މިދިޔަ މަހުގެ 24 ވަނަ ދުވަހު މާފުށި ޖަލުގައި ދަންޖެހިގެން މަރުވި ފިރިހެން މީހާގެ ހަށިގަނޑު ޕޯސްޓްމޯޓަމް ހެދުމަށް ފަހު, ރާއްޖެ ގެނެސް އިއްޔެ ވަޅުލައިފިއެވެ.
ދަންޖެހިގެން މަރުވެފައިވަނީ މާލެ، ގ. އެއްތެޔޮމާގޭ އުމުރުން 62 އަހަރުގެ އަބްދުލް ޣަނީ އިސްމާއީލެވެ.
އޭނާ ޝަރީއަތް ނިމެންދެން ބަންދުކޮށްފައި ހުރީ 15 އަހަރުގެ ކުޑަކުއްޖަކަށް ޖިންސީ ގޯނާ ކުރި މައްސަލައެއްގައެވެ.
އޭނާގެ ހަށިގަނޑު ޕޯސްޓްމޯޓަމް ހަދަން ރާއްޖޭން ބޭރަށް ފޮނުވީ މިދިޔަ މަހުގެ 28 ގައެވެ.
"ސަން" އާ ވާހަކަދައްކަވަމުން ފުލުހުންގެ މީޑިއާ އޮފިޝަލަކު ވިދާޅުވީ، ޕޯސްޓްމޯޓަމް ހެދުމަށް ފަހު އިއްޔެ އޭނާގެ ހަށިގަނޑު މާލެ ގެނެސް އާއިލާއާ ހަވާލުކުރި ކަމަށެވެ. އަދި، އިއްޔެ އެ މީހާގެ ހަށިގަނޑު ވަޅުލާފައިވާ ކަމަށް ވެސް އޭނާ ވިދާޅުވިއެވެ.
ނަމަވެސް، ޕޯސްޓްމޯޓަމްގެ ނަތީޖާ ނުލިބޭ ކަމަށާއި، ނަތީޖާ ލިބުމުން އެ މައުލޫމާތު ހިއްސާކުރާނެ ކަމަށް އޭނާ ވިދާޅުވިއެވެ.
ކަރެކްޝަންސްއިން މިދިޔަ މަހުގެ 24 ވަނަ ދުވަހު ބުނީ، އެ ދުވަހު ހެނދުނު 6:52 ގައި އަބްދުލް ޣަނީ އިސްމާއީލްގެ ގޮޅީގައި ދަންޖެހިފައި ހުއްޓާ ފެނުމުން، ވަގުތުން އޭނާ މާފުށީ ހޮސްޕިޓަލަށް ގެންދިޔަ ކަމަށެވެ. އޭނާ މަރުވެފައިވާ ކަމަށް ޑޮކްޓަރު ކަނޑައެޅީ 7:21 ގައި ކަމަށް ކަރެކްޝަންސްއިން ބުންޏެވެ.
އެ މީހާއަކީ މީގެ ކުރިން ވެސް ކުށުގެ ރިކޯޑު އޮތް މީހެއް ކަމަށްވާއިރު، މި މައްސަލަ ކަރެކްޝަންސްގެ ޕްރޮފެޝަނަލް ސްޓޭންޑަޑުން އަންނަނީ ތަހުގީގުކުރަމުންނެވެ.
މި ހާދިސާއާ ގުޅިގެން އިދިކޮޅު ޕާޓީ އެމްޑީޕީން ވަނީ ސަރުކާރުގެ ކަމާ ބެހޭ ފަރާތްތަކުގެ އިހުމާލު އޮތް ކަމަށް ބެލުމުގެ ޖާގަ އޮތް ކަމަށް ތުހުމަތުކޮށް، އެ މައްސަލައިގެ މިނިވަން ތަހުގީގެއް ހިންގުމަށް ގޮވާލާފައެވެ.