އެމެޒޯނުން އެއްތަނުން އަނެއްތަނަށް ގެންދެވޭ މޯބައިލް ގެތައް ވިއްކަނީ

އެމެރިކާގެ އޮންލައިން ވިޔަފާރި ވެބްސައިޓް އެމެޒޯނުން މިހާރު އެއްތަނުން އަނެއްތަނަށް ގެންދެވޭ ކުދި ގެތައް ވިއްކަން ފަށައިފިއެވެ.

މި ގެތަކުގެ ތެރެއިން ވެސް އެންމެ ބޮޑު ސަމާލުކަމެއް ލިބިފައިވަނީ ނޮމަޑްނެސްޓް ކުންފުނިން ތައްޔާރުކޮށްފައިވާ ޒަމާނީ ކުޑަ ގެއަކަށެވެ.

ނޮމަޑްނެސްޓްގެ މި ގޭގައި ހުންނަނީ 3 ކޮޓަރިއެވެ. 400 އަކަފޫޓުގެ ބޮޑުމިނުގައި ހުންނަ މި ގޭގައި ބަދިގެއާއި، ސިންޓިންރޫމަކާއި އަދި ފުރިހަމަ ފާޚާނާއެއް ހިމެނެއެވެ. މީގެ އިތުރުން ގޭގެ މަތީ ބައިގައި ދެ ލޮފްޓް (ހުޅުވާލެވިފައިވާ އިތުރު ޖާގަ) ހުރެއެވެ. މި ލޮފްޓްތައް އޮފީސް ޖާގައެއްގެ ގޮތުގައި ނުވަތަ ތަކެތި ރައްކާކުރާ ގުދަނެއްގެ ގޮތުގައި ނުވަތަ އިތުރު ނިދާ ކޮޓަރިތަކެއްގެ ގޮތުގައި ބޭނުންކުރެވިދާނެއެވެ.

މި ގެ ފަރުމާކޮށްފައިވަނީ ގުދުރަތީ މާޙައުލުން ސާފުވަޔާއި، ހިތްހަމަޖެހުން ލިބިދޭ ގޮތަށެވެ. ގިނަ ކުދި ދޮރުތަކެއް ހުރުމުން ގެ އަށް ގުދުރަތީ އަލިކަން ވަދެއެވެ. އަދި މި ގޭގައި ވޮޝިންގ މެޝިނާއި ޑްރަޔަރ ބެހެއްޓޭ ވަރުގެ ޖާގަ ވެސް ހުރެއެވެ.

އެމެޒޯނުން ވިއްކާ ޕޯޓަބަލް ގެއެއްގެ އިންޓީރިއާ ޑިޒައިން -- ފޮޓޯ: އެމެޒޯން

މިއީ ފަތުރުވެރިކަމަށް، ނުވަތަ ދާއިމީ ދިރިއުޅުމަށް، ނުވަތަ މަންމަގެ ނުވަތަ ބައްޕަގެ ކޮޓަރިއެއްގެ ގޮތުގައި ވެސް ބޭނުންކުރެވިދާނެ ގެއެކެވެ. މި ގެއަކީ ފަސޭހައިން އެއްތަނުން އަނެއް ތަނަށް ގެންދެވޭގޮތަށް ހަދާފައިވާ ގެއެކެވެ. 30 ފޫޓު ދިގު، 8.5 ފޫޓު ފުޅާ މި ގޭގައި ހަ މީހުންނަށް ނިދޭނެ ޖާގަ ހުރެއެވެ.

ނޮމަޑްނެސްޓްގެ މި ގޭގެ އަގަކީ 100،000 އެމެރިކާ ޑޮލަރެވެ. ނަމަވެސް އެމެޒޯނުން މިފަދަ އެހެން ކުދި ގެތައް 50،000 ޑޮލަރަށްވުރެ ހެޔޮ އަގުގައި ވެސް ލިބެން ހުރެއެވެ. މީގެ ތެރޭގައި ހިމެނެނީ ކެޕްސިއުލް ސްޓައިލް ސްމާޓް ހޯމްއާއި، އިތުރަށް ބޮޑުކޮށް ހަދާފައިވާ ޒަމާނީ ކުދި ގެތަކެވެ.

މި ގެތައް މިހާރު ވަނީ އެމެޒޯން ވެބްސައިޓުން އޯޑަރު ކުރެވޭނެއެވެ. މިއީ ކުޑަ ޖާގައެއްގައި ދިރިއުޅެން ބޭނުންވާ މީހުންނަށް ލިބުނު ފަސޭހަ ފުރުޞަތެއް ކަމުގައި ބެލެވެއެވެ.