އިންޑިއާގެ ޓާޓާ ސަންސްގެ ޗެއާމަން، ރަތަން ޓާޓާ އުމުރުފުޅުން 86 އަހަރުގައި މިއަދު އަވަހަރާވެއްޖެއެވެ.
އޭނާ އަވަހާރަވީ މުމްބާއީގެ ހޮސްޕިޓަލެއްގައި ފަރުވާ ހޯއްދަަވަމުން ގެންދަވަނިކޮށެވެ. އިންޑިއާޓީވީ ނޫހުން ރިޕޯޓުކުރި ގޮތުގައި ފާއިތުވި ދުވަސްތަކުގެ ތެރޭ ސިއްހީ ހާލުކޮޅު ވަރަށް ބޮޑަށް ގޯސްވެ ރަތަން ގެންދެވީ މުމްބާއީގެ ހޮސްޕިޓަލެއްގެ އައިސީޔޫގައި ފަރުވާ ހޯއްދަވަމުންނެވެ.
ނަމަވެސް ހޯމަ ދުވަހު އޭނާ އެކްސްގައި ކުރެއްވި ޕޯސްޓެއްގައި ވަނީ އޭނާގެ ސިއްހީ ހާލުކޮޅާ ގުޅިގެން ދެކެެވެމުން އަންނަ ވާހަކަތައް އެނގިލައްވާކަމަށް ވިދާޅުވެފައެވެ. ކަންބޮޑުވާން ޖެހޭ އެއްވެސް ކަމެއް ނެތްކަން ފާހަގަކުރައްވައި އޭރު އޭނާ ވިދާޅުވީ އޭނާގެ އުމުރާ ގުޅިގެންނާއި، ހުރި ބައެއް ސިއްހީ ކަންކަމުގެ ސަބަބުން މެޑިކަލް ޗެކަޕެއް ހައްދަވަނީ ކަމަށެވެ.
ރަތަން އަވަހާރަވުމާއެކު އިންޑިއާގެ އިސްވެރިންނާއި ވިޔަފާރިވެރިން ހިމެނޭހެން އެކި ބޭފުޅުންގެ ތައުޒިޔާގެ އެކި މެސެޖުތައް ސޯޝަކް މީޑިއާގައި އަންނަނީ ހިއްސާކުރައްވަމުންނެވެ.
ރަތަން ޓާޓާއަކީ ކާކު؟
ރަތަން ޓާޓާ 1991 ވަނަ އަހަރު އޮޓޯސް ޓު ސްޓީލް ކޮންގްލޯމެރޭޓްގެ ޗެއާމަންކަން ކުރެއްވިއިރު، މީގެ ސަތޭކަ އަހަރަށް ވުރެ ގިނަ ދުވަސް ކުރިން އޭނާގެ މުނިކާފަ އުފެއްދެވި ޓާޓާ ގްރޫޕް 2012 ވަނަ އަހަރާ ހަމައަށް ހިންގެވިއެވެ.
މީގެ އިތުރުން ރަތަން ޓާޓާއަކީ 1996 ވަނަ އަހަރު އުފެއްދި ޓެލެކޮމިއުނިކޭޝަން ކުންފުނި، ޓާޓާ ޓެލެސާވިސަސްގެ ފައުންޑަރެވެ. އަދި އެއަށްފަހު އައިޓީ ކުންފުންޏެއްކަމަށްވާ، ޓާޓާ ކޮންސަލްޓެންސީ ސާވިސަސްގެ ހިންގުމާ 2004 ވަނަ އަހަރު ހަވާލުވެވަޑައިގެންނެވިއެވެ.
މަގާމުން ވަކިވެވަޑައިގަތުމުން، އޭނާއަށްވަނީ ޓާޓާ ސަންސް، ޓާޓާ އިންޑަސްޓްރީސް، ޓާޓާ މޮޓޯސް، ޓާޓާ ސްޓީލް އަދި ޓާޓާ ކެމިކަލްސްގެ ޗެއާމަން އެމެރިޓަސްގެ މަގާމު ދީފައެވެ.