މިދިޔަ އަންގާރަ ދުވަހު މާފުށި ޖަލުގައި ދަންޖެހިގެން މަރުވި މާލެ، ގ. އެއްތެޔޮމާގޭ ޢަބްދުލް ޣަނީ އިސްމާޢީލް، 62، ގެ ހަށިގަނޑު ޕޯސްޓްމޯޓަމް ހެދުމަށް ރާއްޖޭން ބޭރަށް ފޮނުވައިފިއެވެ.
އޭނާ ޝަރީއަތް ނިމެންދެން ބަންދުކޮށްފައި ހުރީ 15 އަހަރުގެ ކުޑަކުއްޖަކަށް ޖިންސީ ގޯނާ ކުރި މައްސަލައެއްގައެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، އޭނާގެ ހަށިގަނޑު ޕޯސްޓްމޯޓަމް ހަދަން އިއްޔެ ރާއްޖޭން ބޭރަށް ފޮނުވާފައިވާ ކަަމަށެވެ.
ކަރެކްޝަންސް އިން އަންގާރަ ދުވަހު ބުނީ، އެ ދުވަހު ހެނދުނު 6:52 ގައި ޢަބްދުލް ޣަނީ އިސްމާޢީލްގެ ގޮޅީގައި ދަންޖެހިފައި ހުއްޓާ ފެނުމުން، ވަގުތުން އޭނާ މާފުށީ ހޮސްޕިޓަލަށް ގެންދިޔަ ކަމަށެވެ. އޭނާ މަރުވެފައިވާ ކަމަށް ޑޮކްޓަރު ކަނޑައެޅީ 7:21 ގައި ކަމަށް ކަރެކްޝަންސްއިން ބުންޏެވެ.
އެ މީހާއަކީ މީގެ ކުރިން ވެސް ކުށުގެ ރިކޯޑު އޮތް މީހެއް ކަމަށްވާއިރު، މި މައްސަލަ ކަރެކްޝަންސްގެ ޕްރޮފެޝަނަލް ސްޓޭންޑަޑުން އަންނަނީ ތަހުގީގު ކުރަމުންނެވެ.
މި ހާދިސާއާ ގުޅިގެން އިދިކޮޅު ޕާޓީ އެމްޑީޕީން ވަނީ ސަރުކާރުގެ ކަމާ ބެހޭ ފަރާތްތަކުގެ އިހުމާލު އޮތް ކަމަށް ބެލުމުގެ ޖާގަ އޮތް ކަމަށް ތުހުމަތުކޮށް، އެ މައްސަލައިގެ މިނިވަން ތަހުގީގެއް ހިންގުމަށް ގޮވާލާފައެވެ.
މި ފަހުން ލޯބިވެރިޔާ ރަހީނުކޮށް، ވަޅިން ބިރުދެއްކި މައްސަލައެއްގައި ހައްޔަރުކުރި އާދަމް އަތުހަރު ވެސް ވަނީ ދޫނިދޫ ކަސްޓޯޑިއަލްގައި ހުއްޓާ ދަންޖެހިގެން މަރުވެފައެވެ.