ސްމާރޓްވުމަކީ، މޮޅުވުމެވެ. ޒަމާނަށް ފެތުމެވެ. ފަސޭހަވުމާއި، ފައިދާ ހޯދަން އެނގުމެވެ. ޓެކްނޮލޮޖީގެ އެހީގައި ލިބޭ ކުރިއެރުންތަކާއި ފަސޭހަތަކުގެ ފައިދާ ލިބިގަތުމަކީ، ސްމާރޓް މީހާގެ ސިފައެކެވެ. ފެނަކައިން މިހާރު ކުރިއަށް ގެންދާ ސްމާރޓް މީޓަރު ޕްރޮޖެކްޓްގެ ދަށުން ހަރުކުރެވޭ މީޓަރުތައްވެސް ސްމާރޓް ވަނީ މިދެންނެވި ސަބަބުތަކާއި ހުރެއެވެ. މިއީ، މީގެ ކުރިން ބޭނުން ކުރަމުންއައި އެނަލޮގް އަދި ޑިޖިޓަލް މީޓަރުތަކުގެ ބަދަލުގައި ބޭނުންކުރެވޭ މީޓަރެކެވެ. ބަލާބެލުމަށް މާ ބޮޑު ތަފާތެއް ނެތްނަމަވެސް، މި މީޓަރު ބޭނުންކުރަން ފެށުމުން، މިހާރާ އަޅާބަލާއިރު ފަސޭހަކަމާއި ޚަރަދުގެ ގޮތުން ހާސްބައި ތަފާތު ނަތީޖާއެއް ނެރެވިދާނެއެވެ.
ގޭގައި ކަރަންޓު މީޓަރު ހިނގާފައިވާ މިންވަރު ބަލަން ބޭނުންނަމަ، ކުޑަ ނޯޓު ފޮތަކާއި ގަލަމެއް ހިފައިގެން، އައިނު ހެޔޮވަރު ކުރަމުން އައިސް މީޓަރަށް އަލި ކުރިކުރުން، ސްމާރޓް މީޓަރާއެކު ނިމުމަކަށް އައީއެވެ. ސްމާރޓް މީޓަރުގެ އެންމެ ބޮޑު ތަފާތަކީ، ރިމޯޓްކޮށް މީޓަރުގެ ރީޑިން ނެގުމެވެ. އެހެން ޢިބާރާތަކުން ދަންނަވާނަމަ، މީޓަރު ހުރި ތަނަކަށް ނުގޮސް ނުވަތަ މީޓަރު ލޮލަށް ނުފެނިވެސް، ކަރަންޓު ބޭނުންކޮށްފައިވާ މިންވަރު ދެނެގަނެވޭނެއެވެ. މިއީ، ޚިދުމަތް ދޭ ފަރާތަށްވެސް އަދި ޚިދުމަތް ހޯދާ ފަރާތަށްވެސް ލިބިގެންދާނެ އެންމެ ބޮޑު ފަސޭހައެވެ. ޚިދުމަތް ދޭ ފަރާތަށް ލިބޭނެ ފަސޭހައަކީ، ގޭގެއަށް ގޮސް ރީޑިން ނެގުމުގެ ބުރަ އުފުލުމުގެ ބަދަލުގައި އޮފީހުގައި ޤާއިމް ކުރެވިފައިވާ ނެޓްވޯކުގެ އެހީގައި އެ މަސައްކަތް ކުރެވުމެވެ. އެހެންކަމުން، ކަރަންޓު ބިލު ހެދުމުގެ ކުރިން ގޭގެއަށް ގޮސް ރީޑިން ނެގުން ނިމުމަކަށް އައިސް މުވައްޒަފުންގެ ވަގުތު ސަލާމަތް ކުރެވޭނެއެވެ. ނަމަވެސް މި ޕްރޮޖެކްޓުގެ ހަޤީޤީ ނަފާވެރިންނަކީ ސްމާރޓް މީޓަރުގެ ޚިދުމަތް ލިބިގަންނަ ކަސްޓަމަރުންނެވެ. ގޭގައި ކަރަންޓު ބޭނުން ކުރެވޭ މިންވަރު، ކޮންމެ ގަޑިއިރަކަށް ވަކި ވަކިންވެސް ބަލާލުމުގެ ފުރުސަތު ފަހިވެގެން ދާނެއެވެ.
މިއާއެކު ދެން އުފެދިދާނެ ސުވާލަކީ، ގަޑިއަކު އެއްފަހަރު މީޓަރަށް ބެލުމުން ގޭގެ ކަރަންޓު ބިލު ކުޑަވޭހެއްޔެވެ؟ ޖަވާބަކީ އާނއެކޭއެވެ! އޮޓޯމެޓިކުން ނުވިޔަސް، އަމިއްލައަށް ގެންނަ ކުދިކުދި ބަދަލުތަކަކާއެކު އެކަން ކުރެވިދާނެއެވެ. މިހާ ހިސާބަށް ތަޢާރަފްވެފައިވާ މޯބައިލް ފޯނުގައިވާ އެޕްލިކޭޝަނުން، ކޮންމެ ދުވަހަކު ކަރަންޓު ހިނގާ މިންވަރު ދެނެގަނެވުނު ނަމަވެސް، މި މަޝްރޫޢު ނިމި، މޯބައިލް އެޕްލިކޭޝަން ފުރިހަމަވެގެން ދާއިރު، ކޮންމެ ގަޑިއިރަކަށް ވަކިވަކިން ކަރަންޓު ހިނގާ މިންވަރު ބެލުމުގެ ފުރުސަތު ލިބިގެން ދާނެއެވެ. މިއީ، ގޭގައި ކަރަންޓުން ބޭނުން ކުރެވޭ މެޝިނަރީސް ނުވަތަ އެޕްލަޔަންސްތަކަށް ބޭނުންވާ ކަރަންޓުގެ ނިސްބަތް އަންދާޒާ ކުރެވި ކޮންޓްރޯލް ކުރެވުމަށް ހުޅުވޭ ދޮރެކެވެ. ކަރަންޓު އެންމެ ބޮޑަށް ހިނގަނީ ގޭގައި ކަރަންޓުން ބޭނުންކުރާ އެއްޗެހީގެ ތެރެއިން ކޮން އެއްޗަކަށްތޯ ޓެސްޓު ކުރުމަށް، އެންމެ އެއްޗެއް ފިޔަވައި އެހެން ހުރިހާ ސާމާނެއް ނިއްވާލައިގެން، ފޯނުގައި އޮންނަ ސްމާރޓް މީޓަރ އެޕްލިކޭޝަނުން ބަލާލެވޭނެއެވެ. މިސާލަކަށް، އިސްތިރި ކުރުމަށް އެކަނި ގަޑިއިރަކު ކިހާ ކަރަންޓެއް ހޭދަވޭތޯ ބެލިދާނެއެވެ. ނުވަތަ ބަދިގޭގައި ގެންގުޅޭ އެއަރފްރަޔަރ ފަދަ އެޕްލަޔަންސްތައްވެސް ޓެސްޓު ކުރެވިދާނެއެވެ. މިގޮތުން، ކުރިން ކަރަންޓު ބޭނުންކުރެވޭ ގޮތުގެ ޚިޔާލެއްވެސް ލިބިފައިނުވާ ކިތައްމެ ދިމާއަކަށް ސިކުނޑި ހުޅުވި އެކަންކަމާއިމެދު ވިސްނުމަށް ފުރުސަތު ލިބިގެންދާނެއެވެ. ގޭގައި ހިފާ ގެންގުޅޭ އިލެކްޓްރޯނިކް ވަސީލަތްތައް ވަރަށް ބޮޑަށް އިތުރުވެފައިވާއިރު، އެއް ބޭނުމެއް ކުރެވޭ އެތައް ސާމާނެއް އަޅުގަނޑުމެނަށް އެބަ ބޭނުންކުރެވެއެވެ. މި ސާމާނުތަކަށް ކަރަންޓު ހިނގާވަރު ވަޒަން ކުރެވުމުން، މިތަނުން ކަރަންޓު ޚަރަދު އެންމެ ކުޑަ ސާމާނު ބޭނުންކުރަން އެނގި، އެންމެ ޚަރަދު ކުޑަވާނެ ގޮތަކަށް ބޭނުން ކުރަންވެސް އެނގިގެންދާނެއެވެ. އަދި ހޫނު ދުވަސްތަކާއި ފިނި ދުވަސްތަކުގައި، ކަރަންޓު ބޭނުން ކުރެވޭ ނިސްބަތަށް އަންނަ ބަދަލު އަމިއްލައަށް ތަޖުރިބާ ކޮށްލެވޭނެއެވެ.
ގޭގައި ބޭނުންކުރާ އިލެކްޓްރޯނިކް އެއްޗެއްގައި މައްސަލަޖެހިގެންވެސް ކަރަންޓު ހިނގަންޖެހޭ ވަރަށްވުރެ ބޮޑަށް ކަރަންޓު ހިނގާ، ބިލް ބޮޑުވާ ޙާލަތްތައް ދިމާވަނީ މަދެއްކޮށެއްނޫނެވެ. ސްމާރޓް މީޓަރު ބޭނުން ކުރެވެން ފެށުމުން، މިކަހަލަ ޝައްކެއް އުފެދިއްޖެނަމަ، އެހެން ހުރިހާ ސާމާނެއް ނިއްވާލުމަށްފަހު، ޝައްކު އުފެދޭ އެއްޗެއް އެކަނި އޮންކޮށްގެން ޓެސްޓް ކުރެވިދާނެއެވެ. ނުވަތަ މައްސަލަ އުޅެނީ ކޮން އެއްޗެއްގައިކަން ޔަޤީން ނުވާނަމަ، ފަހަރަކު އެއްޗެއް މި ގޮތަށް ޓެސްޓު ކޮށްލެވިދާނެއެވެ. ސްމާރޓް މީޓާރުގެ ޚިދުމަތް ލިބެން ފެށުމުން، މިއީ އެހެން މީހަކަށް ބަރޯސާނުވެ ކޮންމެ މީހަކަށްވެސް އަމިއްލައަށް ކޮށްލެވިދާނެ ކަމަކަށްވުމުން، އަވަސް މަގެއްގައި ޙައްލު ހޯދުނީއެވެ. އަދި ކަރަންޓު ލީކޭޖެއްގެ ސަބަަބުން، މަސް ނިމޭއިރު އަތުވެދާނެ މާ ސިންގާ ބޮޑު ކަރަންޓު ބިލަކުންވެސް ސަލާމަތްވެވުނީއެވެ.
ސްމާރޓް މީޓަރާއެކު، ބޭނުން ކުރިވަރަށްވުރެ އިތުރަށް ކަރަންޓު ބިލަށް އަރާފައިވާކަމުގެ ޝައްކުވެސް ފިލުވާލެވޭނެއެވެ. ސަބަބަކީ، ފެނަކައިގެ މި ސްމާރޓް މީޓަރަކީ، އިންޓަރނޭޝަނަލީ ސަރޓިފައި ކުރެވިފައިވާ މީޓަރަކަށް ވުމުން، އެކަމުގައި ދިމާވާނެ ޓެކްނިކަން މައްސަލަތައް ވަރަށް ބޮޑަށް މަދުވުމެވެ. އަދި މި މީޓަރުގެ ރީޑިން ނަގާ، ޑޭޓާ އެއްކުރެވޭނީ، ފެނަކައިން ޓްސްޓް ކޮށްފައިވާ ރޭޑިއޯ ޕްރިކުއެންސީ މެދުވެރިކޮށް ކަމަށް ވުމުން، އިންސާނުންގެ އަތުން ޖެހޭ އަތުކުށް ޖެހުން މަދުކުރެވި މިހާރަށްވުރެ އިތުބާރު ހިފޭ ބަދަލަކަށް މި ބަދަލު ވެގެން ދާނެތީއެވެ.
ދެން އޮތް އެންމެ މުހިއްމެ ފައިދާއަކީ، މި މީޓަރު މެދުވެރިކޮށް ފެނަކައިން ދޫކުރާ ކަރަންޓުގެ ފެންވަރު ދެނެގަނެވުމެވެ. މިސާލަކަށް، ކަރަންޓު ވޯލްޓޭޖް ހުންނަން ޖެހޭ ވަރަށްވުރެ ދަށްވާނަމަ، ޚިދުމަތް ހޯދާ ފަރާތުގެ ޝަކުވާގެ ކުރިން، ޚިދުމަތް ދޭ ފަރާތަށް އެކަން ދެނެގަނެވި، އެކަން ޙައްލު ކޮށްދެވޭނެއެވެ.
ސްމާރޓް މީޓަރު ޕްރޮޖެކްޓުން ފެނަކައިގެ ދަށުން ޚިދުމަތް ދޭ ރަށްރަށުގައި މިހާރު ޤާއިމްކުރެވި ބޭނުން ކުރެވެމުންދާ ކަރަންޓު މީޓަރުތައް، ސްމާރޓް މީޓަރުތަކަށް ބަދަލުކޮށްދޭނެއެވެ. މިއީ ޒަމާނީ ޓެކްނޮލޮޖީގެ މަންފާއާއި ލުއިފަސޭހަކަަން ކުންފުނީގެ ޚިދުމަތް ލިބިގަންނަ ކަސްޓަމަރުންނަށް ފޯރުކޮށްދިނުމަށް، ކަސްޓަމަރުންގެ އަތުން އިތުރު އަގަކާއި ނުލައި ފެނަކައިން ދޭ ޚިދުމަތެކެވެ. މި ޚިދުމަތުގެ ބޭނުން އެންމެ ފުރިހަމަ ގޮތުގައި ފޯރުކޮށްދިނުމަށްޓަކައި، އެ މީޓަރުގެ ރިޑިން ފޯނުން ބަލައިލެވޭނެ ގޮތަށް، އެޕްލިކޭޝަނެއް މިވަނީ ތަޢާރަފް ކުރެވިފައެވެ. އެ ފީޗަރ ހިމެނޭނީ، ފެނަކައިގެ ރަސްމީ މޯބްއިލް އެޕްލިކޭޝަންގެ ތެރޭގައެވެ. ކޮންމެ ކަސްޓަމަރަކަށް ދީފައިވާ ފެނަކަ ސަބްކްރިޕްޝަން ނަންބަރު ޖަހާލުމަށްފަހު އެ ފީޗާރއަށް ލޮގިން ވުމުން، ކަރަންޓު މީޓަރު ހިނގާގޮތް ބަލައިލެވޭނެއެވެ. ކުރިން ދެންނެވި ގޮތަށް، ގޭގައި ހަރުކޮށްފައިވާ މީޓަރު ކައިރިއަށް ބައްތި އަލިކުރަމުން ދިޔުމުގެ ބަދަލުގައި، ޖީބުގައި އޮތް ފޯނު ނަގާ، ކޮންމެތާކު، ކޮންމެ ވަގުތަކުވެސް ކަރަންޓު މީޓަަރު ޗެކް ކޮށްލުމުގެ ފުރުސަތު، ފެނަކައިގެ މި ޕްރޮޖެކްޓުން ފަހިކޮށްދެއެވެ.