މި މަހު ރިޕޯޓުކުރި ވައިރަލް ހުމާއި ރޯގާގެ ކޭސްތައް މަދުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން "ސަން"އަށް ހިއްސާކުރި ތަފާސްހިސާބުތަކުން ދައްކާގޮތުގައި މި މަހުގެ ދެވަނަ ހަފުތާއާ އަޅާބަލާއިރު ތިންވަނަ ހަފުތާގައި ވެސް ވަނީ ވައިރަލްހުމާއި ރޯގާގެ ކޭސްތައް މަދުވެފައެވެ.
އެ ގޮތުން، މި މަހުގެ ދެވަނަ ހަފުތާގައި 2،700 މީހަކަށް ވައިރަލް ހުން ޖެހިގެން ރިޕޯޓުކޮށްފައިވެއެވެ. ނަމަވެސް، ތިންވަނަ ހަފުތާގައި މި އަދަދު ވަނީ 2،110 އަށް ދަށްވެފައެވެ. މިއީ 21.9 އިންސައްތައިގެ ދަށްވުމެކެވެ.
މި މަހުގެ ދެވަނަ ހަފުތާގައި އަރިދަފުސް ރޯގާ ޖެހިގެން 6،861 މީހަކު ވަނީ ރިޕޯޓްކޮށްފައެވެ. އަދި، ތިންވަނަ ހަފުތާގައި މި އަދަދު ވަނީ 6،132 ދަށްވެފައެވެ. މިއީ 10.6 އިންސައްތައިގެ ދަށްވުމެކެވެ.
އެޗްޕީއޭއިން ބުނީ، ވައިރަލް ހުން ޖެހިގެން އެންމެ ގިނަ މީހުން ރިޕޯޓުކޮށްފައިވަނީ މާލޭ ސަރަހައްދުންނާއި ހދ. އަތޮޅުގެ އިތުރުން ރ. އަތޮޅުންނެވެ. އަދި، އަރިދަފުސް ރޯގާ ޖެހިގެން މި މަހު އެންމެ ގިނައިން ރިޕޯޓުކޮށްފައިވަނީ މާލޭ ސަރަހައްދާއި ލ. އަތޮޅު އަދި ރ. އަތޮޅުންނެވެ.
މި ނިމުނީ ވިއްސާރަ މޫސުމަކަށްވުމުން ހުމާއި ރޯގާގެ އިތުރުން މަދިރީން ޖެހޭ ބަލިތައް ފެތުރުމަކީ އެކަށިގެންވާ ކަމެއް ކަމަށް އެޗްޕީއޭއިން ބުންޏެވެ. މި ކަމަށް ސަމާލުވާން އެ އެޖެންސީން ވަނީ އިލްތިމާސްކޮށްފައެވެ.