ފަސް އަހަރުގެ މެދުކެނޑުމަކަށްފަހު ތިން ވަނަ ފަހަރަށް ބާއްވާ ލަބެރަ ބޮޑީބޯޑިން ޗެލެންޖްގެ ޑިޖިޓަލް ޕާޓްނަރެއްގެ ގޮތުގައި ދިރާގުން ސޮއިކޮށްފިއެވެ.
ލަބެރަ ބޮޑީބޯޑިން ޗެލެންޖަކީ މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)އިން އިންތިޒާމުކުރާ މޯލްޑިވްސް ނޭޝަނަލް ބޮޑީބޯޑިން ލީގު މުބާރާތްތަކުގެ ދެވަނަ މުބާރާތެވެ.
މިއަހަރުގެ ފުރަތަމަ މުބާރާތް ކަމުގައިވާ 2024ވަނަ އަހަރުގެ ބުރުނު ޝިކާރަ ބޮޑީބޯޑިން ޗެލެންޖަށް ރާއްޖޭގެ ބޮޑީބޯޑިން ކޮމިއުނިޓީއިން ވަރަށް ބޮޑު ތަރުހީބެއް ލިބިފައި ވާކަމަށް ދިރާގުން ވަނީ ބުނެފައެވެ.
މި މުބާރާތާ ގުޅިގެން ދިރާގުގެ މެނޭޖާ، ބްރޭންޑް އެންޑް އިވެންޓްސް ނައިޔާ ޝަރީފު ވިދާޅުވީ މޯލްޑިވްސް ބޮޑީބޯޑިން އެސޯސިއޭޝަނަށް އެހީތެރިވެ، 2024ވަނަ އަހަރުގެ ލަބެރަ ބޮޑީބޯޑިން ޗެލެންޖްގެ ޑިޖިޓަލް ޕާޓްނަރަކަށް ވުމަށް ލިބުނު ފުރުސަތާމެދު ވަރަށް އުފާވާކަމަށެވެ.
"މިފަދަ މުބާރާތްތައް ކުރިއެރުވުމުގެ ތެރެއިން، އަޅުގަނޑުމެންގެ މަގުސަދަކީ ރާއްޖޭގެ ކުޅުންތެރިންނަށް އެމީހުންގެ ހުނަރު ދައްކާލައި، ތަޖުރިބާ ހޯދައި، އަދި ވާދަވެރި ތަޖުރިބާ ބިނާކުރުމަށް މަގުފަހިކޮށްދިނުން" އޭނާ ވިދާޅުވިއެވެ.
އެމްބީބީއޭގެ ރައީސް ހުސައިން ނިޒާމް ވަނީ ރާއްޖޭގައި ބޮޑީބޯޑިން ކުޅިވަރު ތަރައްޤީކުރުމަށް ދިރާގުން ދެއްވާ އެހީތެރިކަމާއި ވަރުގަދަ އެއްބާރުލުމަށް ޝުކުރުއަދާކޮށްފައެވެ.
މިއަހަރުގެ ލަބެރަ ބޮޑީބޯޑިން ޗެލެންޖް ބޭއްވުމަށް ހަމަޖެހިފައިވަނީ މިއަދުން ފެށިގެން އަންނަ އޮކްޓޯބަރު މަހުގެ ފަސްވަނަ ދުވަހުގެ ނިޔަލަށް މާލޭގެ ވަރުނުލާ ރާޅުގަނޑުގައެވެ.
ދިރާގުން މިފަދަ އިވެންޓްތަކަށް އެހހީތެރިވެދެނީ ރާއްޖޭގެ ކުޅިވަރާއި މުނިފޫހިފިލުވުމުގެ މުޖުތަމައުތައް ވަރުގަދަކޮށް، އެފަރާތްތަކަށް އާ ފުރުސަތުތައް ހޯދައިދިނުމުގެ މަގުސަދުގައި ކަމަށް ދިރާގުން ވަނީ ބުނެފައެވެ.