ލޮނުފެނުން މަސްފިނިކުރާ ނިޒާމު ނުވަތަ އާރުއެސްޑަބްލިޔު ސިސްޓަމް އެޅުމަށް ހުޅުވާފައިވާ ލޯނާ ގުޅޭ މަޢުލޫމާތު ގއ. ގެމަނަފުށި އޮޑިވެރިންނަށާއި މަސްވެރިންނަށާއި ކައުންސިލު މުވައްޒަފުންނަށް ދިނުމަށް ބައްދަލުވުމެއް ބާއްވައިފިއެވެ.
މި ބައްދަލުވުން އިއްޔެ ބާއްވާފައި ވަނީ ގއ.ގެމަނަފުށީގެ ކައުންސިލް އިދާރާގައެވެ.
ލޮނުފެނުން މަސް ފިނިކުރާ މި މަޝްރޫޢުގެ ދަށުން 100 ވަރަކަށް ދޯނީގައި އާރުއެސްޑަބްލިޔު ސިސްޓަމް އެޅުމަށް ލޯނު ދޫކުރުމަށް ވަނީ ހަމަޖެހިފައެވެ. މި ސިސްޓަމާއި ޖަނަރޭޓަރާއި ސޯލާ ގަތުމަށް ހޭދަކުރާ އަގުގެ 35 އިންސައްތަ އޮޑިވެރިން އަބުރާ ދައްކަން ނުޖެހޭނެ ކަމަށް މިނިސްޓްރީއިން ވަނީ ބުނެފައެވެ.
އަދި އިސްލާމީ ޝަރީއާ ހަމަތަކުގެ މަތިން ކުރިޔަށް ގެންދާ މި ލޯނު ދެއްކުމަށް 10 އަހަރުގެ މުއްދަތެއް ލިބޭނެ ކަމަށް ވެސް މިނިސްޓްރީއިން ވަނީ ބުނެފައެވެ.
ލޮނުފެނުން މަސް ފިނިކުރާ ނިޒާމް ފެސިލިޓީއަށް ހަ މަސްދުވަހުގެ ގްރޭސް މުއްދަތެއް ވެސް ލިބޭނެ ކަމަށް ފިޝަރީޒް މިނިސްޓްރީއިން ވަނީ ބުނެފައެވެ.