ފުލުހަކަށް ހަމަލާދީ މަރާލި މައްސަލައިގައި ހައިކޯޓުން މަރަން ހުކުމް ކުރި ކ. ކާށިދޫ މުހައްމަދު ސަމާހުގެ ހުކުމް ބާތިލުކޮށް، ކްރިމިނަލް ކޯޓުން އަލުން މައްސަލަ ބަލަން މިއަދު ހުކުމްކޮށްފިއެވެ.
ޖުލައި 23، 2012ގައި އެ ހާދިސާ ހިނގިއިރު، ސަމާހު ހުރީ ގޭބަންދުގައެވެ. އޭނާ ފުލުސް އޮފިސަރު އާދަމް ހަލީމަށް ހަމަލާ ދިނީ އޭނާ ގޭބަންދުގެ ޝަރުތުތަކާ ޚިލާފުވުމާ ގުޅިގެން ޕޮލިސް ސްޓޭޝަން ހާޒިރުވާން އެންގުމުންނެވެ. އެގޮތުން އެކަމާ ނުރުހުންވެ ވަޅިން އާދަމް ހަލީމަށް ހަމަލާ ދިނުމުން ލިބުނު އަނިޔާގައި އޭނާ ނިޔާވީއެވެ.
އެ މައްސަލައިގައި ސަމާހު މަރަން ކްރިމިނަލް ކޯޓުން ހުކުމްކުރީ ޖެނުއަރީ 2013ގައެވެ. އެ ހުކުމަށް 2020ގައި ހައިކޯޓުން ވަނީ ތާއިދުކޮށްފައެވެ.
އެ މައްސަލައިގެ އިސްތިއުނާފުގައި ވަނީ ފުލުހުން ސަމާހަށް އަނިޔާކޮށްފައިވާ ކަމަށް ތުހުމަތުކޮށްފައެވެ.
ސުޕްރީމް ކޯޓުން މިއަދު ބޭއްވި އިސްތިއުނާފީ އަޑުއެހުމުގައި ފަނޑިޔާރު ހުސްނުއްސުއޫދުގެ ރައުޔުގައި ވަނީ، އެ މައްސަލައިގައި ސަމާހަށް އަނިޔާކުރިކަން އެނގޭނެ ހެކިން ތިބި ކަމަށާއި އެ ހެކިން ޝަރީއަތުގެ މަޖިލީހަށް ހާޒިރު ކުރަން އެދޭ ކަމަށް ކްރިމިނަލް ކޯޓުގައާއި ހައިކޯޓުގައި އޭނާ ބުނެފައިވާ ކަމަށެވެ.
އެފަދަ ހެކިން ތިބި ނަމަ އެ ހެކިން ކްރިމިނަލް ކޯޓުގެ ޝަރީއަތަށް ހާޒިރު ކުރުމުގެ ފުރުސަތު އޭނާއަށް ދިނުމަށާއި އެ މައްސަލައިގައި އެހެނިހެން ހެއްކާއި ގަރީނާ ހުށަހެޅުމަށް ޕްރޮސެކިއުޝަނަށް ފުރުސަތު ދިނުމާއެކު، އެ މައްސަލަ އަލުން ބަލަން ކްރިމިނަލް ކޯޓަށް އަމުރުކުރަން ފެނިވަޑައިގަންނަވާ ކަމަށް ހުސްނުއްސުއޫދު ވިދާޅުވިއެވެ.
އެ މައްސަލަ އަލުން ބަލަން ކްރިމިނަލް ކޯޓަށް ފޮނުވަން ޖެހޭ ކަމަށް މައްސަލަ ބެއްލެވި ފަސް ފަނޑިޔާރުން ވެސް އިއްތިފާގުވެވަޑައިގަތެވެ.
އެ މައްސަލަ ބެއްލެވި ފަނޑިޔާރުންގެ ތެރޭގައި ހިމެނިވަޑައިގެންނެވީ ހުސްނުއްސުއޫދުގެ އިތުުރުން ފަނޑިޔާރު އަޒްމިރަލްދާ ޒާހިރު، ފަނޑިޔާރު އައިޝާ ޝުޖޫން މުހައްމަދު، ފަނޑިޔާރު މަހާޒް އަލީ ޒާހިރު އަދި ފަނޑިޔާރު މުހައްމަދު އިބްރާހީމެވެ.