އާޓް ގެލެރީގައި މިހާރު ކުރިއަށްދާ "ތްރޫ ދި އައިޒް އޮފް ޕިކާސޯ" އެގްޒިބިޝަން ކުރިއަށް ދަނިކޮށް ކަރަންޓު ކޭބަލްތަކެއް ބުރިކޮށްލި މައްސަލައެއް ފެންމަތިވެއްޖެއެވެ.
އެގްޒިބިޝަން ކުރިއަށް ދިޔަ ވަގުތު ކަރަންޓު ކެނޑި، ގެލެރީގެ ހޯލް އަނދިރިކޮށް އޮތުމަށް ފަހު ގަޑިއިރެއްތެރޭ އަލުން ކަރަންޓު ލިބުނު ކަމަށް އެތަނުގައި ހުރި އާޓިސްޓަކު "ސަން"އަށް މައުލޫމާތު ދިނެވެ.
އެކަމާ ގުޅިގެން ސޯޝަލް މީޑިއާގައި ދައުރުވާ ފޮޓޯތަކުން ބުރިކޮށްލާފައިވާ ކޭބަލްތަކެއް ވެސް ފެނެއެވެ.
އެކަމާ ގުޅިގެން ކުރެހުންތެރިޔާ އަދި މޯލްޑިވިއަން އާޓިސްޓް ކޮމިއުނިޓީގެ ޗެއާޕާސަން އަހުމަދު އަޒްމީ ހަލީމް (ބާޗީ) ވިދާޅުވީ، ކޭބަލްތައް ވަގަށް ނެގި ކަމަށް ތުހުމަތު ކުރެވޭއިރު، އެ މައްސަލައާ ގުޅިގެން އާޓިސްޓުންގެ ކަންބޮޑުވުންތައް އޮތް ކަމަށެވެ. އެގޮތުން އެފަދަ އަމަލެއް ހިންގި ފަރާތެއްގެ ނިޔަތަކީ ވައްކަން ކުރުން ނަމަ، ދެން ވެސް އެފަދަ ކަމެއް ކުރުމުގެ ފުރުސަތު އެބައޮތް ކަމަށާއި، އާޓް ގެލެރީއަށް ސެކިއުރިޓީ މުހިންމު ކަމަށް ވިދާޅުވިއެވެ.
ބާޗީ ވިދާޅުވީ ދިވެހިރާއްޖޭގައި އާޓީސްޓުންނަކީ ނިސްބަތުން ކުޑަ ކޮމިއުނިޓީއެއް ނަމަވެސް އެމީހުންގެ ހައްގުތައް ވެސް އޮންނާނެކަމަށެވެ. އަދި އާޓް ގެލެރީން ދެން ވަގަށް ގެންދާނީ އެތަނުގައި ބަހައްޓާފައި ހުރި ކުރެހުންތައް ނޫން ކަމެއް ވެސް ނޭނގޭ ކަމަށް ވިދާޅުވެ އޭނާ ވަނީ ކަންބޮޑުވުން ހިއްސާކުރައްވާފައެވެ.
"އާޓިސްޓުންނާއި މިހާރު ކުރިއަށްދާ އެގްޒިބިޝަންތަކަށް ހުރަސް އެޅުމުގެ ގޮތުން މި ވައްކަންތައް ކުރަނީ ރާވައިގެން ކަމަށް ގާތްގަނޑަކަށް ހީވޭ. އެކަމަށް ހައްލެއް ހޯދުމަށް ނެޝަނަލް ސެންޓާ ފޯ އާޓްސް (އެންސީއޭ) އާއި ގެލެރީ މެނޭޖްމަންޓުން މިހާރަށް ވުރެ ބޮޑަށް ފިޔަވަޅުތައް އަޅަން ޖެހޭ،" އެކްސްގައި ކުރި ޕޯސްޓެއްގައި ބާޗީ ވިދާޅުވިއެވެ.
"ސަން" އާ ވާހަކަދެއްކި އާޓިސްޓަކު ބުނި ގޮތުގައި މީގެ ކުރިން ވެސް އާޓް ގެލެރީގައި އެގްޒިބިޝަންތައް ކުރިއަށް ދަނިކޮށް ވައްކަން ކޮށްފައިވާ ކަމަށް ތުހުމަތުތަކެއް ފެންމަތިވެފައިވެއެވެ. އެގޮތުން މީގެ ދެމަސް ކުރިން "އަންވެއިލިން ވިޝަން 2024" އާޓް ގެލެރީގައި ކުރިއަށް ދިޔަ އިރު ބޭރުގައި ހުރި އެއާކޯންގެ ބައިތައް ވެސް ވަގަށް ގެންދިޔަ ކަމަށް އޭނާ ތުހުމަތުކުރިއެވެ. އަދި ޖެހިގެން އައި މަހު ބޭއްވި އެހެން އެގްޒިބިޝަނެއް ކުރިއަށް ދިޔަ އިރު ވެސް ކަރަންޓު ކޭބަލްތަކެއް ބުރިކޮށްލި ކަމަށާއި އެހެން ހުއްޓައި އަނެއްކާވެސް މިއަދު ކަރަންޓު ކޭބަލްތަކެއް ބުރިކޮށްލީ ކަމަށް އޭނާ ކިޔައިދިނެވެ.
އޭނާ ވަނީ އެއީ ވައްކަން ކުރުމަށް ވުރެ އެގްޒިބިޝަންތަކަށް ހުރަސްއެޅުމުގެ ގޮތުން ކުރާ ކަމެއް ކަމަށް ތުހުމަތުކޮށް، ކަންބޮޑުވުން ހިއްސާކޮށްފައެވެ.
"ވިއްކަން ބުރިކޮށްލައިގެން ގެންދާ ނަމަ އެ ބޮޑު ކޭބަލްތައް އެއްކޮށް ގެންދާނެ. 75 ފޫޓުގެ ކޭބަލެއް ބުރިކޮށްލާފައި ބޮޑުބައި ބާއްވާފައި ކުޑަކުޑަ ބައެއް އެ ގެންދަނީ،" އޭނާ ބުންޏެވެ.
އޭނާ ބުނިގޮތުގައި ފުލުހުންނަށް މީގެ ކުރިން ވެސް އެ މައްސަލަ ހުށަހެޅިއެވެ. ނަމަވެސް އެކަމުގެ ޚަބަރެއް ފަހުން ނުވާ ކަމަށް ވެސް އޭނާ ބުންޏެވެ.
ފުލުހުންގެ މީޑިއާ އޮފިޝަލަކު "ސަން" އަށް މައުލޫމާތު ދިން ގޮތުގައި މިއަދު ހިނގައި ދިޔަ އެ ހާދިސާ ފުލުހުންނަށް ރިޕޯޓުކޮށްފައެއް ނުވެއެވެ. އަދި އެކަން ފުލުހުންގެ ސަމާލުކަމަށް އައިކަމަށް ވެސް ބުނެފައެއް ނުވެއެވެ.
މި މައްސަލައާ ގުޅިގެން އެކްސްގައި ކުރެއްވި ޕޯސްޓެއްގައި، އާޓްސް މިނިސްޓަރުކަން މިދިޔަ ދައުރުގައި ކުރެއްވި ޔުމްނާ މައުމޫން ވިދާޅުވީ މިއަދު ހިނގައިދިޔަ ކަމަކީ ބަލައިގަނެވޭނެ ކަމެއް ނޫން ކަމަށާއި ގެލެރީގެ ސެކިއުރިޓީ ސަރުކާރުން ކަށަވަރުކުރަން ޖެހޭ ކަމަށެވެ. ޚާއްސަކޮށް އާޓް އެގްޒިބިޝަނެއް ކުރިއަށްދާއިރު ގެލެރީގައި އަގުބޮޑު އާޓް ޕީސްތަކެއް ހުންނާނެކަން އޭނާ ފާހަގަކުރެއްވިއެވެ. އަދި އެ ތަކެތި ރައްކާތެރިކަމާއެކު ބަލަހައްޓަން ޖެހޭކަމަށް ޔުމްނާ ވިދާޅުވިއެވެ.