ރާއްޖެއަށް ފުރަމާނަ ދަތުރުފުޅެއްގައި ވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިއަދު އިންޑިއާގެ ބޮޑުވަޒީރު ނަރެންދުރަ މޯދީއަށް ދެއްވި ދައުވަތު ގަބޫލުކުރައްވައިފިއެވެ.
ރައީސް މުއިއްޒު މޯދީއަށް ދައުވަތު ދެއްވީ އެމަނިކުފާނު އިންޑިއާއަށް ކުރައްވަމުން ގެންދަވާ ފުރަމަނާ ދަތުރުފުޅުގެ ތެރެއިންނެވެ.
ރައީސްގެ ދަތުރުފުޅާ ގުޅޭ މައުލޫމާތު ހިއްސާކުރުމަށް އިންޑިއާގެ އެކްޓާނަލް އެފެއާޒް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި އެގައުމުގެ ފޮރިން ސެކެޓްރީ ވިކްރަމް މިސްރީ ވިދާޅުވީ، ރާއްޖެއަށް ފުރަމަނާ ދަތުރުފުޅެއް ކުރުމަށް ރައީސް މުއިއްޒު ދެއްވި ދައުވަތު މޯދީ ގަބޫލު ކުރައްވާފައިވާ ކަމަށެވެ.
ނަމަވެސް، މި ދަތުރުކުރައްވަން ހަމަޖެހިފައިވާ ތާރީޚެއް އޭނާ އަދި ވިދާޅެއް ނުވެއެވެ.
އަންނަ އަހަރަކީ ރާއްޖެއާއި އިންޑިއާއާ ދެމެދު ޚާރިޖީ ގުޅުން ރަސްމީ ސިފައެއްގައި ގާއިމްކުރިތާ 60 އަހަރު ފުރޭ އަހަރެވެ. އެހެންކަމުން އެ މަނިކުފާނު ވަނީ އެ މުނާސަބާ ފާހަގަކުރުމަށް މޯދީ ރާއްޖެ ވަޑައިގަތުމަށް ދައުވަތު އަރުވައިފައެވެ.
މޯދީއާއެކު މިއަދު ބޭއްވި ބައްދަލުވުމުގައި ރައީސް ވިދާޅުވީ އިންޑިއާއާއެކު އިތުރަށް ގުޅުން ބަދަހިކޮށް ގާތުން މަސައްކަތްކުރަން އެދޭ ކަމަށެވެ. އެގޮތުން އިންޑިއާއަކީ އިޖްތިމާއީ، އިގްތިޞާދީ ގޮތުން ރާއްޖޭގެ ތަރައްގީގައި މުހިންމު ބައިވެރިއެއްކަމަށް ވިދާޅުވިއެވެ.
މީގެ އިތުރުން ރާއްޖެ އަބަދުވެސް ދެމި އޮންނާނީ އިންޑިއާގެ ހަގީގީ އެކުވެރިއެއްގެ ގޮތުގައިކަމަށް އެމަނިކުފާނު ވިދާޅުވިއެވެ.