މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީގެ ސްޓޭޓް މިނިސްޓަރުގެ މަގާމުގައި ހުންނެވި ޔޫސުފް އަބްދުލްގަފޫރު އެ މަގާމުން ވަކިކޮށްފިއެވެ.
އެނގިފައިވާ ގޮތުގައި އޭނާ މަގާމުން ވަކިކުރީ މިދިޔަ ބުރާސްފަތި ދުވަހުއެވެ. އެކަމަކު، އޭނާ މަގާމުން ވަކިކުރި ސީދާ ސަބަބެއް ނުބުނެއެވެ.
ސަރުކާރުގެ އިސް ތަރުޖަމާނު ހީނާ ވަލީދު 'ސަން'އަށް ވިދާޅުވީ، ޔޫސުފް އަބްދުލްގަފޫރު ސްޓޭޓް މިނިސްޓަރުކަމުން ވަކިކުރީ ގާނޫނުއަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން ކަމަށެވެ.
ގާނޫނުއަސާސީގެ 115 ވަނަ މާއްދާގެ ޅ ގައި ބުނެފައިވަނީ ވަޒީރުންގެ މަޖިލީހަށާއި، ރައީސުލްޖުމްހޫރިއްޔާގެ މަޤާމުގެ ވާޖިބު އަދާކުރުމަށްޓަކައި ބޭނުންވާ މަޤާމުތަކަށް، މީހުން ޢައްޔަންކުރުމާއި، އެ މަޤާމުތަކުން މީހުން ވަކިކުރުމާއި، އެ މީހުންގެ އިސްތިޢުފާ ޤަބޫލުކުރުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށެވެ.
ހޯމް މިނިސްޓްރީގެ ވެބްސައިޓުގައި ވާގޮތުން ޔޫސުފް އަބްދުލްގަފޫރުގެ އިތުރުން އަދި ފަސް ސްޓޭޓް މިނިސްޓަރުން އެ މިނިސްޓްރީގައި ތިބެއެވެ.
މާލީ ދަތިތަކުން އަރައިގަންނަން ސަރުކާރުގެ ސިޔާސީ މުވައްޒަފުންގެ އަދަދު މަދުކުރައްވާނެ ކަމަށް ރައީސް ޑރ. މުޙައްމަދު މުއިއްޒު ވަނީ ވިދާޅުވެފައެވެ.
މި ސަރުކާރުގައި ތިބި ޖުމުލަ ސިޔާސީ މުވައްޒަފުންގެ އަދަދާއި ތަފުސީލުތައް ސަރުކާރުން ހާމަނުކުރި ނަމަވެސް އެ އަދަދުތައް ވައުދުވި ގޮތަށް 700 އަށްވުރެ އިތުރުނުވާނެ ކަމަށް ސަރުކާރުން ވަނީ ބުނެފައެވެ. އެކަމަކު، ސިޔާސީ މުވައްޒަފުންގެ އަދަދު 2،000 އަށްވުރެ ވެސް މަތިވާނެ ކަމަށް އިދިކޮޅު ފަރާތްތަކުން ތުހުމަތުކުރެއެވެ.