މާލޭގެ މަގުތަކުގައި ގަވާއިދާ ޚިލާފަށް ޕާކުކޮށްފައި ހުރި އުޅަނދުތައް ނެގުމުގެ މަސައްކަތް ކުރަމުން އަންނަ ކަމަށް ފުލުހުން މިއަދު ބުނެފިއެވެ.
ފުލުހުން އެކްސްގައި ކުރި ޕޯސްޓެއްގައި ބުނީ، ނުގަވާއިދުން ޕާކުކޮށްފައި ހުރި އުޅަނދުތައް ނަގަނީ، މާލޭގެ މަގުތަކަކީ އަމާން، ރައްކާތެރި ތަނަކަށް ހަދައި، މަގުތައް ތަރުތީބު ކުރުމަށް ޓަކައި ކުރެވެމުންދާ މަސައްކަތުގެ ތެރެއިން ކަމަށެވެ.
މާލޭގެ މަގުތަކުގައި ޕާކުކޮށްފައިވާ ބޭނުން ނުކުރާ ބާ އުޅަނދުތައް މާލެ ސިޓީ ކައުންސިލުން ވެސް އަންނަނީ ނަގަމުންނެވެ. އޭގެ ތެރެއިން ހަލާކުވުމުން މަގުތަކަށް ދޫކޮށްލާފައިހުރި 224 ސައިކަލެއް މާލޭގެ މަގުތަކުން އެއް ދުވަސް މަތިން ނަގާފައިވާ ކަމަށް ސިޓީ ކައުންސިލުން މީގެ ކުރިން ބުނެފައިވެއެވެ.
ސިޓީ ކައުންސިލުން މައުލޫމާތުދީފައިވާ ގޮތުގައި، އެ ކައުންސިލުން މި ހަރަކާތް ކުރިޔަށް އޮތް ތަނުގައި ވެސް ކުރިޔަށް ގެންދާނެއެވެ. އެއީ މާލޭގެ މަގުތަކުގައި ބާވެ، ކުންޏަށްވެފައިވާ އުޅަނދުތައް ހުރުމުގެ ސަބަބުންނެވެ.
ވެރިރަށް މާލޭގެ މަގުތަކުގެ 65 ޕަސެންޓު އަބަދު ވެސް ހިފައިފައި އޮންނަނީ ޕާކުކޮށްފައި އޮންނަ އުޅަނދުތަކުން ކަމަށާއި، މި ކަމުގެ ސަބަބުން މަގުމަތީގެ އެކްސިޑެންޓުތައް އިންތިހާއަށް އިތުރުވަމުންދާ ކަމަށް ޓްރާންސްޕޯޓު މިނިސްޓްރީން މީގެ ކުރިން ވަނީ ބުނެފައެވެ.
ދާދިފަހުން ފުލުހުންނާއި އެޗްޑީސީ ގުޅިގެން ވަނީ ހުޅުމާލޭ މަގުތަކުގައި ހުރި ބާ އުޅަނދުތައް ވެސް ނަގައިފައެވެ. އަދި ވެހިކަލް ޕާކް ކުރުމަށް ހުޅުމާލެއިން ބޮޑު ބިމެއް ވަނީ ދައްކައިފައެވެ.