ޗައިނާގެ ޓެކްނޮލޮޖީ އެންމެ ގަދަރުވެރި ކުންފުނި ވާވޭއިން އެޕަލްގެ އައިފޯން 16 އާ ވާދަކުރާނެ އައު ސްމާޓްފޯނެއް ނެރުމަށް ތައްޔާރުވަމުންދާ ކަމަށް ހާމަކޮށްފިއެވެ.
މި ފޯނުގެ ޕްރީއޯޑަރު އަދަދު މިހާރު ވަނީ ތިން މިލިއަނަށްވުރެ އިތުރުވެފައެވެ.
ޗައިނާގެ ވާވޭގެ ކޮންސިއުމަރު ބިޒްނަސްގެ ޗެއާމަން ރިޗަޑް ޔޫ ވިދާޅުވެފައިވަނީ އައު ޕްރޮޑަކްޓްތަކެއް މިއަދު ތަޢާރަފުކުރާނެ ކަމަށެވެ. މީގެ ތެރޭގައި ތިން ފަށަލައިގެ ސްކްރީނެއް ހިމެނޭ "މޭޓް އެކްސްޓީ" ފޯނު ހިމެނޭ ކަމަށް ބެލެވެއެވެ.
ވާވޭއިން މި ފޯނުތައް ނެރެން މި އުޅެނީ އެޕަލްގެ އައިފޯން 16 އާ ވާދަކުރުމަށެވެ. އައިފޯން 16 ގައި ހިމެނޭނެ އެންމެ މުހިންމު އެއް ފީޗާއަކީ އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ޓެކްސްޓާއި އިމޭޖް އުފެއްދުމުގެ ފީޗަރއެވެ.
މާކެޓް ރިސާޗް ފާމް ކަނާލިސްގެ އެމްބާ ލިއު ވިދާޅުވެފައިވަނީ ވާވޭގެ އަވަސް ކުރިއެރުމަކީ ޗައިނާގެ މާކެޓުގައި އެޕަލްއަށް ސީދާ ގޮންޖެހުމެއް ކަމަށެވެ. ޗައިނާއަކީ އެޕަލްގެ ދެވަނައަށް އެންމެ ބޮޑު މާކެޓެވެ.
ވާވޭގެ އައު ފޯނުގެ އަގު އަދި ހާމަކޮށްފައެއް ނުވެއެވެ. ނަމަވެސް، އެނަލިސްޓުން ބުނާ ގޮތުގައި މި ފޯނުގެ އަގު ހުންނާނީ ވަރަށް މަތީގައެވެ. އެހެނީ މިއީ އުފެއްދުމުގެ ޚަރަދު ބޮޑު، ޕްރީމިއަމް ފޯނަކަށް ވާނެތީއެވެ.
އެމެރިކާގެ ފިޔަވަޅުތަކާ ގުޅިގެން ދަށަށް ދިޔަ ވާވޭގެ ވިޔަފާރި މިހާރު ދަނީ އަލުން ކުރިއަރަމުންނެވެ.
މިގޮތުން 2024 ގެ ފުރަތަމަ ފަސް މަހު ވާވޭގެ ފްލެގްޝިޕް ސްމާޓްފޯނުތަކުގެ ވިޔަފާރި 72 އިންސައްތަ އިތުރުވެފައިވާ ކަމަށް ވަނީ ބުނެފައެވެ.