ކުރީގެ ރައީސުންގެ ތެރެއިން ގައުމަށް އެންމެ ބޮޑު ޚިޔާނާތެއްވީ ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ކަމަށް ޕީއެންސީގެ ޕާލިމަންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހް މިރޭ ވިދާޅުވެއްޖެއެވެ.
ފަލާހް މިހެން ވިދާޅުވީ، މިރޭ ޕީއެންސީން ބޭއްވި ހަރުގެ ޖަލްސާގައި ވާހަކަދައްކަވަމުންނެވެ. އެ ޖަލްސާގައި ފަލާހް ވިދާޅުވީ، ރާއްޖޭގައި ރައީސުލްޖުމްހޫރިއްޔާކަން ކުރައްވާ ބޭފުޅެއްގެ ނަންފުޅު ކިޔުއްވަން ޔާމީނަށް އުނދަގޫވާ ކަމަށެވެ.
ޔާމީންގެ ވެރިކަމުގައި ލިބިވަޑައިގެންނެވި މަންފާތަކަށް ކުރެއްވި 'ނުބައި އަމަލުތަކުގެ' މައްސަލަތައް ރާއްޖޭގެ ކޯޓުތަކުގައި ހިންގަން ފަށާފައިވާކަން ފާހަގަކުރައްވައި ފަލާހް ވިދާޅުވީ، އެ މައްސަލަތައް ހިންގަން ފެށީ މި ސަރުކާރުން ނޫން ކަމަށާއި އެކަން ކޮށްފައިވަނީ އެމްޑީޕީ ސަރުކާރުގައި ކަމަށެވެ.
ބެލި އިރުގައި އެކަން ސާބިތުވެސް އެބަވޭ. ދިވެހި ރައްޔިތުންނަށް އެ މަނިކުފާނު އަމިއްލަ ދޫފުޅުން އެ މަނިކުފާނުގެ އަމިއްލަ އެކައުންޓުތަކުގައި ހުންނެވި ފައިސާއާއި ޑޮލަރުގެ ވާހަކަ ވިދާޅުވީ. ދެން އަޅުގަނޑު ވެސް އަޅުގަނޑުގެ އަނގައިން ފޮރުވާފައި ހުންނަ އެއްޗެއް ޝަރީއަތުގެ މަޖިލީހަކަށް ނުބުނާނެ ދެއްތޯ އެއީ ވަގަށް ނަގާފައި ހުރި އެއްޗެކޭ، ޕީއެންސީގެ ޕީޖީ ލީޑަރު އިބްރާހިމް ފަލާހް
ގާނޫނުއަސާސީގައި ރާއްޖޭގެ ރައީސްކަން ކުރައްވާފައި ހުންނެވި ބޭފުޅުންނަށް އިނާޔަތްތަކާއި ރައްކާތެރިކަން ލިއްބައިދީފައި ހުންނަނީ ސަރުކާރު ވައްޓާލަން ނޫންކަން ފާހަގަކުރައްވައި ފަލާޙް ވަނީ ކުރީގެ ރައީސުންނަށް ބަހުގެ ހަމަލާތަކެއް ރައްދުކުރައްވައިފައެވެ.
މިރޭގެ ޕީއެންސީ ޖަލްސާގެ ތެރެއިން: ކުރީގެ ރައީސުންގެ ތެރެއިން އެންމެ ބޮޑު ޚިޔާނާތެއްވީ ޔާމީން ކަމަށް ފަލާހް ވަނީ ވިދާޅުވެފައި --- ފޮޓޯ/ ސަރުކާރު
އެގޮތުން، ޔާމީން ދައްކަވާ ވާހަކަފުޅުތައް ދެން ރައްޔިތުން ގަބޫލުނުކުރާނެ ކަމަށް ފަލާހް ވިދާޅުވިއެވެ.
ރައީސް ޔާމީނަކީ ހަގީގަތުގައި މި ގައުމުގައި ވެރިކަން ކުރެއްވި ބޭފުޅުންގެ ތެރެއިން އެންމެ ބޮޑު ޚިޔާނާތްވި ބޭފުޅާ، ޕީއެންސީގެ ޕީޖީ ލީޑަރު އިބްރާހިމް ފަލާޙް
އެފަދައިން ޔާމީނަށް ތުހުމަތު ކުރައްވަނީ އެމަނިކުފާނުގެ ވެރިކަމުގައި އެމްއެމްޕީއާރުސީގެ ލިސްޓުގައި އެ ބޭފުޅުންގެ ނަން ހިމަނުއްވާފައިވާތީ ކަމަށް ފަލާހް ވިދާޅުވިއެވެ. ނަމަވެސް، އޭނާ އަކީ ވިޔާފަރިކޮށް، މަސައްކަތްކޮށްގެން އެންމެ ކުޑައިރު ފެށިގެން މުދާ ހޯދަމުން އަންނަ މީހުން ކަމަށް ފަލާހް ވިދާޅުވިއެވެ.
އެ ޖަލްސާގައި އިތުރަށް ވާހަކަދައްކަވަމުން ފަލާހް ވަނީ އެ ލިސްޓުގައި އެބޭފުޅުންގެ ނަން ހިމަނުއްވާފައި އޮތީ އެމްޑީޕީއާއި ޔާމީނާއި އެތައް ބަޔަކު ހިމެނިގެން ކަމަށް ތުހުމަތުކުރައްވާފައެވެ. އެގޮތުން، އެބޭފުޅުން 80،000 ޑޮލަރު ގަތް ގޮތް ފެންނަން އޮންނާނެ ކަމަށާއި އެ މައްސަލަ ބެލުމަށް ރައީސް ޑރ. މުޙައްމަދު މުއިއްޒަށް އޭނާ ވަނީ ދަންނަވާފައެވެ.
އެމްއެމްޕީއާރުސީގެ ޚިޔާނާތުގެ މައްސަލައިގެ ފައިސާ ދައުލަތަށް ހޯދުމަށް ރައީސް ޑރ. މުޙައްމަދު މުއިއްޒު މަސައްކަތް ކުރައްވަމުން ގެންދަވާކަން އޭނާ ވަނީ ފާހަގަކުރައްވާފައެވެ.
ފާހަގަކޮށްލެވޭ ގޮތުގައި، މި ސަރުކާރުން ވެރިކަމަށް އައިތާ ހަފުތާއެއް ނުވަނީސް ޕީޕިއެމް ޕީއެންސީގެ ލީޑަރުގެ ގޮތުގައި ހުންނެވި، ޔާމީން ވަނީ އެ ކޯލިޝަންގެ ލީޑަރުކަމުން އިސްތިއުފާ ދެއްވައިފައެވެ. އެއަށްފަހު، ޔާމީން ވަނީ ޕީޕަލްސް ނެޝަނަލް ފްރަންޓު (ޕީއެންއެފް)ގެ ނަމުގައި އަމިއްލަފުޅު ޕާޓީއެއް އުފައްދަވާފައެވެ.