ރާއްޖެއާއި ތުރުކީގެ މިނިވަން ވިޔަފާރީގެ އެއްބަސްވުން ސަރުކާރުން އެކުލަވާލާފައިވާ ކަމަށް އިކޮނޮމިކް މިނިސްޓަރު މުޙައްމަދު ސައީދު ރޭ ވިދާޅުވެއްޖެއެވެ.
މިކަމާ ގުޅުވައި ޕީއެސްއެމްގެ 'ރާއްޖެ މިއަދު' ޕްރޮގްރާމުގައި މިނިސްޓަރު ސައީދު ވިދާޅުވީ، ތުރުކީއާއެކު ސަރުކާރުން ހަދަނީ ޕްރިފަރެންޝަލް ޓްރޭޑް އެގްރީމަންޓެއް ކަމަށާއި އެގްރީމަންޓުގެ މަސައްކަތް ނިންމާލެވުނީ މިދިޔަ ބުރާސްފަތި ދުވަހު ކަމަށެވެ.
މިނިސްޓަރު ވިދާޅުވީ، ދެން އޮންނާނީ އެ ގައުމުގެ ގާނޫނޫ ހަދާ މަޖިލީހަށް އެއްބަސްވުން ހުށަހަޅައި ފާސްކުރުން ކަމަށާއި އޭގެފަހުން ދެ ގައުމުން އެއްބަސްވުމުގައި ސޮއިކުރާނެ ކަމަށެވެ.
އަޅުގަނޑުމެން ލަފާކުރަނީ ޑިސެމްބަރު ނުވަތަ ޖެނުއަރީ 1 ހިސާބުގައި އަޅުގަނޑުމެންނަށް އިފެކްޓިވްވާނެ ކަމަށް
އެ އެގްރީމަންޓުގެ ތެރެއިން 214 އައިޓަމެއް އެކްސްޕޯޓްކުރަން ކުރަން ރާއްޖެއިން އެދުނުކަމަށް ސައީދު ވިދާޅުވިއެވެ. އޭގެތެރެއިން 38 އައިޓަމަކުން އެއްކޮށް ޑިއުޓީ ކަނޑާލަން އެދުނު ކަމަށް ވިދާޅުވިއެވެ. އެ އައިޓަމްތަކަކީ ތުރުކީން ވެސް ޑިއުޓީ ކަނޑަން އެދުނު އައިޓަމްތައް ކަމަށް ވިދާޅުވިއެވެ.
އޭގެތެރޭގައި ކަންނެއްޔާއި، ކަޅުބިލަ މަހުގެ އިތުރުން ހިކި މަހާއި މަހުން ތައްޔާރުކުރާ އެކި ކާނާތައް ހިމެނޭ ކަމަށް ވިދާޅުވިއެވެ.
ދެން ހުރި އައިޓަމްތަކުން ތުރުކީ އިން މިހާރު ނަގާ ޑިއުޓީ އަށް ވުރެ ވަރަށް ބޮޑު ތަން ކުޑަކޮށްދިނީ. އެހެން ނަމަވެސް ޒީރޯ ޓެރިފްގައި ނުވަތަ ރާއްޖެ އިން ތުރުކީ އަށް އެކްސްޕޯޓްކުރާ އައިޓަމްތަކުގެ ތެރެއިން އެއްގޮތަކަށް ވެސް ޑިއުޓީ ދައްކަން ނުޖެހޭ 38 އައިޓަމެއް އަޅުގަނޑުމެންނަށް އެބައޮތް ލިބިފައި
އިތުރަށް ވާހަކަދައްކަވަމުން، މީނިސްޓަރު ވަނީ ޔޫރަޕްގެ ގައުމުތަކުގައި ބާނާ މަސް ޕްރޮސެސްކުރުމުގެ މަސައްކަތް އެންމެ ގަދައަށް ކުރަނީ ތުރުކީން ކަން ފާހަގަކުރައްވާފައެވެ. އެހެންވެ، އެ ގައުމުގެ ލޮބީކުރުން ވަރުގަދަވާނެ ކަމަށް މިނިސްޓަރު ވިދާޅުވެފައިވެއެވެ.
ފާހަގަކޮށްލެވޭ ގޮތުގައި، މިދިޔަ އޭޕްރީލް 25ގައި ވަނީ ތުރުކީއާއި ރާއްޖެއާ ދެމެދު ގާއިމްކުރާ މިނިވަން ވިޔަފާރި އެއްބަސްވުމުގެ ދަށުން ސުން ޕަސެންޓު ރޭޓުގައި 214 ބާވަތެއް ރާއްޖެއިން އެ ގައުމަށް އެކްސްޕޯޓުކުރެވޭނެ އިންތިޒާމް ހަމަޖެއްސުމަށް މަޝްވަރާކޮށްފައެވެ.
ތުރުކީއަކީ ރައީސް ވެރިކަމަށް ވަޑައިގަތުމަށްފަހު ރަސްމީ ފުރަތަމަ ދަތުރުފުޅު ކުރެއްވި ގައުމެވެ. ދެ ގައުމުގެ ގުޅުން މިހާރު ވަރަށް ބޮޑަށް ވަނީ ބަދަހިވެފައެވެ.