އަބޫ ދާބީގެ ޕްރައިވެޓް ސެކްޓަރުގައި މަސައްކަތްކުރާ އަންހެނުންނަށް ވިހެއުމުން ލިބޭ ޗުއްޓީގެ މުއްދަތު 90 ދުވަހަށް އިތުރުކޮށްފިއެވެ.
އެ ގައުމުން އެގޮތަށް ނިންމީ އިޖުތިމާއީ އަދި އާއިލީ އެއްބައިވަންތަކަން އިތުރުކުރުމަށާއި އަލަށް އުފަންވާ ކުދިންނަށް ރަނގަޅު ތަރުބިއްޔަތެއް ދެވޭނެ މާހައުލެއް ގާއިމް ކުރުމަށް ހިތްވަރު ދިނުމަށް ކަމަށް އަބޫ ދާބީ ސޯޝަލް ސަޕޯޓު އޮތޯރިޓީ (އެސްއެސްއޭ)އިން ނެރުނު ބަޔާނެއްގައި ބުނެފައިވެއެވެ.
އެސްއެސްއޭއިން ބުނީ އެ އުސޫލުގެ ދަށުން، ވިހެއުމުގެ ޗުއްޓީއަށް 90 ދުވަސް ލިބޭނީ އަންނަ މަހުން ފެށިގެން ކަމަށެވެ. އަދި އެ ޗުއްޓީ ބޭނުންވާނަމަ، ވިހެއުމަށްފަހު 30 ދުވަހުގެ ތެރޭގައި އެކަމަށް އެދި ފޯމު ހުށަހަޅަންވާނެ ކަމަށް އެ އޮތޯރިޓީން ބުނެއެވެ.
ޗުއްޓީއަށް އެދޭއިރު މުސާރައިގެ ތަފްސީލުތަކާއި، ބޭންކް އެކައުންޓްގެ ތަފްސީލު ވެސް ހުށަހަޅަންޖެހެއެވެ.
އެ އުސޫލު އެކުލަވާލާފައިވަނީ އަބޫ ދާބީގައި ޑިޕާޓްމަންޓް އޮފް ކޮމިއުނިޓީ ޑިވެލޮޕްމަންޓުން ދާދިފަހުން ފެށި 'އެމިރޭޓް ފެމިލީ ގްރޯތް ސަޕޯޓް' ޕްރޮގްރާމްގެ ދަށުންނެވެ.
"އެ ނިންމުމުގެ ސަބަބުން އިޖުތިމާއީ އަދި އާއިލީ އެއްބައިވަންތަކަން އިތުރުވެ، ތުއްތު ކުދިންނަށް އާއިލާއާއި މުޖުތަމައުގެ ތެރޭގައި ކުރިއެރުމާއި ތަރައްގީއަށް ބޭނުންވާ އަޅާލުމާއި އެހީތެރިކަން ލިބޭނެ." އެސްއެސްއޭގެ ޑިރެކްޓަރު ޖެނެރަލް ޑރ. ބުޝްރާ އަލް މުއްލާ ވިދާޅުވިއެވެ.
އޭނާ އިތުރަށް ވިދާޅުވީ މި ހަރަކާތަކީ އެ ގައުމުގެ ރައްޔިތުން ޕްރައިވެޓް ސެކްޓަރާ ގުޅުމަށް ހިތްވަރު ދިނުމަށް ސަރުކާރުން އަންގާފައިވާ އިރުޝާދުތަކާ އެއްގޮތަށް ކުރިއަށް ގެންދާ ކަމެއް ކަމަށެވެ.