މާލޭ މަޖީދީމަގު 'ސޮރީ ބޯއީޒް' ފިހާރަ ކުރިމަތީ އަނިޔާތަކެއް ލިބިފައި އޮތް ދިވެއްސަކު ރޭ ފެނިއްޖެއެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މަޖީދީމަގުގެ 'ސޮރީ ބޯއީޒް' ފިހާރަ ކުރިމަތީގައި އަނިޔާތަކެއް ލިބިފައި މީހަކު އޮތް ކަމަށް ރޭ 1:25 ހާއިރު ފުލުހުންނަށް ރިޕޯޓުކުރި ކަމަށެވެ.
އެގޮތުން، އަނިޔާވެފައި އޮއްވައި ފެނިފައިވަނީ ދިވެހި ފިރިހެނެކެވެ.
އެހެންވެ، އޭނާއަށް ފަރުވާ ދިނުމަށް އައިޖީއެމްއެޗަށް ގެންދިޔަ ކަމަށް ފުލުހުން ބުންޏެވެ. ފަރުވާ ދިނުމަށް ފަހު ހެނދުނު 6:19 ހާއިރު އޭނާ ދޫކޮށްލާފައިވާ ކަމަށް ހޮސްޕިޓަލާ ހަވާލާދީ ފުލުހުން ބުނެފައިވެއެވެ.
މިކަމާ ގުޅުވައި ސޯޝަލްމީޑިއާގައި ވީޑިއޯއެއް ދައުރުވެފައިވާއިރު، މަގުމަތީގައި އޮތް މީހެއް ނެގުމަށް ދެ ފުލުހަކު ހަރަކާތްތެރިވާ މަންޒަރު ފެނެއެވެ. އަދި، ކައިރީގައި އިތުރު ފުލުހަކު ހުރިއިރު، އަށިގަނޑެއް ވެސް ބަހައްޓާފައި ހުންނަ މަންޒަރު ފެނެއެވެ. ބެލެވޭ ގޮތުގައި ފުލުހުން މަސައްކަތްކުރަމުން ދިޔައީ އަނިޔާވެފައި އޮތް މީހާ އެންބިއުލާންސަށް އަރުވައިގެން ހޮސްޕިޓަލަށް ގެންދިޔުމަށެވެ.
މި ހާދިސާއާ ގުޅޭ އިތުރު އެއްވެސް ތަފުސީލެއް ފުލުހުން ހިއްސާކޮށްފައެއް ނުވެއެވެ.
ފުލުހުން އަންނަނީ މި މައްސަލަ ތަހުގީގުކުރަމުންނެވެ.