ރާއްޖެއަށް ވަންނަ ބޭރު ފައިސާއާ ބެހޭ ގަވާއިދަކާއި ފައިސާ މާރުކުރުމުގެ ވިޔަފާރިއާ ބެހޭ ގަވާއިދުގެ ސަބަބުން ފަތުރުވެރިކަމުގެ ދާއިރާގައި ރުފިޔާގެ ޑިމާންޑު އުފެއްދޭނެ ކަމަށް މަރުކަޒީ ބޭންކު، އެމްއެމްއޭގެ ގަވަރުނަރު އަޙުމަދު މުނައްވަރު މިރޭ ވިދާޅުވެއްޖެއެވެ.
ޕީއެސްއެމްގެ "ރާއްޖެ ޕްރޮގްރާމް"ގައި ވާހަކަ ދައްކަވަމުން ގަވަރުނަރު ވަނީ ރާއްޖޭގެ ނިޒާމު ފަރުމާކޮށްފައި އޮތް ގޮތުން ފަތުރުވެރިންނަށް ދިވެހި ރުފިޔާގެ ބޭނުން އެހާ ވަރަށް ނޯންނަކަން ފާހަގަ ކުރައްވައިފައެވެ. އެހެން ނަމަވެސް އެއީ އެހެން ގައުމުތަކުގައި ކަންހިނގަމުން އަންނަ ގޮތް ނޫން ކަމަށް ގަވަނަރުނަރު ވިދާޅުވިއެވެ.
މުނައްވަރު ވިދާޅުވި ގޮތުގައި އައު ގަވާއިދުގެ މަގުސަދަކީ ރާއްޖޭގެ ބޭންކިން ނިޒާމުގެ ތެރެއަށް ވަންނަ ޑޮލަރުގެ އަދަދު އިތުރުކުރުމެވެ.
އެމްއެމްއޭއިން އާންމުކުރި ގަވާއިދުގެ ދަށުން، ފަތުރުވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކަށް ރާއްޖޭގެ ބޭންކިން ނިޒާމުގެ ތެރެއިން ބޭރު ފައިސާ މާރުކުރަން މާޖުބޫރުވާނެއެވެ. އެގޮތުން، ފަތުރުވެރިކަމުގެ ދާއިރާގައި ޚިދުމަތްދޭ ފަރާތްތަކުން ކޮންމެ މަހެއްގައި ފޯރުކޮށްދޭ ޚިދުމަތުގެ ތަފްސީލު ޖެހިގެން އަންނަ މަހުގެ 28ގެ ކުރިން އެމްއެމްއޭއަށް ހުށަހަޅަންޖެއެއެވެ. އަދި ތިން މަސްދުވަހުގެ ތެރޭގައި އެ ފައިސާ ރާއްޖޭގެ ބޭންކަކަށް ޖަމާކުރަން އެ ގަވާއިދުން ވަނީ ލާޒިމުކޮށްފައެވެ.
މި ގަވާއިދުގެ ދަށުން ރިޒޯޓުތަކާއި ޓޫރިސްޓު ހޮޓެލްތަކުގެ އިތުރުން އުޅަނދުތަކުން ޚިދުމަތް ހޯދާ ކޮންމެ ފަތުރުވެރިއަކަށް 500 ޑޮލަރުގެ ރޭޓުން ބޭންކަށް ރުފިޔާއިން މާރުކުރަން ލާޒިމުވާނެއެވެ. އަދި ގެސްޓްހައުސްތަކާއި މީހުން ދިރިއުޅޭ ރަށްތަކުގައި ހިންގާ ހޮޓެލްތަކުން ފަތުރުވެރިއަކަށް 25 ޑޮލަރުގެ ރޭޓުން ރުފިޔާ މާރުކުރަންޖެހެއެވެ.
ގަވަރުނަރު ވިދާޅުވީ މިހާރު އެމްއެމްއޭއަށް މާރުވާ ފައިސާއިން ބޭންކިން ނިޒާމަށް އަހަރެއްގެ މައްޗަށް ދެވެނީ 300 ނުވަތަ 400 މިލިއަން ޑޮލަރު ކަމަށެވެ. އެހެން ނަމަވެސް މިއަދު އަމަލުކުރަންފެށި ގަވާއިދުގެ ދަށުން އަހަރެއްގެ މައްޗަށް އެމްއެމްއޭއިން ބޭންކުތަކަށް ދޫކުރާ ޑޮލަރުގެ އަދަދު ދެ ގުނަ ވެގެންދާނެ ކަމަށް ގަވަނަރުނަރު ވިދާޅުވިއެވެ.
"މިހާރު ހަގީގަތުގައި ބޭންކުތަކުން އެމްއެމްއޭއަށް ނުލިބޭ އެންމެ ޑޮލަރެއް ވެސް. އެއާ ޚިލާފަށް ބޭންކުތަކަށް އަޅުގަނޑުމެން މުޅީން ވެސް މި ޑޮލަރު ދެނީ. މި ކަމުގެ ސަބަބުން ބޭންކުތަކަށް ޑޮލަރު އިތުރުވެގެން ދިޔައީމަ، ދިވެހި ރައްޔިތުންނަށް ވެސް ފައިސާ ލިބޭނެ، ވިޔަފާރިތަކަށް ވެސް ލިބޭނެ" ގަވަރުނަރު ވިދާޅުވިއެވެ.
ރާއްޖޭގައި އަމަލުކުރަމުން އައި ބޭރު ފައިސާއާއި ފައިސާ މާރުކުރުމުގެ ވިޔަފާރިއާ ބެހޭ ގަވާއިދަކީ މީގެ 37 އަހަރު ކުރީގެ ގަވާއިދެކެވެ. އެ ދެ ގަވާއިދު އުވާލައި، އައު ދެ ގަވާއިދަކަށް މިއަދު ވަނީ އަމަލުކުރަން ފަށައިފައެވެ.