ގޫގުލްއިން އެންޑްރޮއިޑް ފޯނުތަކަށް މުޅިން އައު އޭއައި ސެކިއުރިޓީ ފީޗާތަކެއް ތަޢާރަފުކުރަމުންދާ ވާހަކަ އިޢުލާނުކޮށްފިއެވެ. މި ފީޗާތަކުގެ ތެރޭގައި ހިމެނެނީ ވައްކަމާ ގުޅުންހުރި ހަރަކާތްތައް ދެނެގަނެ ފޯނު ބަންދުކުރުމުގެ ނިޒާމެކެވެ.
"ތެފްޓް ޑިޓެކްޝަން ލޮކް" ނަމަކަށް ކިޔާ މި ފީޗާ، އޭއައި އާއި މެޝިން ލާނިން ބޭނުންކޮށްގެން ވައްކަމާ ގުޅުންހުރި ހަރަކާތްތައް ދެނެގަނެއެވެ. މިސާލަކަށް މީހެއްގެ އަތުން ފޯނު އަތުލުމަށްފަހު ދުއްވައިގަތުން ފަދަ ކަންތައްތަކެވެ. މިފަދަ ހަރަކާތެއް ދެނެގަތުމުން ފޯނު އޮޓޮމެޓިކުން ބަންދުވެއެވެ.
މީގެ އިތުރުން "އޮފްލައިން ޑިވައިސް ލޮކް" އަދި "ރިމޯޓް ލޮކް" ނަމަކަށް ކިޔާ ދެ ފީޗާ ވެސް ހިމެނެއެވެ. އޮފްލައިން ޑިވައިސް ލޮކްއިން އިންޓަނެޓް ނެތް ހާލަތުގައި ވެސް ފޯނު ލޮކް ކުރެވޭނެއެވެ. އަދި ރިމޯޓް ލޮކްއިން ދުރުން ފޯނު ލޮކް ކުރެވޭނެއެވެ.
"ތެފްޓް ޕްރޮޓެކްޝަން" ފީޗާގެ ސްކްރީން ޝޮޓެއް --
ބްރެޒިލްގައި ބީޓާ ޓެސްޓު ކުރުމަށްފަހު މިހާރު މި ފީޗާތައް އެމެރިކާ ފަދަ އިތުރު ޤައުމުތަކަށް ދަނީ ތަޢާރަފުކުރަމުންނެވެ. ބައެއް ފަރާތްތަކަށް މިހާރުވެސް މި ފީޗާތައް ފެންނަކަމަށް ރިޕޯޓުތަކުން ދައްކައެވެ. އެހެންނަމަވެސް އެކި ފަރާތްތަކަށް މި ފީޗާތައް ލިބެމުންދަނީ ތަފާތު ގޮތްގޮތަށެވެ.
މި ފީޗާތައް ލިބިފައިވޭތޯ ބެލުމަށް ފޯނުގެ ސެޓިންގްސްއިން "ތެފްޓް ޕްރޮޓެކްޝަން" ސާޗްކުރުމަށް ނުވަތަ ސެޓިންގްސް، ގޫގުލް، ޕާސަނަލް އެންޑް ޑިވައިސް ސޭފްޓީއަށް ދިއުމަށް ގޫގުލްއިން އިރުޝާދު ދެއެވެ.
ފޯނު ގެއްލުމުން ނުވަތަ ވަގަށް ނެގުމުން އޭގައި ހުންނަ އަމިއްލަ މަޢުލޫމާތާއި ފޮޓޯތައް ރައްކާތެރިކުރުމަށް މި ފީޗާތަކުން އެހީތެރިވެދޭނެ ކަމަށް ގޫގުލްއިން ބުނެއެވެ.