ނިސްބަތްވާ 12 ޓީމާއި ދެކުނު އެމެރިކާގެ ހަ ޓީމާއި އޭޝިއާ، އެފްރިކާ އަދި އުތުރު އެމެރިކާއަށް ނިސްބަތްވާ 12 ޓީމުގެ އިތުރުން އޯޝޭނިއާ ސަރަހައްދުން އެއް ޓީމާއި އަދި މުބާރާތް ބާއްވާ އެމެރިކާގެ އެއް ޓީމެވެ. އިންޓާ މައޭމީއަށް ލިބުނީ އެމެރިކާއަށް ޚާއްސަކުރި ޖާގައެވެ.
އިންޓާ މައޭމީއަށް މި ފުރުސަތު ލިބުނީ މި ފަހަރު އެމްއެލްއެސް ސަޕޯޓާސް ޝީލްޑް ކާމިޔާބުކޮށްފައިވުމުންނެވެ. މި ޝީލްޑަކީ ރެގިއުލާ ސީޒަންގައި އެންމެ ގިނަ ޕޮއިންޓް ހޯދާ ޓީމަށް ލިބޭ ޝީލްޑެވެެ. މި ސީޒަންގައި އިންޓާ މައޭމީން ވަނީ އެމްއެލްއެސްގެ ރެގިއުލާ ސީޒަންގައި ކުރިން އެއްވެސް ޓީމަކަށް ނުހޯދޭ ވަރަށް ޕޮއިންޓް ހޯދާ އާ ރިކޯޑެއް ގާއިމުކޮށްފައެވެ.
ފީފާގެ ރައީސް ޖިއާނީ އިފަންޓީނޯ ބުނީ، އިންޓާ މައޭމީން އެމެރިކާގައި އެ ޓީމަކީ އެއް ފެންވަރެއްގައި ރަނގަޅު ކުޅުމެއް މުޅި ސީޒަންގައި ދެއްކިދާނެ ޓީމެއްކަން ސާބިތު ކޮށްދީފައިވާ ކަމަށެވެ.
އެ ޓީމަށް ކުޅޭ ފާހަގަކޮށްލެވޭ ކުޅުންތެރިންގެ ތެރޭގައި ސާޖިއޯ ބުސްކެޓްސް، ޖޯޑީ އަލްބާ އަދި ލުއިސް ސުވަރޭޒް ހިމެނެއެވެ.
ކްލަބް ވޯލްޑް ކަޕުން މިހާރު ޖާގަ ހޯދާފައިވާ ކްލަބްތަކުގެ ތެރޭގައި ޔޫރަޕްގެ މެންޗެސްޓާ ސިޓީ، ޗެލްސީ، ރެއާލް މެޑްރިޑް، ބަޔޭން މިޔުނިކް، ޕެރިސް ސެއިންޓް ޖާމެއިން، އިންޓާ މިލާން، ޕޯޓޯ އަދި ބެންފީކާ ހިމެނެއެވެ.
މުބާރާތުގެ 32 ވަނަ މަގާމު ލިބޭނީ މި އަހަރުގެ ކޮޕާ ލިބެޓަޑޯރެސް ކަޕް ކާމިޔާބުކުރާ ޓީމަކަށެވެ.
މުބާރާތުގެ މެޗުތައް އެމެރިކާގެ އަށް ދަނޑެއްގައި ކުޅެން ހަމަޖެހިފައިވާއިރު އޭގެ ތެރޭގައި އިންޓާ މައޭމީގެ ހާޑް ރޮކް ސްޓޭޑިއަމް ވެސް ހިމެނެއެވެ. ފައިނަލް މެޗު ކުޅެން ހަމަޖެހިފައިވަނީ ނިއު ޖާޒީގެ މެޓްލައިފް ސްޓޭޑިއަމްގައެވެ.
މުބާރާތުގައި ވާދަކުރާ ޓީމުތަކުގެ އަދަދު 32 އަށް ފީފާއިން އިތުރުކުރުމާ ގުޅިގެން ބައެއް ފަރާތްތަކުގެ ހިތްހަމަނުޖެހުން ވެސް އަންނަނީ ފާޅު ކުރަމުންނެވެ. ނަމަވެސް، މި ހިތްހަމަނުޖެހުން އަންނަނީ ފާހަގަ ކުރެވިފައިވާގޮތުގައި ޔޫރަޕުން އެކަންޏެވެ.
ކްލަބް ވޯލްޑް ކަޕްގެ ގުރުއަތުލުން ބޭއްވުމަށް ހަމަޖެހިފައިވަނީ ޑިސެމްބަރު މަހުއެވެ.