މެޓާ ކުންފުނިން, އިންސްޓަގްރާމް ރީލްސް ސީދާ ތްރެޑްސްގައި ޕޯސްޓްކުރެވޭ ގޮތަށް އާ ފީޗާއެއް ޓެސްޓްކުރަން ފަށައިފިއެވެ.
ތްރެޑްސްއަކީ މިދިޔަ އަހަރު މެޓާއިން ތަޢާރަފުކުރި، އެލޮން މަސްކްގެ އެކްސް (ކުރީގެ ޓްވިޓާ) އާ ވާދަކުރާ މައިކްރޯ-ބްލޮގިން ޕްލެޓްފޯމެކެވެ. މި ޕްލެޓްފޯމް ކުރިއަރަމުންދާއިރު، މެޓާއިން އިތުރު ގިނަ ފީޗާތަކެއް އެޕަށް އިތުރުކުރުމަށް ރާވަމުންދާ ކަމަށް ބެލެވެއެވެ.
މަޝްހޫރު ޑިވެލޮޕާ އަލެސާންޑްރޯޕަލުޒީ ހިއްސާކޮށްފައިވާ ސްކްރީންޝޮޓެއްގައި ދައްކާގޮތުން، ތްރެޑްސްގެ ޑްރޮޕް-ޑައުން މެނޫގައި މިހާރު ހުރި ޖިފް، އަޑު އަދި ޕޯލް އޮޕްޝަންތަކުގެ އިތުރުން އިންސްޓަގްރާމް އޮޕްޝަނެއް ހިމެނިފައިވެއެވެ. މި އާ ބަޓަން ބޭނުންކޮށްގެން ޔޫޒަރުންނަށް އިންސްޓަގްރާމް ޕޯސްޓްތަކާއި ރީލްސް، ތްރެޑްސްގައި ހިއްސާކުރެވޭނެއެވެ.
މިހާރު ވެސް ގިނަ ޔޫޒަރުން އެ މީހުންގެ އިންސްޓަގްރާމް ޕޯސްޓްތަކާއި ރީލްސް ތްރެޑްސްގައި ހިއްސާކުރަމުންދެއެވެ.
މިގޮތަށް ހިއްސާކުރުމުގެ ބޭނުމަކީ އެ މީހުންގެ ކޮންޓެންޓަށް އިތުރު ސަމާލުކަން ހޯދުމާއި ފޮލޯވަރުން އިތުރުކުރުމެވެ. މި އާ ފީޗާ ތަޢާރަފުވުމުން ޔޫޒަރުންނަށް އެ މީހުންގެ ކޮންޓެންޓްގެ ފެންނަ މިންވަރު އިތުރުކުރެވި، އެންގޭޖްމަންޓް އިތުރުކުރެވޭނެ ކަމަށް ބެލެވެއެވެ.
މި އާ ފީޗާ ޓެސްޓްކުރަމުންދާކަން މެޓާއިން ޓެކްކްރަންޗަށް ކަށަވަރުކޮށްދީފައިވާ ކަމަށް އެ ވެބްސައިޓުން ވަނީ ރިޕޯޓުކޮށްފައެވެ. މިއީ މެޓާގެ އެޕްތަކުގެ މެދުގައި ކޮންޓެންޓް ހިއްސާކުރުން އިތުރުކުރުމަށް ކުންފުނިން ކުރަމުންދާ މަސައްކަތުގެ ބައެއް ކަމަށް ބެލެވެއެވެ.