ފެނަކަ ކޯޕަރޭޝަންގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމުގައި ހުންނެވި އިބްރާހީމް ނާއިފް އެ މަގާމުން އިސްތިއުފާދެއްވުމުން، އެ މަގާމަށް މުހައްމަދު އަބްދުލްކަރީމް (ރުކުމާ) މިއަދު އައްޔަންކޮށްފިއެވެ.
ފެނަކައިގެ މީޑިއާ އޮފިޝަލަކު "ސަން"އަށް ވިދާޅުވީ، ކުރިން އެ މަގާމުގައި ހުންނެވި ނާއިފް އިސްތިއުފާދެއްވާފައިވާ ކަމަށެވެ. ނަމަވެސް، އިސްތިއުފާދެއްވި ވަކި ތާރީޚެއް ވިދާޅެއް ނުވެއެވެ.
އެހެންވެ، ހުސްވެފައިވާ ޑީއެމްޑީގެ މަގާމަށް މިއަދު ރުކުމާ އައްޔަންކޮށްފައިވާކަން ފެނަކައިން ވަނީ ކަށަވަރުކޮށްދީފައެވެ.
ފެނަކައިން ވަނީ ނާއިފް ކޮށްދެއްވި ޚިދުމަތްތަކަށް ޝުކުރުއަދާކުރައްވާ އެކްސްގައި ޕޯސްޓުކޮށްފައެވެ. އަދި، އެ މަގާމަށް އައްޔަނުކުރެއްވި ރުކުމާއަށް ވަނީ މަރުހަބާ ކިޔާފައެވެ.
މީގެ ކުރިން ރުކުމާ ހުންނެވީ ވެމްކޯގެ ޑީއެމްޑީކަމުގައެވެ.
ރުކުމާއަކީ ސިޔާސީ ދާއިރާގައި ފާހަގަކޮށްލެވޭ ބޭފުޅެކެވެ. އޭނާ ވަނީ މީގެ ކުރިން ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރުކަން ވެސް ކުރައްވާފައެވެ.
މަޖިލީސް ޕްރައިމަރީން ނާކާމިޔާބުވުމަށް ފަހު، އޭނާ އެމްޑީޕީން ވަކިވީ 2019 ވަނަ އަހަރެވެ.
އެއަށް ފަހު ރުކުމާ ވަނީ 2021 ވަނަ އަހަރު އޭރު އިދިކޮޅުގައި އޮތް ޕީޕީއެމާ ގުޅިވަޑައިގެންފައެވެ.