ލަންޑަން (29 ސެޕްޓެމްބަރު 2024) : 2021 ވަނަ އަހަރުގައި ކޮވިޑް-19ގެ ވަބާ އެންމެ ނުރައްކާތެރިވި ދުވަސްވަރު ކޮވިޑްގެ ވެކްސިން އިނގިރޭސިވިލާތުގައި ނެތިފައި ޕޮލެންޑްގައި އެވެކްސިން ހުރިކަން ޖާސޫސީ މައުލޫމާތުތަކުން އެނގުމުން އެ ވެކްސިންގެ ގިނަ ޑޯޒުތަކެއް ވަގަށް ނަގަން އިނގިރޭސިވިލާތުން ރޭވިކަމަށް އެ ގައުމުގެ އޭރުގެ ބޮޑުވަޒީރު ބޮރިސް ޖޯންސަން ވިދާޅުވެއްޖެއެވެ.
ޖޯންސަން އާ ހަވާލާދީ، ލަންޑަންގައި ނުކުންނަ "ދަ ގާޑިއަން" ނޫސް ބުނާގޮތުން ޕޮލެންޑްގެ ގުދަނެއްގައި "އެސްޓްރާ ޒެނިކާ" ބްރޭންޑްގެ ކޮވިޑް ވެކްސިން ގިނަ އަދަދަކަށް ހުރިކަން އިނގިރޭސި ޖާސޫސީ އިދާރާއިން ޖޯންސަންއަށް އެންގިއެވެ. މިއާއެކު ޕޮލެންޑަށް ސިއްރިޔާތުގައި ވަދެ އެ ގުދަނުން ކޮވިޑް ވެކްސިންގެ ގިނަ އަދަދެއްގެ ޑޯޒް ވަގަށް ނެގުމަށްޓަކައި އިނގިރޭސި ސިފައިން ޚާއްސަ އޮޕަރޭޝަނެއް ހިންގުމާބެހޭގޮތުން އެ ދުވަސްވަރު އޭނާ އިސްކޮށް ހުންނަވައިގެން އިނގިރޭސި ލަޝްކަރުތަކުގެ އެންމެ އިސްވެރިންނާ މަޝްވަރާ ކުރެއްވިއެވެ.
ޖޯންސަން ވިދާޅުވިގޮތުގައި ކޮވިޑަށް ވެކްސިން ނުލިބި އިނގިރޭސި ރައްޔިތުންގެ އެތައް ހާސްބަޔަކު އެ ބަލީގައި މަރުވަމުންދާއިރު ތަނަކުން ވައްކަން ކޮށްގެން ވެސް އެ ވެކްސިން ހޯދުމަކީ އިނގިރޭސި ސަރުކާރުން އޭރު ދުށްގޮތުގައި ގާނޫނީ ގޮތުން ކުރުން ހުއްދަވާނެ ކަމެކެވެ. އެއީ އެތައް ލައްކަ ބައެއްގެ ފުރާނަ ސަލާމަތް ކުރުމަށެވެ.
ނަމަވެސް ބައިނަލްއަގްވާމީ ގާނޫނަށް ބަލާއިރު އެއީ ގައުމަކުން އަނެއްގައުމަކާ ދެކޮޅަށް ހިންގާ ވައްކަމުގެ އަމަލަކަށްވުމުގެ އިތުރުން އެއީ ޓެރަރިޒަމްގެ އަމަލަކަށްވެސް ވެދާނެކަމުގެ ކަންބޮޑުވުން މި މަޝްވަރާތަކުގައި ފާޅުކުރިއެވެ.
ސިއްރުން މިކަން ކުރަން އުޅެނިކޮށް ފަޅާއަރައިފިނަމަ އެކަމުގެ ސަބަބުން އިނގިރޭސިވިލާތުގެ އަގުވެސް ދުނިޔޭގެ ކުރިމަތީގައި ވަރަށް ބޮޑަށް ވެއްޓި ޔޫރަޕްގެ އިއްތިހާދުގެ ގައުމުތަކުން އިނގިރޭސިވިލާތާ ދެކޮޅަށް ދަތިކުރުމުގެ ފިޔަވަޅު އަޅާފާނެކަމުގެ ކަންބޮޑުވުން ވެސް އެ މަޝްވަރާތަކުގައި ބައިވެރިވި އިސްފަރާތްތަކުގެ މެދުގައި އޮތްކަން ޖޯންސަން ވަނީ އޭނާގެ "މެމްއޮއި" ނުވަތަ ބައޮގްރަފީގައި ހާމަކުރައްވާފައެވެ.
ޖޯންސަންގެ މި ބައޮގްރަފީ ވަރަށް އަވަހަށް ނުކުންނާނެއެވެ. އޭގައި އޭނާގެ ސަރުކާރުގެ މިފަދަ އަޖައިބު ކުރަނިވި ބައެއް ސިއްރުތައް ހުންނާނެކަމަށް ވިދާޅުވެ މި ފޮތް ވިއްކުމަށް ޖޯންސަން މިހާރު ކުރައްވަމުން ގެންދަވާ އިޝްތިހާރުތަކުގައި އޭނާ ވަނީ ވާހަކަ ދައްކަވާފައެވެ.
ޖޯންސަން ވިދާޅުވިގޮތުގައި އިނގިރޭސިވިލާތް ޔޫރަޕްގެ އިއްތިޙާދުން ވަކިވުމަށްފަހު (ބްރެކްސިޓްއަށްފަހު) ޔޫރަޕްގެ އިއްތިޙާދުގެ ގައުމުތައް ބޭރުފުށުން ޑިޕްލޮމެޓިކްކޮށް އިނގިރޭސިވިލާތާ މުއާމަލާތް ކުރިނަމަވެސް އެތެރެއިން ގިނަ ގައުމުތައް ގެންދިޔައީ ކުރެވުނުހާ ފިއްތުންތަކަކާ ކުރެވުނުހާ ޖެއްސުމެއް އިނގިރޭސިވިލާތަށް ކުރަމުންނެވެ. އަދި ބޮޑު ހަސަދަގަނޑެއް ބާލައި އިނގިރޭސިވިލާތް ނިކަމެތި ކުރަން މަސައްކަތް ކުރަމުންނެވެ.
ޖޯންސަން ވިދާޅުވި ގޮތުގައި ޕޮލެންޑް ސަރުކާރުން ކޮވިޑް-19 ގެ "އެސްޓްރާ ޒެނިކާ" ބްރޭންޑްގެ އެތައް މިލިޔަން ޑޯޒެއްގެ ވެކްސިން ރައްކާކޮށްފައިވަނީ އެ ގައުމުގެ ސަރަހައްދެއްކަމަށްވާ "ލީޑަން" ގައިކަން ޖާސޫސީ މައުލޫމާތުތަކުން ވަނީ ހާމަވެފައެވެ.
ޖޯންސަން އިތުރަށް ވިދާޅުވިގޮތުގައި ގްރިޑް ރަބަރު ބޯޓުތަކެއްގައި ޑަޗް ކެނެލްތައް ހުރަސްކޮށްގެން މި ވެކްސިންތަކުގެ ބައެއް ވަގަށް ނެގުމަށް ވަރަށް މޮޅު ރޭވުމެއް އޭނާގެ އެދުމުގެ މަތިން އިނގިރޭސި ސިފައިންނާއި ޖާސޫސީ އިދާރާ ގުޅިގެން ރޭވިއެވެ.
އޭރު އިނގިރޭސި ލަޝްކަރުތަކުގެ ޑެޕިއުޓީ ޗީފް އޮފް ސްޓާފް ޖެނެރަލް ޑައުގް ޗާލްމާސް އެ ޕްލޭނަށް ފުރަތަމަ ތާއީދުކުރެއްވި ނަމަވެސް ފަހުން އޭނާ ވަނީ އެއީ ވަރަށް ރިސްކީ ޕްލޭނެއްކަމަށް ވިދާޅުވެ ފަޅާނާރާގޮތަށް އެޕްލޭން ތަންފީޒު ކުރުމަކީ ވަރަށް ދަތިކަމެއްކަން ބަޔާން ކުރައްވާފައެވެ.
ނެދަލޭންޑްސްއަކީ ނޭޓޯގައި އިނގިރޭސިވިލާތުގެ ދިފާއީ ބައިވެރިއެއްކަމުން ނޭޓޯގެ ގައުމަކާ ދެކޮޅަށް މިފަދަ އަމަލެއް ހިންގުމަކީ ނޭޓޯ ބައިބައިވެގެން ހިނގައިދާނެ ކަމަކަށްވާތީ އެ ޕްލޭން ތަންފީޒު ނުކުރުމަށް ފަހުން ނިންމީއެވެ. އަދި ވައްކަން ކުރުމަށް އެ ޕްލޭން ތައްޔާރު ކުރުމަކީ ކުރެވުނު ބޮޑު މޮޔަކަމެއްކަމުގެ އިހްސާސްވެސް ފަހުން ކުރެވިގެން އެކަމާ ވަރަށް ބޮޑަށް ދެރަވެ ލަދުވެސް ގަތްކަމަށް ޖޯންސަން އާ ހަވާލާދީ "ދަ ގާޑިއަން" ނޫސް ބުނެއެވެ.
ބޮރިސް ޖޯންސަން އަކީ ޖޯކުކަންކަން ކުރައްވާފައިވާ ބޭފުޅެކެވެ. އިނގިރޭސި ބޮޑުވަޒީރުކަމުގައި ހުންނެވި ދުވަސްވަރު އޭނާ ވަނީ ވަރަށް ފޭކު އަދި ގާނޫނާ ޚިލާފު ވަރަށް ދަށުދަރަޖައިގެ ކަންކަން ކުރައްވާފައެވެ.
މީގެތެރޭގައި ބޮޑުވަޒީރުގެ އޮފީސް (ޑައުނިންގް ސްޓްރީޓް10) ގައި ކޮވިޑްގެ ދުވަސްވަރު އޭނާގެ އޮފީހުގެ ގިނަ އަދަދެއްގެ މުވައްޒަފުން އެއްކޮށްގެން ކޭކުފެޅުމުގެ ޕާޓީއެއް ބާއްވައި ގައިގޯޅިކޮށް މަޖާނެގުމުގެ މަޖާގަނޑެއް ގާނޫނަށް ގޮންޖަހާފައި ބޭއްވި މައްސަލަ ހިމެނެއެވެ.
އެ ދުވަސްވަރަކީ ކޮވިޑްގެ ސަބަބުން އިޖްތިމާއީ ގައިދުރުކަން ބޭއްވުމަށާއި ގައިގޯޅިކޮށް އުޅުން އިނގިރޭސިވިލާތުގައި މުޅިން މަނާކޮށްފައިވާ ދުވަސްވަރެކެވެ. އެހެންކަމުން ބޮޑުވަޒީރުކަމުގައި ހުންނަވަނިކޮށް ބޮރިސް ޖޯންސަން މި މައްސަލާގައި ވަރަށް ބޮޑަށް ކުށްވެރިވެގެން ދިޔައެވެ.
މިކަން މަޝްހޫރުވެފައިވަނީ "ޕާޓީގޭޓް" ގެ ނަމުންނެވެ. އެ ހަފްލާގައި އޭރު ޖޯންސަންގެ މުސްތަޝާރު އަދި ފަހުން އިނގިރޭސި ބޮޑުވަޒީރުކަން ކުރެއްވި ރިޝީ ސްނާކް ވެސް ބައިވެރިވެ ވަޑައިގެންފައިވެއެވެ. މި މައްސަލާގެ ސަބަބުން ޖޯންސަންގެ އަގު ވަރަށް ބޮޑަށް ވެއްޓިގެން ދިޔައެވެ.