ރ. ހުޅުދުއްފާރަށް އުފަން މުހައްމަދު ނިޝާމްގެ މަރަށް އަށް އަހަރުވެފައި ވާއިރު، މިއަދު ފޭސްބުކްގައި ގިނަ ބައެއްގެ ސަމާލުކަން ހޯދާފައި ވަނީ އޭނާގެ ކުޑަ ދަރިފުޅު ގުރުއާން ކިޔަވާ ވީޑިއޯއަކަށެވެ.
ނިޝާމްގެ ދަރިފުޅު ޔޫނުސް ރީތި ރާގަކަށް ގުރުއާން ކިޔަވާއިރު، އަޑު އަހާލަން ހިތްގައިމެވެ. ނަމަވެސް، މި ވީޑިއޯ ގިނަ ބައެއްގެ ސަމާލުކަމަށް އައީ ފޭސްބުކްގައި ވީޑިއޯ ހިއްސާކުރި ހާތިމް ޔޫސުފް ލިޔެފައިވާ އަސަރުގަދަ ލިޔުންކޮޅުގެ ސަބަބުންނެވެ.
ޔޫނުސަށް ނޭންގުނު ނަމަވެސް، އެ ވީޑިއޯގައި ޔޫނުސް ކިޔަވަމުން އެދަނީ އޭނާގެ ބައްޕަ އެރަށު މިސްކިތުގައި އިމާމުވެ ނަމާދުކުރި އިރު އަބަދު ވެސް ކިޔަވާ އާޔަތް ކަމަށް އެމީހާ ލިޔެފައި ވެއެވެ. އެއީ ފުއްޞިލަތް ސޫރަތުގެ 19 ވަނަ އާޔަތުން 24ވަނަ އާޔަތާ ހަމައަށެވެ.
ވީޑިއޯ ހިއްސާކުރި މީހާ ވަނީ ނިޝާމް އިމާމުވެ ނަމާދުކުރުމުގެ ހަނދާންތައް އާކޮށްފައެވެ. އެގޮތުން އޭނާއަކީ ވެސް އެ މިސްކިތުގައި އިމާމުވެ ނަމާދުކުރި މީހެއް ކަމަށާއި ސަފުން ނިޝާމް ފެނުމުން އިމާމުވެ ނަމާދުކުރަން ނިޝާމް ގާތު އެދޭކަމަށް އޭނާ ލިޔެފައި ވެއެވެ.
އަދި މިފަދައިން އެދިގެން ނިޝާމް އިމާމުވެ ނަމާދުކުރާ އިރު، އޭނާ އެންމެ ކިޔަވާހިތުން ކިޔަވާ އާޔަތަކީ މިއީކަން ފޭސްބުކް ޕޯސްޓުގައި އެމީހާ ލިޔެފައި ވެއެވެ.
މި އާޔަތްތައް އަޑު އިވުމުން އެ ހަނދާންތައް އަބަދު ވެސް އާވާކަމަށް އޭނާ ލިޔެފައި ވެއެވެ. އަދި މިއަދު ޔޫނުސް މި އާޔަތްތައް ގުރުއާން މުބާރާތުގައި ކިޔަވާ އަޑު އިވުމުން ހައިރާންވިކަމަށް އޭނާ ލިޔެފައި ވެއެވެ.
"ޔޫނުސް ކުޑަ ނަމަވެސް، ޔޫނުސްގެ އަޑުގައި ބައްޕަގެ ކިޔެވުމުގައި ހުންނަ ކަހަލަ އެއްގޮތް ކަންތައްތައް ހުރޭ. ޔޫނުސްގެ ކިޔެވުމުގެ ތެރެއިން ބައްޕަގެ ލެގަސީ ދިރުވައިދޭކަމުގެ އިހުސާސް ކުރެވޭ،" އަސަރާ އެކު އޭނާ ލިޔެފައި ވެއެވެ.
މި ޕޯސްޓުވީ އެތައް ބަޔަކަށް އަސަރު ކުރުވި އަސަރުގަދަ ޕޯސްޓަކަށެވެ.
އުމުރުން 31އަހަރުގައި ކުއްލި މަރަކުން ނިޝާމް މަރުވީ 2016ވަނަ އަހަރުގެ ސެޕްޓެމްބަރު 24ވަނަ ދުވަހުއެވެ. އޭރު ޔޫނުސްގެ އުމުރުން ތިން އަހަރެވެ.
އޭނާ މަރުވީ ފުޓުބޯޅަ ކުޅެން ގޮސް ހުއްޓައި ކުއްލިއަކަށް ނޭވާލާން އުނދަގޫ ވެގެންނެވެ. ނިޝާމަކީ ހުޅުދުއްފާރު އެންމެންގެ ލޯބި ހޯދާފައިވާ މީހެކެވެ.
ނިޝާމް ވަނީ ފޭސްބުކްގައި ވެސް "ވާހަކަ ކިޔައިދޭ ރަހުމަތްތެރިޔާ"ގެ ނަމުގައި އެތައް ބައެއްގެ ލޯބި ހޯދާފައެވެ. އޭނާ ވަނީ ފޭސްބުކް ޕޭޖުގައި ދީނީ އިބުރަތްތެރި އެތައް ވާހަކަތަކެއް އާންމުންނާ ހަމައަށް ގެނެސްދީފައެވެ.