އަލްޤައިދާގެ ބާނީ އުސާމާ ބިން ލާދިންގެ ދަރިއަކު ފްރާންސްގެ ނޯމަންޑީގެ އަވަށެއްގައި ދިރިއުޅެނިކޮށް ޑީޕޯޓުކޮށްފިއެވެ. އަދި އޭނާއަށް އަނބުރާ ފްރާންސަށް ނުވަދެވޭގޮތް ވަނީ ހަދާފައެވެ.
ރޮއިޓާސްއިން ރިޕޯޓުކޮށްފައިވާ ގޮތުގައި އޭނާ ޑީޕޯޓުކުރީ ޓެރަރިޒަމަށް ހިތްވަރުދޭ މެސެޖްތަކެއް ސޯޝަލްމީޑިއާގައި އާންމުކުރުމުންނެވެ.
ފްރާންސްގެ އިންޓީރިއާ މިނިސްޓަރު ބްރޫނޯ ރެޓައިލޯ ވިދާޅުވީ ފްރާންސުން އުމަރު ބިން ލާދިން ޑިޕޯޓުކުރުމުގެ އަމުރެއްގައި ސޮއިކުރައްވާފައިވާ ކަމަށެވެ. ނަމަވެސް އޭނާ ފޮނުވާލީ ކޮން ތަނަކަށް ކަމަށާއި އެކަމާބެހޭ އިތުރު ތަފްސީލެއް ހާމަކުރައްވާފައެއްނުވެއެވެ.
"އިނގިރޭސި ރައްޔިތެއްގެ ފިރިއެއްގެ ގޮތުގައި ގިނަ އަހަރުތަކެއް ވަންދެން އޮރްނޭ ސަރަހައްދުގައި ދިރިއުޅުނު އުމަރު ބިން ލާދިން ވަނީ 2023 ވަނަ އަހަރު އޭނާގެ ސޯޝަލް މީޑިއާ ނެޓްވޯކްތަކުގައި ޓެރަރިޒަމަށް ހިތްވަރުދޭ ކޮމެންޓްތަކެއް އާންމުކޮށްފައި." ރެޓައިލޯ އެކްސްގައި ޕޯސްޓެއްގައި ވިދާޅުވެފައިވެއެވެ.
ފްރާންސްގެ ހަފުތާ ނޫހެއް ކަމަށްވާ ލެ ޕަބްލިއޭޗާ ލިބްރޭ އިން ބުނާ ގޮތުގައި ފްރާންސްގެ ކަމާބެހޭ ފަރާތްތަކުގެ ސަމާލު ކަމަށް އުމަރު ބިން ލާދިން އައީ 2011 ވަނަ އަހަރު އެމެރިކާ ސިފައިން މަރާލި އޭނާގެ ބައްޕަގެ އުފަންދުވަހު ސޯޝަލް މީޑިއާގައި ކުރި ޕޯސްޓެއްގެ ސަބަބުންނެވެ.
އުމަރު އުސާމާ ބިން ލާދިންއަކީ އުސާމާ ބިން ލާދިންގެ ހަތަރު ވަނަ ދަރިފުޅެވެ. އޭނާގެ މަންމައަކީ އުސާމާގެ ދެބެންގެ ދެ ދަރި ނަޖްވާ ގަނޭމްއެވެ. އުމަރު ބިން ލާދިންއަކީ އާޓިސްޓެއްގެ އިތުރުން، ލިޔުން ތެރިއެއް އަދި ވިޔަފާރިވެރިއެކެވެ.