ލުބުނާނުގައި މިދިޔަ މަހު ދިން ޕޭޖަރުތަކާއި ވޯކީ ޓޯކީ ގޮއްވާލުމުގެ ހަމަލާތަކާ ގުޅިގެން ދުބާއީގެ އެއާލައިން އެމިރޭޓްސްގެ ފްލައިޓްތަކުގައި ޕޭޖަރާއި ވޯކީ ޓޯކީ ބޭނުންކުރުން މަނާކޮށްފިއެވެ. އޭގެއިތުރުން މެދުއިރުމަތީގެ ހާލަތު ގޯސްވުމުގެ ސަބަބުން އެ ސަރަހައްދަށް ދާ ފްލައިޓް ކެންސަލްކޮށްފައިވާ މުއްދަތު ވެސް ވަނީ އިތުރުކޮށްފައެވެ.
"ދުބާއީއަށް ނުވަތަ ދުބާއީން ނުވަތަ ދުބާއީ މެދުވެރިކޮށް ދަތުރުކުރާ ހުރިހާ ފަސިންޖަރުންނަށް ޗެކްކޮށްފައިވާ ނުވަތަ ކެބިން ބެގޭޖްގައި ޕޭޖަރާއި ވޯކީ ޓޯކީ ގެންދިއުމަކީ މަނާ ކަމެއް،" އެމިރޭޓްސްގެ ވެބްސައިޓްގައި އާންމުކޮށްފައިވާ ބަޔާނެއްގައި ބުނެފައިވެއެވެ.
ލުބުނާނުގެ ހަތިޔާރުއެޅި ޖަމާއަތް، ހިޒްބުﷲގެ މެމްބަރުން ބޭނުންކުރި ޕޭޖަރުތަކަކާއި ވޯކީ ޓޯކީތަކެއް ގޮއްވާލި ހާދިސާގައި 37 މީހުން މަރުވެ ގާތްގަނޑަކަށް 3،000 މީހުން ޒަޚަމްވެފައިވެއެވެ.
މެދުއިރުމަތީގެ އެންމެ ބޮޑު އެއާލައިން ކަމަށްވާ އެމިރޭޓްސް އިން ވެސް ވަނީ އެ އެއާލައިންގެ އިރާގާއި އީރާނުގެ ދަތުރުތައް ވެސް އަންގާރަ ދުވަހުގެ ނިޔަލަށް މެދުކަނޑާލާނެ ކަމަށް އިއުލާންކޮށްފައެވެ.
އެމިރޭޓްސް އިން ބުނީ އުރުދުން އަށް މެދުކަނޑާލާފައިވާ ދަތުރުތައް ވެސް އާދީއްތަ ދުވަހު ފަށާނެ ކަމަށެވެ.
ނަމަވެސް އިސްރާއީލުން ލުބުނާނަށް ދޭ ހަމަލާތައް ވަރުގަދަ ކުރަމުންދާއިރު، ލުބުނާނަށް ކުރާ ދަތުރުތައް އޮކްޓޯބަރު 15 އާ ހަމައަށް މެދުކަނޑާލާނެ ކަމަށް އެމިރޭޓްސް އިން ބުނެއެވެ.
އެމިރޭޓްސްގެ އިތުރުން އެހެން ބައެއް އެއާލައިންތަކުން ވެސް ވަނީ ބެއިރޫތާއި މެދުއިރުމަތީގެ އެހެން އެއާޕޯޓްތަކަށް ކުރާ ދަތުރުތައް މެދުކަނޑައިލާފައެވެ.