ސަރުކާރުގެ އަމާޒަކީ އަނިޔާއިން ރައްކާތެރި، ދުޅަހެޔޮ ވެއްޓަކުން ޒިންމާދާރު ކުދިންތަކެއް ބިނާކުރެވޭނެ މަގު ފަހިކޮށްދިނުންކަމަށް ރައީސްގެ އަނބިކަނބަލުން މެޑަމް ސާޖިދާ މުޙައްމަދު މިއަދު ވިދާޅުވެއްޖެއެވެ.
ކުޑަކުދިންނާ ދެކޮޅަށް ކުރާ އަނިޔާ ހުއްޓުވުމާއި އެއަށް އިޖާބަދިނުމުގެ ގައުމީ އެކްޝަން ޕްލޭން އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ސާޖިދާ ވިދާޅުވީ ކުޑަކުދިންނަކީ މުޖުތަމައުގައި އެންމެ ބޮޑަށް އެކި ނުރައްކަލަށް ހުށަހެޅުމުގެ ހިރާސް ބޮޑު ގިންތި ކަމަށެވެ. އެހެންކަމުން އެ ކުދިންނަށް ހިމާޔަތްދީ ރައްކާތެރިކަން ދިނުމަކީ ބޮޑެތި މީހުންގެ ޒިންމާއެއްކަމަށް ވިދާޅުވިއެވެ.
އެގޮތުން ސަރުކާރުގެ މެނިފެސްޓޯގައި ހިމެނޭ "ކޮންމެ ކުއްޖަކަށް އާއިލާއެއް" ސިޔާސަތަކީ ވެސް ސަރުކާރުގެ ފަރާތުން ކުޑަކުދިންނަށް ރައްކާތެރިކަން ދިނުމަށް ކުރާ މަސައްކަތުގައި އެ ކުދިންނަށް އާއިލާއެއް ފޯރުކޮށްދޭން ކުރާ މަސައްކަތް ހާމަވާ ކަމެއްކަމަށް ސާޖިދާ ވިދާޅުވިއެވެ.
ކުޑަކުދިންނާ ދެކޮޅަށް ކުރާ އަނިޔާ ހުއްޓުވުމާއި އެއަށް އިޖާބަދިނުމުގެ ގައުމީ އެކްޝަން ޕްލޭން އިފްތިތާހުކުރުން -- ފޮޓޯ: ރައީސް އޮފީސް
އެހެންނަމަވެސް ހަމައެކަނި ދައްކާ ވަހަކައަކުން ފުއްދައިލެވެން ނެތްކަމަށާއި، ކުޑަކުދިންނާމެދު މުޖުތަމައުގައި ހިންގޭ އަމަލުތައް އޮތް މިންވަރަކީ އެ ކަންކަމާ ދެކޮޅަށް ވަގުތުން ފިޔަވަޅު އެޅުމުގެ މުހިންމުކަން އޮތްކަމެއްކަމަސް ސާޖިދާ ވިދާޅުވިއެވެ.
މިއަދު، ގައުމީ އެކްޝަން ޕްލޭން އިފްތިތާހުކުރުމާއެކު، އެ ކަންކަމުން ރައްކާތެރިކޮށްދީ އަމަލުކުރާނެ ގޮތް ކަނޑައެޅޭނެކަމަށް ވިދާޅުވިއެވެ.
"މިއީ ހަަމައެކަނި ޕޮލިސީއެއް ނޫން. މިއީ ވަރަށް ބޮޑަށް ރޭވިފައިވާ މަގު ޗާޓެއް، ސްޓްރެޓެޖީއެއް، ކުޑަކުދިންނަށް ކުރާ އަނިޔާ ހުއްޓުވުމަށް،" ސާޖިދާ ވިދާޅުވިއެވެ.
ސާޖިދާ ވިދާޅުވީ ސަރުކާރުގެ މަގްސަދު ވަރަށް ސާފުކަމަށެވެ. އެއީ ކޮންމެ ކުޑަކުއްޖަކީ ވެސް އަނިޔާއާ ދުރު ވެެއްޓަކުން ބޮޑުވާ ޒިންމާދާރު ކުއްޖަކަށް ހެދުންކަމަށް ވިދާޅުވިއެވެ.
ސާޖިދާ ވިދާޅުވީ އަނިޔާ ތަހައްމަލުކޮށްފައިވާ ކުދިންނަށް ބޭނުންވަނީ ހަމައެކަނި ހިމާޔަތް ނޫންކަމަށާއި އެ ކުދިންނަށް އެ އަނިޔާއިން ލިބުނު ނަފްސާނީ ގެއްލުމުން އަރައިގަންނަން މުޅި މުޖުތަމައުގެ އަޅައިލުމާއި ލޯބި ބޭނުންވާކަމަށެވެ.
އަދި މިއީ އެންމެންގެ ޒިންމާއެއްގެ ގޮތުގައި ހެދުމަށް ވެސް ސާޖިދާ ވަނީ ގޮވައިލައްވައިފައެވެ.