މިހާރު ގާއިމުކުރަމުންދާ ވަގުތީ ފެންހިންދާ ނިޒާމާއެކު މާލޭގެ މަގުތައް ރަނގަޅު ފެންވަރަކަށް ހެދެންދެން, ރައްޔިތުންނަށް ފޯރާ ދަތިތައް ކުޑަވާނެ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
މާލެއަށް ވާރޭ ވެހޭއިރު ބޮޑަށް ފެންބޮޑުވެ، ގެތަކަށް ގެއްލުންވާ ސަރަހައްދުތަކުގައި ފެން ޕަމްޕުތައް ގާއިމުކުރުމުގެ މަސައްކަތް މި ސަރުކާރުން ވަނީ ފަށާފައެވެ.
އެކްސްގައި އިންފްރާސްޓްރަކްޗާ މިނިސްޓްރީން މިއަދު ކުރި ޕޯސްޓެއްގައި މިނިސްޓަރު މުއްތަލިބު ވިދާޅުވީ މާލޭގެ ވެސްޓް ޕާކާއި، އައިޖީއެމްއެޗް ހިމެނޭ ސަރަހައްދުގައި ފެން ބޮޑުވެ އާންމު ދިރިއުޅުމަށް ދަތިވެ، ބައެއް ގެތަކަށް ގެއްލުން ލިބޭތީ މާލޭގެ މަގުތައް ރަނގަޅު ފެންވަރަކަށް ހެދެންދެން ވަގުތީ ގޮތުން އެކަން ހައްލު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަންގަވާފައިވާ ކަމަށެވެ.
މާލޭގައި ހަދާ ވަގުތީ ފެން ހިންދާ ނިޒާމުތައް --
އެކަމުގައި ޑިފެންސް މިނިސްޓްރީން އިސްވެ އިންފްރާސްޓްރަކްޗާ މިނިސްޓްރީގެ ބައިވެރިވުމާއެކު ރޯޑް ޑިޕެލޮޕްމަންޓް ކޯޕަރޭޝަން (އާރުޑީސީ) އާ އެ މަސައްކަތް ހަވާލުކުރީ މެއި މަހުގެ 10ގައި ކަމަށް މިނިސްޓަރު ވިދާޅުވިއެވެ. އަދި މިހާތަނަށް އެ މަޝްރޫއުން ނިމިފައިވަނީ އެއް ބައި ކަމަށް ވިދާޅުވިއެވެ.
"މި ކުރެވޭ މަސައްކަތުން ފެންބޮޑުވާ މައްސަލައަށް އެއްކޮށް ހައްލު ނުލިބުނު ނަމަވެސް މާލޭގެ މަގުތައް ރަނގަޅު ފެންވަރަކަށް ހެދެންދެން ރައްޔިތުންނަށް ފޯރާ ދަތިތައް ކުޑަކުރެވި ޕަންޕު ބޭނުންކޮށްގެން ފެން ހިންދުމަށް ފަސޭހަވެގެންދާނެ،" މިނިސްޓަރު މުއްތަލިބު ވިދާޅުވިއެވެ.
ޕީއެސްއެމްގެ 'ރާއްޖެ މިއަދު' ޕްރޮގްރާމްގައި ވާހަކަދައްކަވަމުން އިންފްރާސްޓްރަކްޗާ މިނިސްޓްރީގެ ސްޓޭޓް މިނިސްޓަރު އިބްރާހީމް ނަސީމް ވިދާޅުވީ ފެން ހިންދުމަށް ޓަކައި ވަރަށް ބޮޑެތި ޓޭންކުތަކެއް މާލޭގެ އެއްގަމު ތޮށްޓާއި ވީ ދިމާލުގައި ގާއިމުކުރެވިފައިވާނެ ކަމަށެވެ.
އެގޮތުން ވެސްޓުޕާކު ސަރަހައްދާއި، ތާޖުއްދީން ސްކޫލް ކައިރިއާއި، ބޮޑުތަކުރުފާނު މަގުގެ އިތުރުން ވިލިމާލެ ފެރީ ޓާމިނަލް ކައިރީ އެ މަސައްކަތް ކޮށްފައިވާ ކަމަށް ނަސީމް ވިދާޅުވިއެވެ.
މާލޭގައި ހަދާ ވަގުތީ ފެން ހިންދާ ނިޒާމުތައް --
"އަމީނީ މަގުގައި ހުރި ފެންހިނދާ ސްޓޯމްވޯޓާ ނިޒާމުގައި ހުރި ޕަމްޕުތައް މިވަނީ އެއްކޮށް ބަދަލުކުރެވިފައި. އެގޮތުން މިހާރު ކުޑަކުދިން ޕާކު ސަރަހައްދުގައި ހުރި ޕަމްޕާއި، އަހުމަދިއްޔާ ސްކޫލް ކައިރީ ޕާކިން ޒޯނުގައި އިން ޕަމްޕާއި، ސްޓޭޑިއަމް ކައިރީ އިން ޕަމްޕު މިވަނީ އެއްކޮށް ބަދަލުކުރެވި އާކުރެވިފައި،" ނަސީމް ވިދާޅުވިއެވެ.
އޭނާ ވިދާޅުވި ގޮތުގައި ކުރިން އެ ތަންތަނުގައި ހުރީ ނުވަ ކިލޯވޯޓުގެ ޕަމްޕުތަކެކެވެ. ނަމަވެސް މިހާރު 20 ކިލޯވޯޓްގެ ދެ ޕަމްޕް ކޮންމެ ތަނެއްގައި ގާއިމުކޮށްފައިވާކަމަށް އޭނާ ވިދާޅުވިއެވެ.
"މިހާރު ކުރާ ވިއްސާރައިގައި އެކަމުގެ އެދެވޭ ނަތީޖާ އެބަ ފެނޭ. ހަގީގަތުގައި މިއީ މި މަސައްކަތުގެ އެއްބައި،" ނަސީމް ވިދާޅުވިއެވެ.
އެ މިނިސްޓްރީން ބުނިގޮތުގައި މި މަސް ނިމުމުގެ ކުރިން މާލޭގައި އެންމެ ފެން ބޮޑުވާ ސަރަހައްދުތަކުގައި ގާއިމުކުރާ ވަގުތީ ފެން ހިންދާ ނިޒާމުތައް ގާއިމުކުރުމުގެ މަސައްކަތް ނިންމޭނެކަމަށް ލަފާކުރެވެއެވެ.
މާލެއަށް މޫސުން ގޯސްވެ، ބޯކޮށް ވާރޭވެހޭ ދުވަސްވަރަށް މަގުތަކުގައި ފެން ވަރަށް ބޮޑަށް ފެންބޮޑުވެއެވެ. އެ ކަމުގެ ސަބަބުން ރައްޔިތުންނަށް ގިނަ ދަތިތަކާ ކުރިމަތިލާން ޖެހެއެވެ.