ޓެސްލާއިން އަލަށް އުފެއްދި އެ ކުންފުނީގެ އޮޓޮނޮމަސް ދެ ވެހިކަލް ކަމުގައިވާ ސައިބަކެބް އަދި ރޮބޯވެން ދައްކާލައިފިއެވެ.
ހުކުރު ޔޫކޭގައި ބޭއްވުނު ޓެސްލާގެ "ވީ، ރޮބޮޓް" އިވެންޓުގައި ދައްކާލި މި ދެ ވެހިކަލަކީ ދެ މީހުންނަށް އެރޭގޮތަށް ތައްޔާރުކޮށްފައިވާ "ސައިބަކެބް" އާއި 20 މީހުންނަށް އެއްފަހަރާ ދަތުރުކުރެވޭ ގޮތަށް ތައްޔާރުކޮށްފައިވާ "ރޮބޯވެން" އެވެ.
ސައިބަކެބަކީ އަމިއްލައަށް ދުއްވާ ޓެކްސީއެކެވެ. ނަމަވެސް، ގިނަ ބަޔަކު ހައިރާންވީ ކުއްލިއަކަށް ތަޢާރަފުކުރި ރޮބޯވެން އަށެވެ. މި 20 ގޮނޑީގެ ބަހަކީ މުސްތަޤުބަލްގެ ތަޞައްވުރެކެވެ. ޓެސްލާގެ ސީއީއޯ އެލޮން މަސްކް ވިދާޅުވި ގޮތުގައި މި އުޅަނދު ބޭނުންކުރެވޭނީ ކުޅިވަރު ޓީމުތައް ފަދަ ބޮޑެތި ގްރޫޕުތައް އުފުލުމަށާއި މުދާ އުފުލުމަށެވެ.
ރޮބޯވޭންގެ ސްލައިޑިން ދޮރާއި، ޚާއްޞަ އިންޓީރިއާ ޑިޒައިން ---
ރޮބޯވެންގެ ޚާއްޞަ ސިފަތަކުގެ ތެރޭގައި ބިއްލޫރި ސްލައިޑިންގ ދޮރުތަކާއި، އެތެރޭގައި ސީޓްތައް އެރޭންޖްކޮށްފައިވާ އާދަޔާ ޚިލާފު އިންޓީރިއާ ޑިޒައިނެވެ. އަދި މި އުޅަނދުގައި ސްޓިއަރިންގ ވީލެއް ނުހުންނާނެއެވެ. ފޮޓޯތަކުގައި ރޮބޯވެންގެ ފުރޮޅުތައް ނުފެންނާތީ، މި އުޅަނދުގައި ދަތުރުކުރާއިރު، ކުރެވޭނީ ބިމުގައި ނުޖެހި ދުއްވާ އުޅަނދެއް ފަދަ އެއްޗެއްގެ އިހުސާސެވެ.
މަސްކް ވިދާޅުވީ މަގުމަތީގެ މަންޒަރު ބަދަލުކުރުމަކީ ޓެސްލާގެ އަމާޒެއް ކަމަށެވެ. "އަޅުގަނޑުމެން ބޭނުންވަނީ މުސްތަޤުބަލްގެ އާ ތަޞައްވުރެއް ފެންނަން" ކަމަށް އޭނާ ވިދާޅުވިއެވެ. އަދި ރޮބޯވެން ޕްރޮޖެކްޓާ ބެހޭގޮތުން އޭނާ ވިދާޅުވީ "ޚިޔާލުކޮށްފައިވާ ގޮތަށް ނުވަތަ މިހާރު ފެންނަ ގޮތަށް މިކަން ވާނެ" ކަމަށެވެ. ޓެސްލާއިން ދައްކާފައިވާ އެކި ކުރެހުންތަކުގައި ރޮބޯވެން ސްކޫލް ބަހެއްގެ ގޮތުގައާއި، މޮބައިލް ގަރާޖެއްގެ ގޮތުގައާއި، ފުޑް ޓްރަކެއްގެ ގޮތުގައިވެސް ދައްކާފައިވެއެވެ.
އެހެންނަމަވެސް، ރޮބޯވެންގެ ޓެކްނިކަލް ތަފްސީލުތަކާއި، އަގާއި، ނެރޭނެ ތާރީޚެއް އަދި ހާމަކޮށްފައެއް ނުވެއެވެ. އަދި ޓެސްލާއިން ކުރިން އިޢުލާނުކޮށްފައިވާ ބައެއް އުޅަނދުތަކާއި ޓެކްނޮލޮޖީތައް ވަޢުދުވި ގޮތަށް ތަންފީޒުކުރުމުގައި ދަތިތަކާ ކުރިމަތިވެފައިވާކަން ފާހަގަކުރެވެއެވެ. މިސާލަކަށް، ސެމީ އަދި ސައިބަޓްރަކް ނެރުނީ ވަޢުދުވި ތާރީޚަށްވުރެ ވަރަށް ފަހުންނެވެ. އަދި ރޯޑްސްޓާ އިޢުލާނުކުރިތާ ހަތަރު އަހަރު ފަހުންވެސް އަދި އުފައްދަން ފަށާފައެއް ނުވެއެވެ.
މޯބައިލް ރެސްޓޯރެންޓެއްގެ ގޮތުގައިވެސް ރޮބޯވޭން ބޭނުންކުރެވޭނެ ---
އަމިއްލައަށް ދުއްވާ ވޭނެއްގެ ޚިޔާލަކީ މުޅިން އައު އެއްޗެއް ނޫނެވެ. "ޖެނެރަލް މޯޓާސް" އިން 'ކުރޫޒް އޮރިޖިން' ނަމަކަށް ކިޔާ އިލެކްޓްރިކް ޝަޓްލްއެއް މީގެ ކުރިންވެސް ރާވާފައިވެއެވެ. ނަމަވެސް، ޤަވާއިދުތަކާ އެއްގޮތްވާނެކަމުގެ ޔަޤީންކަން ނެތުމުން މި މަޝްރޫޢު ނާކާމިޔާބުވިއެވެ. އަދި އެމެޒޯންގެ ދަށުން ހިންގާ 'ޒޫކްސް' ކުންފުނިންވެސް މިފަދަ އުޅަނދެއް މީގެ ކުރިން ތަޢާރަފުކޮށްފައިވެއެވެ.
ޖުމުލަގޮތެއްގައި، މި އިވެންޓަކީ ޓެސްލާއިން އޮޓޮނޮމަސް ދަތުރުފަތުރުގެ ދާއިރާގައި އިތުރު ފިޔަވަޅުތަކެއް އަޅަމުންދާކަން ދައްކުވައިދޭ އިވެންޓެކެވެ. ނަމަވެސް، މި އައު އުޅަނދުތަކުގެ މުސްތަޤުބަލާމެދު ގިނަ ސުވާލުތަކެއް އުފެދިފައިވެއެވެ. ޓެސްލާއިން މި އުޅަނދުތައް ވަޢުދުވާ ގޮތަށް ތަރައްޤީކޮށް މާކެޓަށް ނެރެވޭނެތޯއާއި، މިފަދަ އޮޓޮނޮމަސް އުޅަނދުތަކާ ގުޅޭ ޤާނޫނީ އަދި ރެގިއުލޭޓަރީ ގޮންޖެހުންތަކަށް ހައްލު ހޯދޭނެތޯ އަކީ މިވަގުތު އުފެދިފައިވާ މުހިންމު ސުވާލުތަކެވެ.