މިއީ މޯލްޑިވްސް ޕޯސްޓް ލިމިޓެޑްގެ ސީނިއާ އީކޮމާސް އެގްޒެކެޓިވް، ފާރިޝާ ފަތުހުﷲގެ ލިޔުއްވުމެއްގެ ދިވެހި ތަރުޖަމާއެވެ.
ޗައިނާގެ 75 ވަނަ ގައުމީ ދުވަސް ފާހަގަކުރާއިރު، އެގައުމުގައި މިދިޔަ އަހަރުގެ ނޮވެމްބަރު 14އިން ޑިސެމްބަރު ހަތަރު ވަނަ ދުވަހާ ހަމައަށް ބޭއްވި ސެމިނާ އޮން އިކޮނޮމިކް އެންޑް ޓްރޭޑް ކޯޕަރޭޝަން ފޯ ޑެވެލޮޕިން ކަންޓްރީސްގައި އަޅުގަނޑަށް ކުރެވުނު ތަޖުރިބާ ހިއްސާކުރުމުގެ ޝަރަފު ލިބިގަންނަމެވެ. ޗައިނާގެ ކޮމާސް މިނިސްޓްރީން އިންތިޒާމު ކުރި މި ސެމިނާގައި އެގައުމުގެ އިގުތިސާދީ ކުރިއެރުމާ ގުޅޭ ގޮތުން މައުލޫމާތު ލިބިގަނެ، ރާއްޖެއާއި ޗައިނާއާ ގުޅިގެން މަސައްކަތް ކުރެވޭނެ ގޮތްތަކާ ގުޅޭ ގޮތުން މަޝްވަރާކުރެވުނެވެ.
މޯލްޑިވްސް ޕޯސްޓް ލިމިޓެޑްގައި މަސައްކަތް ކުރުމުގެ ކުރިން އަޅުގަނޑު މިނިސްޓްރީ އޮފް އިކޮނޮމިކް ޑެވެލޮޕްމެންޓް އެންޑް ޓްރޭޑްގައި އެސިސެންޓެންޓް ޑިރެކްޓަރެއްގެ ގޮތުގައި މަސައްކަތް ކުރީމެވެ. އަޅުގަނޑު ޗައިނާގެ ސެމިނާގައި ބައިވެރިވީ އެ ވަޒީފާގައި އުޅެމުން ކަމަށްވާއިރު، އެ ސެމިނާއިން ޗައިނާގެ އިގުތިސާދީ ސްޓްރެޓެޖީތަކާއި ދެ ގައުމުން ގުޅިގެން މަސައްކަތް ކުރެވޭނެ ގޮތްތަކާ ބެހޭ މައުލޫމާތު ލިބުނެވެ.
އެ ސެމިނާގައި ތަރައްގީވަމުން އަންނަ އެކި ގައުމުތަކުން މީހުން ބައިވެރިވިއެވެ. އަދި ޗައިނާއަށް އިގުތިސާދީ ގޮތުން އައިސްފައިވާ ބަދަލާއި ބައިނަލްއަގުވާމީ ވިޔަފާރީގައި އެގައުމުން އަމަލު ކުރާ ގޮތާ ގުޅޭ ގޮތުން، ލެކްޗާތަކާއި، ކޭސް ސްޓަޑީތަކާއި، ކަމާ ގުޅުން ހުރި ތަންތަނަށް ޒިޔާރަތްކޮށްގެން އަޅުގަނޑުމެންނަށް މައުލޫމާތު ލިބުނެވެ.
ސެމިނާ އޮން އިކޮނޮމިކް އެންޑް ޓްރޭޑް ކޯޕަރޭޝަން ފޯ ޑެވެލޮޕިން ކަންޓްރީސްގެ ބައިވެރިން --
އެ ސެމިނާއިން އެންމެ ބޮޑަށް ފާހަގަވި އެއް ކަމަކަށް ދަސްވީ، ޗައިނާއިން ގެނައި ވިޔަފާރިއާ ގުޅުންހުރި އިސްލާހުތަކެވެ. އެގޮތުން ޗައިނާގެ އިގުތިސާދީ ކުރިއެރުމުގައި އުމްރާނީ ތަރައްގީއާއި ޓެކްނޮލޮޖީއާއި ބައިނަލްއަގުވާމީ ވިޔަފާރިން އަދާކޮށްފައިވާ މުހިންމު ރޯލު އަޅުގަނޑުމެންނަށް އެނގުނެވެ.
މީގެ އިތުރުން ތަރައްގީވަމުން އަންނަ ގައުމުތަކާއި ޗައިނާއިން ގުޅިގެން މަސައްކަތް ކުރެވެން އޮތް ފުރުސަތުތަކަށް ވެސް ސެމިނާގައި އަލިއަޅުވާލިއެވެ. އެގޮތުން ދެ ފަރާތަށް ވެސް ފައިދާވާ ގޮތަށް، ވިޔަފާރި ފަހިކުރުމާއި އިންވެސްޓްމެންޓު އިތުރު ކުރުމާއި ޓެކްނޮލޮޖީ އާއި ގާބިލުކަން އިތުރުކުރުން ފަދަ ކަންކަން ކުރެވޭނެކަން ފާހަގަކުރެވުނެވެ.
ދިވެއްސެއްގެ ހައިސިއްޔަތުން، ޗައިނާއިން ބައިނަލްއަގުވާމީ ގޮންޖެހުންތަކާ މެދު އަމަލު ކުރާ ގޮތާއި ދެމެހެއްޓެނިވި ތަރައްގީއެއް ގެނައުމަށް ކުރާ މަސައްކަތުގެ ތަޖުރިބާއަށް އަޅުގަނޑު ޝައުގުވެރިވިއެވެ. އެގޮތުން، ތިމާވެށި ރައްކާތެރިކޮށް، އިޖުތިމާއީ ހަމަހަމަކަން ވެސް ދެމެހެއްޓުމާއެކު ތަރައްގީ ގެނައުމަށް ޗައިނާއިން ކުރާ މަސައްކަތްތަކާ ގުޅޭ މުހިންމު މައުލޫމާތުތަކެއް އަޅުގަނޑުމެންނަށް ލިބުނެވެ.
ތަރައްގީވަމުން އަންނަ ގައުމުތަކަށް އަމާޒުކޮށް، އިގުތިސާދީ އަދި ވިޔަފާރީގެ އެއްބާރުލުމާ ގުޅޭ ގޮތުން ބޭއްވި ސެމިނާއަކީ ޗައިނާގެ އިގުތިސާދަށް އައިސްފައިވާ ބަދަލުތަކާއި އެގައުމުން ބައިނަލްއަގުވާމީ ގޮތުން އަދާކުރާ މަގާމާ ގުޅޭ ގޮތުން މައުލޫމާތު މުއްސަނދިކޮށްދިން ސެމިނާއެކެވެ. ރާއްޖެއިން އިގުތިސާދު ކުރިއަރުވައި ތަރައްގީވުމަށް މަސައްކަތް ކުރަމުން އަންނައިރު، ޗައިނާއާއެކު ގުޅުން ބަދަހިކުރުމަކީ ތަރައްގީއައި ތަމައްދުނުކަމަށް ފުރުސަތުތައް ފަހިކޮށްދޭނެ ކަމެއް ކަމަށް އަޅުގަނޑު ގަބޫލުކުރަމެވެ.