އިސްރާއީލުން ހިފާފައިވާ ހުޅަނގު އައްސޭރީގެ ރާމަﷲ ސިޓީގައި ހުންނަ އަލް ޖަޒީރާގެ އޮފީހަށް އިސްރާއީލު ސިފައިން ވަދެ، އެ ބިއުރޯ ބަންދުކުރަން އަމުރުކޮށްފިއެވެ.
އަލްޖަޒީރާއިން ވަނީ އެމީހުންގެ އަރަބި ޗެނަލު 45 ދުވަހަށް ބަންދުކުރުމަށް އިސްރާއީލުން އަމުރުކުރާ ފޫޓޭޖްތައް ލައިވްކޮށް ދައްކާފައެވެ. އިސްރާއީލު ސިފައިން މީގެކުރިން މެއި މަހުވެސް ވަނީ އިރުމަތީ ޤުދުސްގައި ހުންނަ އަލް ޖަޒީރާ އޮފީހަށްވަދެ، އެތަނުގައި ހުރި ސާމާނުތައް އަތުލައި، އެ ޗެނަލް ބްލޮކްކޮށްފައެވެ.
އެއީ އިސްރާއީލުން އެގައުމުގައި ހަރަކާތްތެރިވާ ބޭރުގެ ނޫސް އޭޖެންސީއެއް ބަންދުކުރި ފުރަތަމަ ފަހަރެވެ. ނަމަވެސް އަލްޖަޒީރާއިން ވަނީ އިސްރާއީލުން ހިފާފައިވާ ހުޅަނގު އައްސޭރިއާއި ޣައްޒާ ސްޓްރިޕްގައި ވެސް އެ ޗެނަލް ބްރޯޑްކާސްޓުކޮށް ވަގުތުން ވަގުތަށް ޚަބަރުތައް ގެނެސްދިނުން ކުރިއަށް ގެންގޮސްފައެވެ.
އަލް ޖަޒީރާއިން މިހާރުވެސް އަންނަނީ އަވަށްޓެރި އުރުދުންގެ ވެރިރަށް އައްމާނުން ވަގުތުން ޚަބަރުތައް ގެނެސްދެމުންނެވެ.
އޭބީސީ ނޫހުން ބުނީ ހަތިޔާރު އެޅި އިސްރާއީލުގެ ސިފައިން އެ އޮފީހަށް ވަދެ ލައިވް އޮން އެއާގައި ނޫސްވެރިން ތިއްބައި، އެތަން ބަންދުކުރާނެ ކަމަށްބުނެ، މުވައްޒަފުން ވަގުތުން ނުކުންނަން އެންގިއެވެ.
އަލްޖަޒީރާގެ ލޯކަލް ބިއުރޯގެ ވެރިޔާ ވަލީދު އަލް އުމަރީ ވިދާޅުވި ގޮތުގައި އެ ސަރަހައްދުން ކަރުނަ ގޭހާއި ބަޑިޖެހުން އަޑު އިވެމުން އޭރުވެސް ދެއެވެ. އަދި އިސްރާއީލު ސިފައިން ބިއުރޯގައި ހުރި ލިޔެކިޔުންތަކާއި ސާމާނު އަތުލަން ފެށި ކަމަށްވެސް އޭނާ ވިދާޅުވިއެވެ.
ފަލަސްތީނުން ޣައްޒާއާއި ހިފާފައިވާ ހުޅަނގު އައްސޭރީގެ ބައެއް ހިސާބުތަކުގައި 1993 ވަނަ އަހަރު އޮސްލޯ އެއްބަސްވުންތަކުގެ ދަށުން އަމިއްލަ ވެރިކަމެއް ކަށަވަރުކޮށްފައި އޮތް ނަމަވެސް ހުޅަނގު އައްސޭރީގެ ބޮޑު ސަރަހައްދެއް ހިފާ ކޮންޓްރޯލް ކުރަނީ އިސްރާއީލުންނެވެ. ނަމަވެސް ރަމަالله އޮތީ ފަލަސްތީނުގެ ސިޔާސީ އަދި ސަލާމަތީ ފުރިހަމަ ކޮންޓްރޯލްގެ ދަށުގައިކަން ފާހަގަކޮށްލެވެއެވެ.
ފަލަސްތީނުގެ ނޫސްވެރިން ވަނީ އިސްރާއީލުގެ އެ އަމުރު ކުށްވެރިކޮށްފައެވެ.
އިސްރާއީލުން ބުނާ ގޮތުގައި އަލް ޖަޒީރާއަކީ އެމީހުންގެ ދުޝްމަނެކެވެ.
އަލް ޖަޒީރާއަށް ދަތިކޮށް ފިޔަވަޅު އެޅުމަކީ އާންމު ކަމެކެވެ. އެމެރިކާ ސަރުކާރުން 2003 ވަނަ އަހަރު އިރާގު ހިފުމުގެ ތެރޭގައި އިރާގުގެ އޭރުގެ ވެރިޔާ ސައްދާމް ހުސެއިން ވެރިކަމުން ވައްޓާލުމާއި އަލްޤައިދާގެ ވެރިޔާ އުސާމާ ބިން ލާދިންގެ ވީޑިއޯތައް ދެއްކުމުންވެސް އަލް ޖަޒީރާ ބްލޮކް ކުރިއެވެ.
މެދު އިރުމަތީގެ ބައެއް ގައުމުތަކުންވެސް ވަނީ އަލް ޖަޒީރާ ބްރޯޑްކާސްޓު ކުރުން ހުއްޓާލައިފައެވެ.
އެގޮތުން އެންމެ ފާހަގަކޮށްލެވޭ ކަމަކީ 2013 ވަނަ އަހަރު ރައީސް މުހައްމަދު މުރުސީއާ ދެކޮޅަށް ގިނަ ބަޔަކު ކުރި މުޒާހަރާތަކާ ގުޅިގެން އަސްކަރިއްޔާއިން އެ ގައުމުގެ ވެރިކަމާ ހަވާލުވުމަށް ފަހު، އަލް ޖަޒީރާއިން އޮޕަރޭޓިން ބޭސްއެއްގެ ގޮތުގައި ބޭނުންކުރި ލަގްޒަރީ ހޮޓަލަކަށް މިސްރުގެ ކަމާބެހޭ ފަރާތްތަކުން ވަދެގަތުމެވެ. އެފަހަރު އަލް ޖަޒީރާގެ ތިން މުވައްޒަފަކަށް 10 އަހަރުގެ ޖަލު ހުކުމެއް އިއްވި ނަމަވެސް ބައިނަލްއަގްވާމީ ގޮތުން ގިނަ ބައެއްގެ ފާޑުކިޔުންތަކާ ގުޅިގެން 2015 ވަނަ އަހަރު އެމީހުން ވަނީ ދޫކޮށްލާފައެވެ.