އިންޑިއާގެ ކަލްކަތާގައި ޑޮކްޓަރަކު ރޭޕްކޮށް މަރާލި މައްސަލައިގައި އެކަން ކުރި ކަމަށް ތުހުމަތުކޮށް ހައްޔަރުކޮށްފައިވާ ސަންޖޭ ރޯއިގެ މައްޗަށް އިއްޔެ ދައުވާކޮށްފިއެވެ.
ކަލްކަތާ ފުލުހުން ސަންޖޭ ހައްޔަރުކުރީ ޑޮކްޓަރު މަރާލާފައި އޮއްވާ ފެނުނު ދުވަހު ނޫން އަނެއް ދުވަހުއެވެ.
އިންޑިއާގެ މީޑިއާތަކުން ގިނައިން ރިޕޯޓްކުރާ ގޮތުގައި އުމުރުން 33 އަހަރުގެ ރޯއީ އަކީ ހޮސްޕިޓަލުގައި ބަލިމީހުންނަށް އެހީތެރިވުމަށް ވޮލަންޓިއަރެއްގެ ގޮތުގައި މަސައްކަތް ކުރަމުން އައި މީހެކެވެ. ކުށް ސާބިތުވެއްޖެނަމަ އޭނާއަށް މަރުގެ އަދަބު ލިބޭނެއެވެ.
އެއްތީރީސް އަހަރުގެ ޑޮކްޓަރު މަރާލާފައި އޮއްވާ ފެނުނީ ކަލްކަތާގެ ސަރުކާރު ހޮސްޕިޓަލެއް ކަމަށްވާ، އާރްޖީ ކާރު މެޑިކަލްގެ ލެކްޗާ ހޯލެއްގައެވެ. ޑޮކްޓަރުގެ ހަށިގަނޑު އެތައް އަނިޔާތަކެއް ލިބިފައިވާއިރު، އެކަމަށް އިންސާފު ހޯދުމަށް އޮގަސްޓް މަހު އިންޑިއާގައި ވަނީ މުޒާހަރާތައް ފަށާފައެވެ.
ކަމާބެހޭ ފަރާތްތަކުން ހާމަކޮށްފައިވާ ގޮތުގައި ޑޮކްޓަރު ރޭޕްކޮށް މަރާލާފައި ވަނީ ދިގު ޑިއުޓީއަކަށްފަހު، އަރާމު ކުރަން އެ ހޯލަށް ދިޔަ ވަގުތުއެވެ.
އޮޓޮޕްސީން ކަށަވަރުވެފައިވާ ގޮތުގައި ޑޮކްޓަރަށް ވަނީ މަރާލުމުގެ ކުރިން ޖިންސީ ގޯނާކޮށް ހަމަލާދީފައެވެ.
އެ ހާދިސާއާ ގުޅިގެން ހަފުތާތަކެއް ވަންދެން މުޅި އިންޑިއާގެ ޕަބްލިކް ހޮސްޕިޓަލްތަކުގެ ޑޮކްޓަރުން ވަނީ ރައްކާތެރި މަސައްކަތު މާހައުލެއް ހޯދާދިނުމަށް އަވަސް ގާނޫނީ ފިޔަވަޅު އެޅުމަށް ގޮވާލައި މުޒާހަރާކޮށްފައެވެ. އަދި އެ ދުވަސްވަރު ޑޮކްޓަރުން ޚިދުމަތްދީފައި ވަނީ ހަމައެކަނި އެމަޖެންސީ ބަލި މީހުންނަށެވެ.
މުޒާހަރާތައް ހުއްޓާލައި ގިނަ ޑޮކްޓަރުންނާއި މަސައްކަތްތެރިން އެނބުރި މަސައްކަތަށް ނިކުމެފައިވާއިރު، އަދިވެސް ބައެއް ޑޮކްޓަރުން ތިބީ މުޒާހަރާގައެވެ. އެ މީހުން ވަނީ މި މަހު ބަނޑުހައިހޫނުކަމުގެ ހަޅުތާލުވެސް ފަށާފައެވެ. ޑޮކްޓަރުން ބުނާ ގޮތުގައި ލައިޓިން އާއި ސެކިއުރިޓީ ކެމެރާތަކާއި އެތަންތަން ހިމާޔަތް ކުރުމަށް އަޅާފައިވާ އެހެން ފިޔަވަޅުތައް އަޕްގްރޭޑް ކުރުމަށް ވެސްޓް ބެންގާލް ސްޓޭޓް ސަރުކާރުން ވެފައިވާ ވައުދުތައް އަދިވެސް ފުއްދައިދީފައެއް ނުވެއެވެ.
އިންޑިއާގެ ސުޕްރީމް ކޯޓުން މިދިޔަ މަހު ވަނީ ސިއްޚީ ހިދުމަތްތެރިންގެ ސަލާމަތީ ކަންކަން ވަރުގަދަ ކުރާނެ ގޮތްތައް ބެލުމަށް ގައުމީ ޓާސްކް ފޯހެއް ކަނޑައެޅުމަށް އަމުރުކޮށްފައެވެ.
ވެސްޓް ބެންގާލްގައި މިދިޔަ މަހު ސްޓޭޓް އެސެމްބްލީން ވަނީ ރޭޕްގެ އަދަބަކަށް މިހާރު ކަނޑައަޅާފައި އޮތް 10 އަހަރުގެ ހުކުމް އުމުރަށް ޖަލަށްލުމަށް ބަދަލު ކުރުމަށް ނުވަތަ މަރުގެ އަދަބު އިތުރުކުރާ ގާނޫނެއްވެސް ފާސްކޮށްފައެވެ.
ނޭޝަނަލް ކްރައިމް ރެކޯޑްސް ބިއުރޯގެ އެންމެ ފަހުގެ ތަފާސް ހިސާބުތަކުން ދައްކާ ގޮތުގައި އިންޑިއާގައި 2022 ވަނަ އަހަރު އެވްރެޖްކޮށް ދުވާލަކު ގާތްގަނޑަކަށް 90 ރޭޕް ރިޕޯޓްކޮށްފައިވެއެވެ. ނަމަވެސް ރިޕޯޓުނުކުރާ އެތައް ހާދިސާއެއް ހިނގަފާއި ހުންނާނެތީ، އެ އަދަދު އެއަށްވުރެ އިތުރުވާނެ ކަމަށް ތަޖުރިބާކާރުން ވިދާޅުވެއެވެ.